ISAYA 36 - Kemethajüh (N) (Re-editing) Bible (BSI)

Assiriya nyi na Jerusalem Pateqhekesa

¹ Hezekiya na Judah Kadimiwa sakeya amapi tagha nu mejü wi Assiriya Kadimiwa Sennakherib na Judah khwetivü ketheng nyunutithu ssikaghashen nu tsüthu yaya,

² Tsaseng wi ma ma kekhu wi benchüwa ya süpahizi kezü kejon ssinu Lakhish wina Jerusalem wi shu Kadimiwa Hezekiya ya ma kwen wi dugholo kiza thsü. Kedi tsüwa na aghajü meiwa na atssülen hhisen gho keben, athsü kedethu na kuli keten len wi tsü benya.

³ Judah nyi meshu kecheng na ma metu le shhugho; kadijjen kehie kediwa Hilkiya tsa Eliakim; kadipen wi kezhüwa Shebna; nu zhüketheng kenonccathu miwi kediwa Asaf tsa Joah.

⁴ Assiriya nyi kediwa na mathu wi Kadimiwa na Hezekiya na mangwa ghena ma leben-jjan ben khe chüya mvu ben le kiza.

⁵ Ma keüchi, “No kemeshen tsü ajüh tsüthu tsüna süpahizi ghikesachü nu kekhang mithon saya mehai le ben kwe? No kemeshen tsü thowa na no kiqa pi Assiriya matangya mehai le ben nu?

⁶ No na Ejipt na no kekiqa ghangben, isala tsüna ahuphon kesü pi akhhatssü sa nu tsü pacha pi nkwen hanya keten ti saaben. Ejipt kadimiwa na anyi kesü le kesü lela ma nondi ketenwa miwi tsüti saden.”

⁷ Assiriya nyi kediwa na khineng, “Ala, no Apvüwa n-Nyiza nondi benle hi kiza ten nu? Hezekiya na Judah nu Jerusalem nyithu na kekinyipen kesütan, Apvüwa kekinyipen witsü kinyilo kiza nu kepathu yasa.

⁸ Hi kadimiwa nyan wina no ssinu keshüshenli ben. No anyi kejon muyaben lethu hi goru hazar keni pi no cüden.

⁹ No Assiriya nyi kedithu jawi kizza ntsawa lela chaya nben, isala no Ejipt nyi yala gorugari nu tsüthu ssiketen süpahithu kesun pi no kecü ghang ben.

¹⁰ No kemeshen tsü hi Apvüwa kekiqa nsenla no diyyi ssikaghashen nu tsü yasa le ben kwe? Apvüwa na ma ketanla hi kizala tsü ssikaghashen nu yasalo kizadha.”

¹¹ Isanu Eliakim, Shebna, nu Joah, mathu na kadiwa wi khi, “Aramaik jüh wina ikhang kizalo. Ikhang na tsü chüben na. Ibri jüh nkhila; akhweti miwi kebenthu tsüdila kina ben na.”

¹² Ma lunengchi, “Nthu kemeshen tsü kadimiwa na ajüh hathu ha khilo hi kesun kechi ha no kecheng nu kadimiwa ketan she benla? Nye. Hi akhweti mei donki keben anyithu, nthu ti mathu keku dsa nu akejun jjü ketenthu la ccüneng ben le.”

¹³ Isatheng nu kediwa na Ibri jüh wina jisha nu khi, “Assiriya kadimiwa na nthu kiza keben ha kinachilo.

¹⁴ Ma Hezekiya yala nthu nmechu thsü lalo nthu kitsan chiben. Hezekiya na nthu hangshaya nben.

¹⁵ Tsalina ma ya nthu ju pi Apvüwa n-nondi thsü lalo. Apvüwa na nthu hangshaya nu Assiriya süpahizi ya nthu nyunuti yameya thsüla ben le nmeshen lalo.

¹⁶ Hezekiya jüh nkinala! Assiriya kadimiwa na nthu ya anyunuti wina shhugho nu ma kwen wi dugholo khiben. Nthu tsüdila yala nthu kemeshentsse ton nu khhaghabvü ton wi ma bi dsaya thsüben, nu nthu ketanla nthu tssükhang wi atssü jjü thsü ben na.

¹⁷ Kadimiwa na nthu ssisen wa nthu yyi ti kesa, kemeshentsse lli wi kisengtssü muya, nu asu pi amesa saya keten lli wi npi wa keya chu tsüti saaden.

¹⁸ Hezekiya yala Apvüwa na nthu kikasha cü benle meshen keben tsü khi pi nthu nmechu thsü lalo. Mizzatenti kepathu cenpvü kesüla Assiriya kadimiwa kwen wina mathu diyyithu hangsha cü kwe?

¹⁹ Hamath nu Arpad cenpvü na khili khiewa ben nu? Sefarvaim cenpvüthu na khiewa ben nu? Kesüla Samaria hangshaya kwe?

²⁰ Diyyi hathu cenpvü na khathansha wi Assiriya kadimiwa kwen wina mathu diyyithu hangshaya nu? Isalethu, mangwa na nthu ya Apvüwa na Jerusalem hangshaya benle meshen thsü ben nu?”

²¹ Anyithu na Kadimiwa Hezekiya na mathu kekiza ti ccen ben wa; mathu na ajüh kesüla nkhi.

²² Tsaseng wi Eliakim, Shebna, nu Joah, mathu na mathu leben güccü nu athsümeni mezüqhe nu Assiriya nyi kediwa na kekhi jüh tsüpi Kadimiwa kizale wa.