ISAYA 50 - Kemethajüh (N) (Re-editing) Bible (BSI)

¹ Apvüwa na khiben, “Nthu kemeshen tsü hi inyithu kesun pi anyi kesü na ma wubvü kiyisha ti bvü thsüale ben kwe? Isathu teshi kesa lesü khiewi ben nu? Nthu kemeshen tsü hi nthu jeü pi atssüzü nyi kesü na ma tsanga pi nyu nssümagha sa jeü keten ti saale ben kwe? nye, nthu kesami ghena atssüzü sa bvü; nthu kesazzi ghena nthu kesun pi bvü thsü le.

² ‘Inyithu na mangkesa na hi mathu hangshaya le kewa wi hi luneng nchila nu? Mang ghena hi mathu ci kechi wi nluneng nu? Hi mathu hangsha meya chala kwe? Hi ahza kesü khuchi pi atssükedone sapi qha, aghaku sapi ayyikeshü ceng, nu angathu ya atssü nkemi ghena shü thsüya mehai.

³ Hi atssan sapi jang nu keshü qaiki keben ti saaben.’ ”

Apvüwa maghawa na Ajühkekina

⁴ Kemisintsawa Apvüwa na hi nkhithu keyishü pi hi sansi cü, hi yala nchala kesathu satezüya kemehai saya thsü kesalina. Ghanen kaghapengla ma hi sansi le keben tsü kina mvuthiya kemehai sa cüden.

⁵ Apvüwa na chüshiya kemehai pi hi cü, nu hi ma jüh nhhaghe nyelela ma wina kheneng bvü nsa.

⁶ Hi ighatsü lishü pi hi kihhe ketenthu cü. Mathu na hi kimenni, ipang kenye pfü, nu immi meshuki lela hi mathu nkhen.

⁷ Isala mathu na hi kimenni kesa tsüna hi patenaya nben, kepaghenanye Kemisintsawa Apvüwa na kekiqa pi hi cüden. Hi igwo satezü pi tsüthu pvü ben yaden. Hi iccükwenshüya nben kesa chü,

⁸ Kepaghenanye Anyiza na ikete wi ben, nu ma hi nsami le kesa chüben. Anyi pahan na kempvüza sa nu hi kethenjüh senghoya mehai kwe? Ithu gweghe nu ajüh kaghatenpen wi wa na! Ma ya kemetsi-kemeni jüh sengho thsü nanka!

⁹ Kemisintsawa Apvüwa na ma ketanla isheipiden, isalethu thowa na hi sazzi le khiya mehai nu? Hi metsi-meni ketenthu tsüdila bvüaben; mathu tsüdila akhali na dsakea thsü ti nmi laben.

¹⁰ Apvüwa kinyikü nu ma magha jüh nie ketenthu tsüdi, nthu na ton keten len tsüna ntsakhiwa jang benlaya mehai, isala Apvüwa nondi nu nthu Nyiza miwi ma maghaki tenlo.

¹¹ Nyu pathi le acho kiden ketenthu, nthu cho ghena nthu na dedi aden. Apvüwa na ma ketanla tsü sagho thsüaben; nthu na ketizensa ntsa saaben.