ISAYA 41 - Kemethajüh (N) (Re-editing) Bible (BSI)

Anyiza na Israel nyithu ya Chütikeyathsü

¹ Anyiza na khi, “Ccen ben nu ijüh kinalo, nthu ayyi temeja wi kebenthu! Kaghatenjüh pi ajüh kaghatenpen wi chile kiden yalo; nthu na ajühkhiya kemehai tsü ben yaben. Ithu na gho saghu nu thowa na meshon khe südheya na.

² ‘Nishu wi khangkeyawa ssigho nu ma khiewi wa khe ma pi khangya thsü ketenwa tsüna thowa nu? Thowa na kadimi nu mizzatentithu miwi khangkeya pi ma cü nu? Ma njünnu na mathu pi ayyinikhu ti ceng waben. Ma lakusü na mathu gazighe pi ameghü tuwi amatsi ti saaben.

³ Ma jügü sen nu apvü-nsala wa yaden, mbhi ntsa pi ma ccü na ayyi kidhen nkeben ti!

⁴ Hati sa keya thsüwa tsüna thowa nu? Thowa na ayyi kahang cüki kezhü ha kidenchi nu? Hi Apvüwa, adechhü wina den, nu hi Apvüwa Anyiza, asakhen wila ben den.

⁵ “Ayyi temeja wi kebenthu na hi mangwa sachi khe mudha; mathu na qhethi nu messila kedheggü. Tsalina mathu tsüdila saghu nu gho.

⁶ Kepachünyi na khokho kiqa nu sa ketezüli.

⁷ Achan kecüwa na suna kecüwa kiza, ‘Mehaitsü sayadha!’ Tsikezhü chengche cü ketenwa na tsü jetenghu ketenwa sa tezüden. Mathu na khi, ‘Mehaitsü zentenyadha’ — nu tsü pen wi kejetenji pi tsikezhü jeten den.

⁸ ‘Isala imaghawa Israel, hi kessikeya nyithu tsü na nthu, ipvüshangwa Abraham shicübvüghathu.

⁹ Hi ayyi kenten wina nthu ssigho; hi accügwen kesie ntsa wina nthu ciya, nu nthu wi kiza, “Nthu imagha le.” Hi nthu meya mvula nsa, isala nthu ssi.

¹⁰ Nmessi lalo, hi nthu ssiden! Hi nthu Nyiza, mangla nthu npateqhe thsüla! Hi nthu sapi zü cü nu nthu kiqaden; Hi nthu khwe nu nthu hangsha yaden.

¹¹ “Nthu miwi aghepvü ketenthu na nyu nchala kejüghekeya tsü chüyaben. Nthu ssikesali ketenthu na shüaben,

¹² nu ayyi wina nmula ben.

¹³ Hi Apvüwa, nthu Nyiza; Hi nthu satezü nu khiben, ‘Nmessila, hi nthu kiqaden.’ ”

¹⁴ Apvüwa na khi, “Israel, nthu na zza nu nkhang lela, nmessila, hi nthu kiqaden. Hi Israel Nyiza kemethawa, nthu hangsha cü ketenwa tsü.

¹⁵ Hi nthu pi kekihhechan kesü ti sa cüden, ma yha ketheü nu dighezen kesa. Nthu na ayikhathu kihhe nu tsüthu yasaden; Ayyishiphon thu pacha pi ayyinikhu saaden.

¹⁶ Nthu na tsüthu kewheng nu ameghü na tsüthu mo pi bvüaden, nu caghamo na gho tsüthu mo zigheaden. Tsaseng wi hi nthu Nyiza kesalina nthu nonghe yaden; nthu na Israel Nyiza kemethawa hi seng waben.

¹⁷ ‘Inyithu na mathu nsenthu keyishü ghena atssü bha, dighe pi mathu giyan qhayi sa nu gho lethu, hi Apvüwa, mathu kekhie luneng chiden; hi Israel Nyiza, hi mathu yisha nben.

¹⁸ Hi yyishiphon shangshang kesa wi aghakutssü lle thsüden, nu ayyiketijü wi atssü bvü thsüden. Hi yyikeshü kemili pi atssü cücheng keben sa thsüa, nu ayyi keqha pi atssü kebvüpen sa thsüaden .

¹⁹ Hi sedar chan ya ayyikeshü wi shigü, akakia, martle, nu oliv tonthu la. Ayyi shangshang kesa wi ayinong sa thsü, asahong, juniper, nu sipress chan ja sa thsüaden .

²⁰ Anyi na tsü mu theng nu hi Apvüwa na tsü sachile kesa chü yaben. Mathu na Israel Nyiza kemethawa na tsü sapi benya thsüle kesa chüshi yaben.’ ”

Apvüwa na Milikemesa cenpvü nnikesa

²¹ Apvüwa, Israel kadimiwa na ha khile saben: “Mizzatentithu cenpvüthu, kaghatenjüh sengho chilo. Nthu kecücanli jüh kemehai ntsa sengholo!

²² Gho nu mangwa na saghoben khe khi nanlo, tsü sacen kegho wi ithu na chüyale kesalina. Ajüh kekaghatenpen wi wa kesa cüki khimetha chilo, nu tsüthu jjügi na mangwa khe pi ithu kizalo.

²³ Atuwi khatiti kesa na ben khe pi ithu kizalo, isalethu ithu na nthu na acenpvü le kesa chü yaben! Pala kemehai pahan nyelela agükeccü sengho nanlo; kemessi nu qhethiketen pi ithu pong nanlo!

²⁴ Nthu nu nthu kekuli tsüdila mangla nye; nthu na kinyi ketenthu tsüna nankiqanan le!

²⁵ ‘Hi nishuwa hang keten nyi kesü kessi yadha; hi ma yala aghawa na ssikesali gho thsüden. Ma kekhang kesenthu pi anisha ti cüten, nu apfükezhüwa na anisha ponkeben ti sa cüden.

²⁶ Nthu thowa na npi wina ha saben le khichi, isanu ithu ya nthu khiti yadha le kesa khiya kemehai saya nu? Nthu thola tsüghena ajüh kesüla nkhi; thola nthu na tsü khile kesa nza!

²⁷ Jühtheü tsüpi Zion wi kiza tegüwa tsüna Apvüwa, hi; Hi nyilo kesü kesun pi Jerusalem wi chi nu khi, “N-nyithu na gho tendha! Mathu na ajjen wi gho tendha!”

²⁸ Hi acenpvüthu jawi ghang kechi wi mathu thola mangla kekhi nmi; kesütanla hi pi keü kechi jüh tsü luneng meya.

²⁹ Acenpvü hathu ha tsüdila mangla nye; mathu mangla saya nben, tsikezhü hathu hana nzü nu nkhang.’ ”