ISAYA 38 - Kemethajüh (N) (Re-editing) Bible (BSI)

Kadimi Hezekiya na naa nu Mehaikeya

¹ Tsü tsüwi Kadimi Hezekiya na naa pi shüa keten ti sa wa. Amoz tsawa atusenjüh-kechüwa Isa na ma ghangchile wa nu ma wi khi, “Apvüwa na no pala tsüdila zankizanla pi thengyalo no kizaben, kepaghenanye no mehaiya nbendha na. Shü wale kesa ghena kiden yalo.”

² Hezekiya na ajjen-keshonwa khapeghe wa nu khie,

³ “Apvüwa, hi ajühkeya nu ajühtsentsa wi no kekuli sa, nu hi keshüthangla no hi ya mangwa sa thsü mvuben khe sale kiden le.” Isanu ma qai ntsa sa wa.

⁴ Tsaseng wi Apvüwa na ahza pi Isa cü nu

⁵ Hezekiya wi wa neng nu ma wi khi thsü, “Hi Apvüwa, nbaqhai David Nyiza na no kekhie zaya nu no kiqai tsü mudha; hi no ya amapi tagha nu manga hang nengya thsüden.

⁶ Hi Assiriya kadimiwa kwen wina no nu Jerusalem nyunuti hawa ha kikasha cüaden, nu hi anyunutiwa tsü khweki benden.”

⁷ Isa na khi neng, “Apvüwa na ma khishi ketheng tsü nieden kesa chüshiya kemehai zensu kesü pi no cüden.

⁸ Kadimi Ahaz na sa ketheng ajjensha tangwa kekilen wi Apvüwa na akekhwenwa tsü sapi acükhaku tagha aseng wa neng thsüaden .” Nu aghayenwa tsüna acükhaku tagha aseng wa neng.

⁹ Hezekiya na ma kinaa wi mehai neng keya sengwi keseng khwi ha zhüchi:

¹⁰ Hi acalihi jüwi shüa tendhale kesa meshen nu keshü yyi wi wa keten, hang wa meyadhashe sa keben.

¹¹ Hi kemeshen tsü kahang yyi hawa wi hi khiela Apvüwa nmu nengdha, nyelela kahang nyi kesüla nmudha le sa keben.

¹² Hi kahang khuya nu kenten sa thsüa, anithsüjjen khusha kesa ti, ada de keben handhi kesa ti, hi kemeshen tsü Anyiza na hi kahang sakhen sa thsüdhale sa keben.

¹³ Aghaja thangthang hi kinaa pvü nu qai, ssenssitemi na igü nkükhhi keben ti sa, hi kemeshen tsü Anyiza na hi kahang sakhen sa thsüdha le sa keben.

¹⁴ Ihhai na n-nite nu nkhangla, Nu hi nkhetsü kekhou ti ghadhi wa. Tangwi ghang pi inyon na nküchala. Apvüwa, agükeccü ha tsüdi wi hi kikasha cülo.

¹⁵ Hi mangwa le khiya mehai nu? Apvüwa na ha sachidha. Ileben güccü mtsü nu hi jenya ntendha.

¹⁶ Apvüwa, hi nghena nu nghena ketan hangtenle. Hi sapi mehai cü nu hi ya hangya thsülo.

¹⁷ Ileben güccü kemili pi kecca saaden. no kemessi tsüdi wi hi kahang hangsha cü; no hi kesami tsüdi teshi cüden.

¹⁸ Anyi thola keshü yyi wi no sengya nben; keshüthu na njühtsentsa kesawa tsü nondiya nben.

¹⁹ Hang kebenthu na no sengden, hi khili no seng keben ti. Abathu na atsangathu wi no khatila jühtsentsa saten khe pi kizaden.

²⁰ Apvüwa, no hi sapi mehai cüdha. Ithu na harp khou pi no keseng khwi saaden, ithu na hangkeben chu no Kekinyijjen wi no keseng khwi saaden.

²¹ Isa na kadimiwa wi khhaghabvü pacha pi avünen miwi tsü dayathu ma mehainengya benle kiza.

²² Tsaseng wi Kadimi Hezekiya na keü, “Hi Kekinyijjen wi waya benle kesa azensu mangwa chüya mehai nu?”