ISAYA 40 - Kemethajüh (N) (Re-editing) Bible (BSI)

Kaghangkeben Ketsijüh

¹ Ithu Nyiza na khiben, “Inyithu leben satecca cülo, Mathu leben satecca cülo!

² Jerusalem wi kahang nyi leben satezü cülo. Mathu na kesiela ketizenkesa qo sagho, nu khili mathu kesami teshi pi cüdha le kizalo. Hi mathu kesami tsüdi ghena kemeten pi cü cendha.”

³ Ahhai kesü na jishaben, “Aghansha wi Apvüwa ghena alen kesü kiden yalo! Ithu Nyiza ghena ayyikeshü wi alen sametha chilo!

⁴ Ayyiketijü tsüdi sapi misi chi; ayikha tsüdila satemeni chilo. Ayyishiphon thu na deshentijü sa, nu ayyi ghagu-ghana kesa pi chengche saaben.

⁵ Tsaseng wi Apvüwa nyankethang pi ccücaden, nu anyi tsüdila tsü muden. Apvüwa na ma ketanla ha khishichidha.”

⁶ Ahhai kesü na hati jishaben, “Ketsijüh kesü pi thangchilo!” “Hi mangwa ketsijüh pi thangchi nu?” kesa hi keü. “Thangchilo, anyi kahang tsüdila aghang ti; mathu kahang na aghang thighithu miwi sieki nsa.

⁷ Aghang na waweng nu athighi na jü waden, Apvüwa na ameghü kesun pi mathu miwi kechi wi. Anyi na aghang miwi kesie hang nden.

⁸ Anle, aghang na waweng nu athighi na jü waden, isala ithu Nyiza jühwa tsü anuphanla ben den.

⁹ Jerusalem, ayikha kemisi kesü miwi kilo, nu ajühkemehaiwa pi thangchilo! Ahhai misikhhali nu jishachilo, Zion; ajühkemehaiwa pi thangchilo! Nmessi la khishi chilo. Judah nyutithu wi mathu Nyiza na gho tendha le kizalo!

¹⁰ Kemisintsawa Apvüwa na kekhang sen nu kadi sale ghoden, ma hangshakeya nyi ssinu ma gweghe ghoden.

¹¹ Ma anenikehie kesü ti ma nenithu noncca yaden; ma khaghaneni zzathu ku pi saghuya, nu ma kwen pi tsüthu pie yaden; ma cca nu mathu bvüthu tsü ssiden.”

Pi Israel Nyizawa ghape nkeya

¹² Anyi kesüla akwen wi atssükedone ketegüya nyelela ma kwen pi atssan ketegüya mehai kwe? Anyi kesüla ayyi maben ya pi ahyi kesü wi chiya, nyelela ayikha nu yyishiphon thu pi kuwhuchan wi whuya mehai kwe?

¹³ Anyi kesüla Apvüwa na mangwa nsathu yishü khe ma kizaya mehai kwe? Thowa na ma sansi nyelela ajüh pi ma kizaya mehai nu?

¹⁴ Anyiza na chüya, meshenshiya, nu khatinu khati kekuli-u khe chüyale kesa thowa ssinu kecenkinali nu?

¹⁵ Apvüwa tuwi mizzatentithu na mangla nye, atssü kejüca kesü miwi nji; kelensie wi atssümangkehithu tsüna ayyinikhu ti mbhisi.

¹⁶ Lebanon yinong wi aghangsa tsüdi lela pi Anyiza kekinyi nsa qo, nu ciwi achan tonthu lela pi annisa le kesa zeng mtsü.

¹⁷ Mizzatentithu na ma tuwi mangla nyetha.

¹⁸ Anyiza pi thowa ghape chi nu? No khatinu ma mangwa ti kesa khe khiya mehai nu?

¹⁹ Ma kekuli nyi na atsikezhü kesü sa, nu amighe kecüthu na suna pi tsü meju, nu rükatssü pi kesa kedonpen miwi don keten tsüti nye.

²⁰ Rükatssü nyelela suna nkeshüchathu na mme nketen chan kessi yaden. Ma kecüchü nyi bha pi qanca nkeya tsikezhü tsü cüden.

²¹ Nthu na nchü kwe? Matsü kesie wa kesa wi nthu kiza nsa kwe? Ayyi na khatinu sa shhugho khe nthu na za meya kwe?

²² Tsüwa tsüna ma kadipen atssan nu ayyi miwi tsü ben, nu anyithu na atsawethu ketizü ti mu keten pen wi donki kebenwa na sa chile. Ma atssan zankechu pi keshondhithsü ti, nu ma non wi hang keten nithsüjjen ti sachi.

²³ Ma kedi kekhangthu zansha, nu pasha pi mangla nkenye saaden.

²⁴ Mathu na aghanglani kaghani ti shigü shagha ma ghazan cha mele ketan. Apvüwa na ameghü kesunchi lethu, tsüthu na jü wa nu amatsi ti mo pi bvüden.

²⁵ Thowa pi Anyiza ghapeya mehai nu? Ciwi ma ti kesa kesüla ben kwe?

²⁶ Atssan wi ghangchi nanlo! Thowa na nthu na mukeben ghotsithu tsü sachi nu? Süpahizi kesü ti mathu ssishu ketenwa, ma tsüthu tsüna khaju ben khe chü, nu kesüsü nyan ciden! Ma kekhang na di ntsawa — tsüthu kesütanla bhatagha nden!

²⁷ Israel, isalethu nthu mangkesa na Apvüwa na nthu gükeccü nchü, nyelela nthu na ketizen nkesau wi sa lela nthu n-nanchile khiten nu?

²⁸ Nthu nchü kwe? Nthu za meya kwe? Apvüwa na anuphanla benketen Nyiza; ma ayyi tsüdila sachi. Ma agüccü nyelela nchala sa wa nten. Thola ma kemeshen chüshiya nben.

²⁹ Ma nkekhang nu agüccü kebenthu satezü cüden.

³⁰ Acalithu lela nkhangladen; acalithu lela nchala qancaden.

³¹ Isala Apvüwa wi kiqa kecü nondi ketenthu na mathu kezü satezü pfüyaben. Mathu na agisha pvü nu amumu ti pighe kiaben; mathu na bvü lela agüccü nben; nu mathu na alentsen lela nkhangla sa nben.