ISAYA 49 - Kemethajüh (N) (Re-editing) Bible (BSI)

Israel na Mizzatentithu ghena Kewegü kesü

¹ Ijühkinalo, temeja wi mizzatentithu, nthu kelensie wi kahangthu! Hi npi kepvügha wina Apvüwa na hi kessiyadha, nu hi pi ma magha sa thsüle ciya.

² Ma ijüh pi njünnu kedighe ti sa cü. Ma ma kwen pi hi khweya. Ma hi pi alakusü ti dighezen nu senya kemehai sapi ketheng ti sa cü.

³ Ma hi wi khi, “Israel, no imaghawa; no ghena anyi hi sengden.”

⁴ Hi khi, “Hi kuli, isala tsüna ma men nkemi sapi khati sa nu! Hi kezü nmila, isala mangla sacen meya.” Isala Apvüwa ya isheipi thsüle kesalina hi ma nondiya mehai; hi kuli ketenwa ghena ma ikutimen sa cüben.

⁵ Hi npi kepvügha wina Apvüwa na hi kessiyadha; ma ma nyi ssineng gho nu Israel bvüzighe kesathu ssineng ghoale kesa ghena hi pi ma maghawa saya. Apvüwa na kenyuwakü pi hi cüden, ma kezü pi hi cü ketenwa.

⁶ Apvüwa na hi wi khi, “Hi no ghena kekuli ketiki kesü benle, imaghawa. No hang keya Israel nyithu tsü ssigho dikeya thsü ketan sa nben, isala hi no pi mizzatentithu ghena kewegüwa la sa cüden, isanu ayyi tsüdi hangshaya thsüle kesalina.”

⁷ Israel Nyiza kemethawa nu hangshawa na nyu ma nkhichitha sakea, mizzatentithu na ma nanmeghü kesa, nu kekhang kesenthu magha sa kebenwa wi khi, “Kadimithu na no lishü kechi muben, nu mathu na kenyuwakü pi no ccüca le shaghaden; kaditsathu la tsü muben, nu mathu na kukedu no kinyiben.” Apvüwa na ha saaben, kepaghenanye Apvüwa na ma maghawa kessiyadha; Israel Nyiza kemethawa na ma khishi kechi tsü nieden.

Jerusalem Sanengkeya

⁸ Apvüwa na ma nyithu wi khiben, “Nthu hangshakeya tsüna kegho wi hi hi kenen pi nthu ccücaden, nu nthu na kekiqa kekhie tsü luneng cüden. Hi nthu ghihie nu nthu khweya, nu nthu miwi na anyi tsüdi ssinu cenkethenjüh saaden. Hi nthu ya kuti khili yasa ketheng wi tsü hang nengya thsüaden.

⁹ ‘Hi atssüzüthu wi khiden, “Kekhenkeghe nsala bvü yilo!” nu kejang wi kebenthu wi “kethang wi shhugholo!” khiden. Mathu na khaghaneni zza na yyishiphon wi atsse yaketen ti saaben,

¹⁰ mathu na khiela ghama nu dighe nben. Aghani nu ayyikeshü wi keyeng na mathu ghong tenaa nben, kepaghenanye mathu ghali ketenwa na mathu ssisenden. Ma mathu ssinu atssü kebvüpen wi waden.

¹¹ “Hi alen keti sapi ayikhathu pvüdhi, nu alen sapi inyithu ya cüshu thsüden.

¹² Inyithu na alen kesie wina ghoden, Aghawa nu niduwa, acülawa Aswan wina.”

¹³ Atssanthu, akhwisalo! Anonkeghe ghena jishalo, ayyiwa! Ayikhathu ya akhwisa shhugholo! Apvüwa na ma nyithu leben satecca cü; ma ma nyi ketizensa kebenthu nantizen chiden.

¹⁴ Isala Jerusalem nyi na khi, “Apvüwa na ithu yishadha! Ma ithu malidha!”

¹⁵ Tsalina Apvüwa na lunengchi, “Ajja kesü na ma nga mali, nu ma pvügha kethengwa tsü ntizenlaya mehai kwe? Ajja kesü na ma nga mali lela hi tsü mangla sa nu nthu maliya nben.

¹⁶ Jerusalem, hi mangla sa nu no maliya nben! Hi n-nyan pi ikwenmeja wi zhükiyadha.

¹⁷ ‘No saneng le ketenthu na wan gho tendha, nu no yasa kesathu na no teshiaben .

¹⁸ Mangwa saben khe ghangkevüli chilo! N-nyithu na ajjen wi gho le saghu bendha! Hi ntsakhiwa hangben keten Nyiza ghena no n-nyithu ghena kapvü ben, shanyili na ma ghe pvü nu kapvü keten ti.

¹⁹ “No diyyiwa na yasa nu yisha, isala khilitsü tsüna anyi na gho ciwi hang le kebenthu ghena zza mtsü shaben. Nu no yasa pi kesathu na no ssinu temeja bvüaben.

²⁰ Kushiyyi wi kepvügha n-nyithu na ghanan kesü hati no kizaben, ‘Ayyi hana zza mtsü, hang le kesa ghena ithu na ayyi nsenpfüthu yishüdha!’

²¹ Isathu no ketanla no wi khiben, ‘Thowa na atsanga hathu pvügha pi hi cü nu? Hi itsanga bhatagha nu nmu nengla kesa na. Hi kushi pi bvü thsü kesa na, Thowa na atsanga hathu ha ssighodha nu? Hi ketan teshi pi theng kesa na, ghanyi hathu ha khiewa na gho nu?’ ”

²² Kemisintsa Apvüwa na ma nyithu wi khiben: “Hi azensu sapi mizzatentithu cü, nu mathu na ntsangathu ssinu ajjen wi ghoaben .

²³ Kadimithu na nbathu ti sa; nu kadijjathu na njjathu ti saaben. Mathu na nthu tuwi kukedu nthu kinyiben; mathu na mathu satemeni nthu kü ben le kesa pi nthu ccücaben. Tsaseng wi nthu na hi Apvüwa le kesa chüyaben; hi wi kekiqa hie ketenthu thola accükwenshü thsüa nben.”

²⁴ Nthu na süpahi kesü na nyu ji shupvü keten tsü khuya mehai kwe? Nthu na anyi kekhang kesü kwen wi atssüzüthu kikashaya mehai kwe?

²⁵ Apvüwa na lunengchi, “Tsüti kesa sagho den. Süpahi na atssüzüthu ssi keten tsü sen nu bvüaden, nu anyi kezü na nyu ji shupvü keten peghe yaden. Hi nyu na no matang ketenwa ssikesaliden, nu ntsangathu kikasha cüaden .

²⁶ Hi nthu pasha ketenthu ya khokho kepathili thsüaden; mathu na lebentsu nu kepathili pi adina thsüaden. Isathu anyi tsüdila hi Apvüwa le kesa chüyaben, nthu hangsha nu lisha cü ketenwa tsü. Mathu na hi Israel Nyiza Kekhang ntsawa le kesa chüyaben.”