ISAYA 43 - Kemethajüh (N) (Re-editing) Bible (BSI)

Anyiza na Ma nyithu kikashayale Khishikechi

¹ Israel, nthu sahangkechi Apvüwa na khiben, “Nmessila, hi nthu hangsha yaden. Hi nthu nyan teng nu nthu ciya, nthu na iji.

² Nthu na atssükedhu pvüdhiwa lela hi nthu ssiden; nthu gükeccü tsüna nthu ghongshaya nben. Nthu na anni pvüdhi wa lela nthu mecangya nben; nthu metenkinan kedhu na gho lela tsüna nthu patenaya nben.

³ Kepaghenanye hi Apvüwa nthu Nyiza, Israel Nyiza kemethawa, nthu hangshaya ketenwa tsüle. Hi nthu lishachi cüle kesalina Ejipt teshiaben; hi Sudan nu Seba teshiaben .

⁴ Hi nthu kahang hangshale kesalina mizzatenti tsüdi teshiaben, kepaghenanye nthu na ituwi ma men dhu, nu hi nthu ghali, nu kenyuwakü pi nthu cüden.

⁵ Nmessila, hi nthu ssiden! ‘Nishu len temeja nu nidu len kesie ntsa wina, hi n-nyithu ssinu ghoaden.

⁶ Hi mathu teshichilo aghawa kiza, nu acülawa mathu nkhen lalo kizaden. Inyithu ya alen kesie wina kheneng gho thsülo, ayyi ccügwen tsüdi wina.

⁷ Mathu na inyile, nu mathu ya inyankethang sengho hi cülo sachi.’ ”

Israel na Apvüwa Chüzawa

⁸ Anyiza na khi, “Inyithu cipi ajüh kaghatenpen wi chilo. Mathu na anyon ben lela nmu; mathu na akhuna ben lela kedecu le!

⁹ Mizzatentithu cipi ghankenan wi chilo. Mathu cenpvü khawa na tucüki khiya mehai nu? Tsü jawi khawa na khili sakeben ha khipi theng nu? Cenpvü hathu ya mathu chüza sengho thsülo, mathu kemeshon chüti, nu mathu jüh na atsentsale khi thsü nanlo.

¹⁰ ‘Israel nyithu, nthu na hi chüzathu le; hi nthu pi imagha sa thsüle kessiya, isanu nthu hi chüya nu hi nondiya, nu Anyiza tsüna hi ketanle kesa chüshiya thsüle kesalina. Imiwi acenpvü kepa wi nmi; hatu wi lela ben ngho nu haseng wi lela ben nben.

¹¹ “Hi ketan Apvüwa, hi ketan nthu hangshaya ketenwa tsüle.

¹² Hi mangwa saten khe npi wi khipi theng, nu hi nthu kiqale gho. Asang cenpvü thola ha nsachi; nthu na hi chüzathu le.

¹³ Hi Anyiza nu keshüthangla ben waden. Thola hi kekhang wina ghü bvüya nben; Thola hi sa ketenwa tsü kemiliya nben.”

Babilon wina ghü bvükeya

¹⁴ Israel Nyiza kemethawa, Apvüwa nthu hangshaya ketenwa na khiben, “Nthu hangshaya le kesalina hi süpahizi kesun pi Babilon ssikaghashen thsü; hi anyunuti khwetithu pakhhi, nu mathu kejisha tsüpi kiqai sa cüden.

¹⁵ Hi Apvüwa, nthu Nyiza kemethawa. Hi nthu sahangchile, Israel, nu hi nthu kadimiwa.”

¹⁶ Kheni Apvüwa na atssükedone wi, atssükevüli keben non wi alen sa.

¹⁷ Ma süpahizi keti ssi wa dedi thsüa, aghigari nu goru kessi süpahizi. Mathu na qanca nu nshagha nengla, mathu na qanca sen nu anni keqhe khala ti bvüa.

¹⁸ Isala Apvüwa na khi, “Wakea tsüwa tsü meshen nbenla, nu kheni wakesa miwi ngan nbenla.

¹⁹ Hi pala ketheü kulile kebenwa ghangya. Tsüna kuli bendha, nthu na khili muya mehai! Hi aghansha wi alen saaden, nu ciwi aghakutssü na lle pi nthu cüden.

²⁰ Aghangsathu lela hi nyuwaküben; whewhe nu awaketiwa lela hi sengben, hi ayyikeshü wi aghakutssü lle pi hi kessikeya nyi kecü wi.

²¹ Tsüthu tsüna hi ketanla ighena sakeyathu, nu mathu na hi keseng khwithu saaben!”

Israel Kesami

²² Apvüwa na khiben, “Isala Israel, no ighena nlidhamang wadha; no hi nkinyi la.

²³ No khaghaneni mecang pi kinyi keten sengho hi ncü; no kekinyi khukechi pi hi nkinyi. Hi pala khukechi khie pi nkhhi nkiyan thsü, nu hankedemvu khie pi nlikedhamang nsa thsü.

²⁴ No ighena ahankedemvu nshei nu nsa kethu pi ileben kagha la sa ncü. Tsüti kesawa nyela no kesami sapi ikhhi kekiyan sa; nu kesazzi pi ilikesaghang sa cü.

²⁵ Isala hi Anyiza, no kesami teshi pi cü ketenwa tsü, hi tsüna hi, tsalina hi tsüti saaden. Hi no kesami pi no matang ntendha.

²⁶ ‘Ithu na ajüh kekaghatenpen wi wa na; nthu nyu kethengjüh sengholo! Kaghatenjüh sengho nu nthu na meshon benle kesa chüti khichilo!

²⁷ Nthu bamyi atu ntsawa na samia; nthu ccülikesathu na sami pi hi matang,

²⁸ nu nthu kekhang kesenthu na hi kemethajjen tsü nakhi.’ Tsalina hi kededi sengho Israel miwi chia; hi inyithu yala kimenni thsüa.”