ISAYA 51 - Kemethajüh (N) (Re-editing) Bible (BSI)

Jerusalem Leben saketecca jüh

¹ Apvüwa na khiben, “Ijüh kinalo, nthu hangshaya mvu, nu kekiqa yale hi wi gho ketenthu. Nthu na alonshi khawa wina shhugho, nu nthu pakhhi keya lon kechhüpenwa tsü meshen chilo.

² Nthu baqhaiwa Abraham nu Sarah, nthu na manyi gwo wina keshhugho keni tsü meshen chilo. Hi Abraham ci keya wi ma atsanga nmi, isala hi sawegü pi ma cü, nu atsanga pi cü; Hi ma shicübvüghathu sapi kejon sa cü.

³ ‘Hi nanketizen pi Jerusalem, nu ma keyasa wi hang kebenthu tsüdi ccücaden. Ma yyi na ayyikeshü lela hi tsüpi asanku kesü, hi Eden wi shengchi kesawa tsüti sa cüden. Anonkeghe nu kenen na ciwi ben den, keseng nu nkesengcha khwisa pi hi cüden.

⁴ “Ijüh kinalo, inyithu, hi khi keben tsü kinalo: Hi pi nyu kesansijüh pi mizzatentithu cü; iyenthu na kewegü sengho mathu cüden.

⁵ Hi wan gho mathu hangsha yaden; hi khangkeya tsüwa na tetsakidha. Hi hi ketanla mizzatentithu miwi diden. Kelensie wi kebenthu na hi kegho hieben; mathu na hi mathu hangsha yaben kesa nondi nu hieben.

⁶ Atssan wi yaki ghangchilo; ayyi wi ghangchilo! Atssanthu na annikekhu ti nmilaben; Ayyi na athsüqae ti qae bvüaben, nu ma nyithu tsüdila alipeng ti shüaden. Isala hi khushikeya sengho ketenwa hana anuphan ji; hi khangkeyawa tsüna keshüthangla ben ben.

⁷ ‘Ijüh kinalo, kemeshonwa chü kebenthu, hi pi nyu sansi keten jüh pi nthu leben wi chi pvü ketenthu. Anyithu na nthu nkhichi nu keminni gho lela nmessi lalo;

⁸ mathu na akhali kedsathsü ti nmilaben! Isala hi khushikeya sengho ketenwa hana anuphan ji; hi khangkeyawa tsüna matsü tsüdi wila ben wa yaben.’

⁹ Apvüwa, shagha ithu kiqa cülo! No kekhang sen nu ithu hangsha cülo; kheni tsüwi ti tsü sen chi cülo. Atssükedone ghassübvü Rahab süthi süzighe kesawa tsüna no.

¹⁰ Atssükedone ya qha thsü kesa nu atssü wi alen sakechi tsü la no, isanu no hangsha cü kebenthu ya pvüdhi waya thsü.

¹¹ No mathu kikasha kecüthu na anonkeghe ghena akhwisa, nu jishala gho Jerusalem cuyaben. Mathu na anuphan anonghe ben den, leben ketizenkesa nu leben gükeccü nmila anuphan ben den.

¹² Apvüwa na khiben, ‘No satezü cü ketenwa tsüna hi. No mangkesa na shü keten nyi messiden, ma aghangwa miwi sieki hang nketen na?

¹³ Nthu na Apvüwa nthu sahangkechiwa, atssanthu zanshigü kechiwa, nu ayyi giketegü kechiwa tsü malidha kwe? Mangkesa na nthu pasha ketenthu na lebentsu, nu nthu yasa le kebenthu tsü messi, nu hang benten nu? Mathu lebenketsu tsüna nthu kidhen nengya nbendha.

¹⁴ Atssüzü sa kebenthu tsü wan lishia tendha; mathu na kesie hang nu ndsathu keyishü tsüdila muyaben.

¹⁵ “Hi Apvüwa nthu Nyiza; Hi atssükedone pakethu chi, nu atssüketi ya ma hhai sa thsüden. Inyan na Apvüwa Kekhang ntsawa!

¹⁶ Hi atssanthu zanshigüchi nu ayyi giketegüchi; hi Jerusalem wi khi, ‘No inyi le! Hi pi nyu kesansijüh tsüpi no cüdha, nu ikwen pi no khweyaden.’ ”

Jerusalem gükeccü sakhenwa

¹⁷ Jerusalem, shaghalo! shagha nganyalo! Apvüwa na ma lebentsu nu jjüyalo pi no kecü kemeten hyiwa tsü no jjüyadha; no tsü jjüchiya, nu tsüna no sapi kenenkhukhu sa thsüa.

¹⁸ Thola nlen ketsütson nyi nmi, n-nyithu jawi thola nkwen zankeya nyi nmi.

¹⁹ Agükeccü keshen keni na nmiwi dughodha: aghi wina n-yyi pasa, nu n-nyithu na khwenthidha, Thola nanketizen pi no ccücakeya nmidha.

²⁰ Alen keti katen tsüdi wi n-nyithu na nkhangla qancaben; mathu na ameshü ti asakejügüthu ca wi yaben. Mathu na Anyiza lebenketsu kekhawa tsü chüyadha.

²¹ Jerusalem nyi ketizensa kebenthu, adikina nyi ti kenenkhukhu kebenthu,

²² Apvüwa nthu Nyiza na nthu sheipi nu khi, “Hi ileben ketsu wi pi no kecü hyiwa tsü sen bvüa tendha. No sapi kenenkhukhu sa thsü keten kisengtssüwa tsü njjü nengdha.

²³ Hi tsü khupi no pasha ketenthu, no pi alentonti wi chi nu kenenkagha ti cüten kesathu miwi chiaben .”