ISAYA 48 - Kemethajüh (N) (Re-editing) Bible (BSI)

Anyiza na ghaketen wila Apvüwa

¹ Israel nyithu, ha kinachilo, Judah wina kedughothu: Nthu Apvüwa nyan wina kishen, nu Israel Nyizawa tsü kinyiten le khiden, isala nthu na khi keben jüh tsü kesüla sale nben.

² Isala nthu na anyunutiwa wi kahang nyi, nu Israel Nyiza, ma nyan na Apvüwa Kekhang ntsawa tsü nondi tenle kapvü nu khiden.

³ Apvüwa na Israel wi khiben, “Matsü kesie wakea wina mangwa saghoten khe hi tsü khipi thengdha; nu hi zulila tsü sacenya thsüa.

⁴ Kepaghenanye nthu na leben-dhu le kesa hi chü, nthu sun na zü pi amighe ti nu nthu tie na khang pi lezza ti le.

⁵ Tsalina hi npi wina nthu tucüki khipi kizadha, npi sakegho wina pi thangchidha, nthu na kecü atsikezhüthu na tsü sapi cenya thsüle nkhi thsüle kesalina.

⁶ ‘Hi npi wina khi ketheng tsüdila khili sacenben; hi khi ketheng tsüna meshon le kesa kekhiu. Khili pala ketheü gho keten pi nthu kiza na, hatu wi hi pi nthu nkechü thsü tsüthu.

⁷ Khili ccüna hi tsüthu sacen gho thsüben; hatu wi hati kesa mangla npi sa. Keujüla tsüti sale keathu, nthu na tsüthu tsüdila chüle khia kesa.

⁸ Pala pi nthu nondiya nben kesa hi chü, kepaghenanye nthu na nyu kematangthu le khi ghodha; Tsalina nthu na ha cüki mangla nza ladha, ajüh kesüla nthu khuna wi ndu ladha.

⁹ “Anyithu ya inyan seng thsüle kesalina hi ilebenketsu kekheneng senben; hi tsü zanneng senben nu nthu yasa nben.

¹⁰ Hi ketizenkesa nni wina nthu ghannandha, suna pi anni wi sakemetha ti. Isala nthu na ma men nkemi sa keben muya.

¹¹ Hi kuliketen tsüna hi ketanla ighena saben, hi inyan kenyen thsü nben, nu thola inyankethang nu iji ketan sa keten pi gishü thsü nten.”

Apvüwa na Ccülikesa kessikeyawa Sira

¹² Apvüwa na khiben, “Ijühkinalo, hi ciya kesa Israel nyithu! Hi Anyiza, atuwa, asakhenwa, hi ketan Anyiza le!

¹³ Ikwen na ayyi zhütegüwa sachi, nu atssan zankechuchi. Hi atssan nu ayyi cichithu manyi na wan ghola ben waden.

¹⁴ ‘Saghu nu kinayalo, nthu tsüdila! Acenpvüthu kesütanla hi kessiya kesa anyiwa tsüna Babilon ssikaghashenden kesa tucüki khi meya; Hi ma mangwa sa thsü mvu khe tsü saaden.

¹⁵ Ajühkhi pi ma cikeyawa tsüna hi; hi ma ssishu mehai cenkeya pi ma cü.

¹⁶ “Khili hi tetsaki gho hi mangwa khi khe kinayalo. Hi adechhü wina aghandu khidha, nu keshüthangla ijühwa tsü sacen thsüden.” (Kemisintsa Apvüwa na ma kekhang pi cü, nu hi kesunchi.)

Apvüwa na Ma nyithu ghena kekiden

¹⁷ Israel Nyiza kemethawa, nthu hangshaya ketenwa na khiben: “Hi Apvüwa nthu Nyiza, nthu ghena kemehai pi nthu sansi cü, nu nthu nwathu keyishü wi nthu lentsütson cü mvu ketenwa.

¹⁸ ‘Nthu na ijühkhukechi ketanla kinathu mehai kesa nan! Isathu kesawegü na lle sen nu aghaku qha wa nketen ti nthu wi gho kesale! Khangkeya na nthu wi atssükullu na aghüsa mejjen kewa ti ghoa kesa.

¹⁹ “Nthu shicüthu na ji pi ahachan ti, nu mathu na khiela dedi nben le kesa hi pi chü thsüa kesa.”

²⁰ Babilon wina kekhenkeghe nsala nu shhulo! jühtheü tsüpi anonkeghe sa jisha chilo; kahe wi lela chüya thsülo: “Anyiza na ma maghawa Israel hangshayadha!”

²¹ Apvüwa na ma nyithu ssinu ayyikeshü keqha, nu keyeng wi keshhu wi mathu na dighe, nyelela ketizen nsa. Ma alonshi wina mathu ghena atssü lle shhugho thsü; ma alonshi zankhhi nu atssü na lle shhugho.

²² Apvüwa na khiben, “Kesamithu ghena kecca nmi.”