ISAYA 54 - Kemethajüh (N) (Re-editing) Bible (BSI)

Apvüwa na Israel kaghali

¹ Jerusalem, no kinyibvü kesü atsanga nkemi ti saghodha, isala khili tsü no anonkeghe ghena akhwisa, nu jishaya mehaidha. Khili tsü no kinyibvü na ma wuba na ma teshi nketenwa miwi atsanga jiki muya tendha!

² No ben keten nithsüjjenwa tsü sapi di kayichi; ali sapi siechi nu jetenji zükeqhe sayalo!

³ No kechhenkevü tsüdi wila aggüthu tsü ketsen waben; N-nyithu na khili mizzatenti kepathu na nka sen keben yyithu tsü yaneng yaben. Khili nyunuti yisha kethengthu wi anyi na hang pi pong yaben.

⁴ Nmessila, no kejügheya neng nbendha; no kimenniya nbendha. No kinyibvü tegü wi nketsatan kesa, nu denyile kesü sa nu no ketan hang pi caghang ntsa keten tsü maliaben.

⁵ No sahangkechiwa na nwuba kesü ti saaben; ma nyan na Apvüwa Kekhang ntsawa. Israel Nyiza kemethawa na no hangsha yaben, ma ayyi tsüdi wi kekhang kesenwa.

⁶ Israel, no kinyibvü tegü ma wuba na ma teshi nu ahathana ntsa sakea kesü ti le. Isala Apvüwa na no ci neng pi ma wi chi nu no wi khiben:

⁷ “Matsü keujü hi no teshia; isala kaghali kedhu sen nu hi no ssi neng yaden.

⁸ Matsü keujü hi ilebentsu, nu khapeghe bvüa, isala hi kaghali pi anuphan no ccüca wa tendha.” Tsalina no hangshaya ketenwa Apvüwa na khiben.

⁹ “Noah tsüwi hi atssü pi ayyi ndanbhon nengdha le khishitheng. Khili hi nmiwi aghepvü neng nbendha le khishiben; hi no kha nyelela kemeten pi no ncüdha.

¹⁰ Ayikhathu nu yyishiphon thu na gizighe lela, hi no kaghali tsüna asakhen sa nben; hi kecca khishi kethengwa tsü anuphanla nieden.” Tsalina no hangshaya ketenwa Apvüwa na khiben.

Ghaketenwa Jerusalem

¹¹ Apvüwa na khiben, “O Jerusalem, no ketizensa nu kekiqa nkemi nyunutiwa, thola nleben satecca kecü nmi; Hi alon menkedhu pi n-giketegü neng cüden.

¹² Hi rubi lon pi nducü zhü, nu alon annikeqhe kewegü ti kesa pi nkhweti jenka sa, nu no kevü khweti tsüdila alon menkedhu pi saaden.

¹³ ‘Hi ketanla n-nyithu sansiyaden, nu mehai kayi kesa nu kecca pi mathu cüden.

¹⁴ Ajühtsentsa nu kemeshonwa tsüna no satezü cüden. No kepasha nu kemessi nmila yazishu ben yaden.

¹⁵ Keujüla anyi kesü na no ssikaghashen lethu, tsüna ma hi kemeshen nchila saben; nu kesü le kesü lela no matang ketenwa na qanca ben.

¹⁶ “Hi amighe kecünyi sahangchi, mathu na annisa nu aghitsanqaithu cüden. Hi aghitsanqai sen nu nyu pathi keten süpahithu la sahangchi.

¹⁷ Isala aghitsanqai kesüla no patenaya nben; no no kemetsi-keminithu tsüdi lunengya kemehai benden. Hi imaghathu sheipiya, nu khangkeya pi mathu cüden. Apvüwa na khidha.”