ISAYA 45 - Kemethajüh (N) (Re-editing) Bible (BSI)

Apvüwa na Sira kessikeya

¹ Apvüwa na Sira pi kadimiwa sa thsüle kessiya! Ma ya mizzatentithu yaya thsüle kessi pi chi; Apvüwa na kadimithu kekhang pasha thsüale ma kesunchi; Apvüwa na anyunutithu khweti-jenka sha pi ma cüaben. Apvüwa na Sira wi khi,

² “Hi ketanla nlen kiden cüaden, ayikha nu yyishiphon thu papi tijü thsüaden . Hi lezza khweti jenka tsü pakhhi, nu amighe pi ma khonghonthu tsü whengshiaben .

³ Hi kejang kekuthi pen wina keben pi no cüaben; isalethu no hi Apvüwa le kesa, nu Israel Nyiza na n-nyan teng nu no ciyale kesa chü yaben.

⁴ Hi imagha Israel kiqa cü thsüle no kessichi, hi kessi keya nyithu tsü. Hi kenyuwakü keti pi no cütheng, no hi nchü lela.

⁵ ‘Hi Apvüwa, acenpvü kepa wi nmi. No kezü nsenthu keyishü pi no cüden, no hi nchü lela.

⁶ Hi ha saaben, isanu ayyi ccügwen kesü wina wa kepawa kecu, Apvüwa nu acenpvü hi khe kepa wi nmile kesa chüya thsüle kesalina.

⁷ Hi kethang nu kejang sachi; hi kesawegü nu kededi sengho. Hi Apvüwa, hi hathu tsüdi saaden.

⁸ Hi tang wina khangkeya atsankegho ti kesun chiden; nu ayyiwa na tsü tsenya, nu kekhen nkemi nu jühtsentsa sen nu pvü ben. Hi Apvüwa, hi ha sa thsü den.’ ”

Sahangkechi nu Ayyicüki Pvüwa

⁹ Ayyipfü kesü kepathu ti kesawa tsüna ma kezhüwa ssinu keccücanliya kemehai ben kwe? Anisha na apfükezhüwa wi ma mangwa saben khe keü ten kwe? Apfüwa na ma kezhüwa na nzhü chüle kesa leben-nkaghajüh khiya mehai kwe?

¹⁰ Anyi kesü na ma bajja wi hati khiten kwe? “Nshinyi mangkesa na hi pvügha pi hati sa thsü ben nu?”

¹¹ Apvüwa Israel Nyiza kemethawa, atuwi ghaketen sa kechiwa na khiben; “Nthu na itsangathu ghena hi keüya kemehai kemeshon nmi. nyelela hi mangwa kesau khe pi hi kizaya nben!

¹² Ayyi sakechiwa tsüna hi, nu ciwi hang thsüle kesa ghena anyi sahangkechiwa tsüna hi le. Hi kekhang wina atssanthu zankechuchi; hi aghani, asha, nu ghotsithu pi hi kemeshen saden.

¹³ Hi ketanla Sira kechüchi pi kuli thsü, hi sale kebenthu tsü sati yathsü le kesalina. Hi ma waketen len tsüdila satemeshon chiden. Ma inyunutiwa Jerusalem tsü sapfüden, nu inyi atssüzüsa kebenthu tsü lishü chiaben . Thola ma melli nyelela aju pi ma cü nu ha nsa thsü. Apvüwa Kekhang ntsawa na khichidha.

¹⁴ Apvüwa na Israel wi khi, ‘Ejipt nu Sudan keben-keyeng na iji saden, nu Seba nyi kesiethu tsüna nthu nssümagha saaden; amighe ssüli pi mathu hu sen nu nthu nieden. Mathu na nthu tuwi kukedu khishüben, “Anyiza na nthu ssiden, ma ketan Anyiza le.

¹⁵ Israel Nyiza, ma nyi hangshaya ketenwa, ma ketanla ma pi kuthi keten Nyiza kesü.

¹⁶ Atsikezhü cü ketenthu tsüdila kejügheya; nu mathu tsüdila keminni yaden.

¹⁷ Isalela Israel tsü Apvüwa na ma hangshayadha, nu khangkeya pi ma kecü tsüna anuphan ben den; ma nyithu na mangla sa nu kimenniya nben.’ ”

¹⁸ Apvüwa na atssanthu sachi, Anyiza tsü na ma le! Ma ayyi zhü nu tsü sachi, ma tsü sapi zü nu kesie benya kemehai sa. ma tsü sapi kiyisha nu kededi ji nsa, isala pi anyithu kahang pen kesü sachi. Tsüwa na khi, ‘Hi Apvüwa, nu acenpvü kepa wi nmi.

¹⁹ Hi kekuthi wi ajühkhi ntheng, nyelela hi sale kebenwa tsüpi nkuthi. Hi Israel nyi ya kiyisha yyi wi hi bhalo nkhi. Hi Apvüwa, nu hi atsentsawa khiden; hi kemeshonwa tsüpi chü thsüden.’ ”

Ayyi miwi Apvüwa nu Babilon wi tsikezhüthu

²⁰ Apvüwa na khiben, “Saghu nu gholo, mizzatenti nyithu, kadipen keqanca wi hang keyathu tsüdi; nthu jüh kaghaten le kesa ghena gholo! Anyithu na achan pi tsikezhü kesa sengho saghu, nu mathu hangshaya nketen cenpvüthu wi kekhiesa ketenthu, anyi tsüthu tsüna mangla nchütha!

²¹ Gho nu nthu kaghatenjüh pi jüh kaghaten wi chilo; sheikepithu ya khokho keccünengli nan thsülo. Thowa na npi wina sagho keten tsü khichi nu? Tsüna hi, Apvüwa Anyiza, ma nyithu hangsha ketenwa tsü nye kwe? Acenpvü kepa wi nmi.

²² ‘Khili hi wi kheneng gho hangsha yalo, ayyi tsüdi wi anyithu! Anyiza na benle kesa tsüna hi ketan.

²³ Hi khishikechi tsüna atsentsa, nu tsüna kemiliya nben. Hi kishen nu khishi theng: Anyi tsüdila ituwi gho nu akhutsüben, nu ijühkina le khi kishenben.

²⁴ “Mathu na imiwi ketan khangkeya, nu kezü muya benle khiden; isala hi nanmeghü ketenthu tsüdila kejüghe yaben.

²⁵ Hi Apvüwa, Jakob shicü tsüdila kikasha yaden, nu mathu na keseng pi hi cüden.”