ISAYA 34 - Kemethajüh (N) (Re-editing) Bible (BSI)

Anyiza na Kemeten pi Ma ghinyithu cüketen

¹ Ghalo, mizzatenti tsüdi wi anyithu! Ghola vü nu kinayalo. Ayyi maben wi hang kebenthu tsüdila hewi gho nu kinaya thsülo.

² Apvüwa na mizzatenti nu mathu süpahizi tsüdi miwi ma ghepvüben. Ma mathu dedi thsüale meshensadha.

³ Mathu kamang pi vhü nben isala amei wi ben nu bighe pi hansa ben; nu ayikhathu wi ajjü na pong pi nmieni saaben.

⁴ Aghani, asha, nu ghotsithu na kecencha pi ayyinikhu saaben. atssan na kezhüllu ti llusen nu bvüaben, nu ghotsithu na kemeshentsse ton nyelela khhaghabvü ton wi ma wa kekishu ti qancaben.

⁵ Apvüwa na tang wi ma njünnu kiden pi theng, nu tsüna ma dedi thsüale meshensa kethengwa Edom nyi miwi ghoaden.

⁶ Ma njünnuwa tsüna khaghaneni zza nu aneni jjü pi kekinyi kesa jjü nu kethu ti mathu jjü nu kethu pi pong yaben. Apvüwa kekinyi hawa ha pi Bozra nyunutiwa cüaden; ma Edom yyi wi anyi pathi ntsa kesa ha sachiben.

⁷ Anyithu na hadasi nu amesü süpon cahli ti khuliaben, nu ayyiwa na ajjü nu asakethu pi pong ben.

⁸ Matsü hawa ha Apvüwa na Zion kikasha keya nu ma ghinyi miwi jukhi keyawa tsü.

⁹ Edom wi aghakuthu tssü na anie ceng, nu ayyi na awegüsalon ceng waben. Diyyiwa mabenla anie ti mecang ben.

¹⁰ Tsüna ghaja ghanan mecang benden, nu ciwi annikekhu na anuphanla khu benden. Abvüye bvüye wila ayyiwa tsü ncala nu thola ciwi pvüdhi nwala ben.

¹¹ Accüpvü nu aduwwethu na ayyiwa tsü pong shaben. Ayyi npi sa kechi wi ti Apvüwa na tsü teshi pi ghacang thsüaben.

¹² Kadimi kesüla diyyiwa tsü kesen nmila ben, nu accüli kesathu nmila ben.

¹³ Aghazü nu assensüthu na kadijjen tsüdi nu khwetivü- ketheng nyuti tsüdila shigübhon nu whewhe nu accüpvüthu na ciwi hang waben.

¹⁴ Aghangsathu na ciwi kegoe nu atsaghangthu na khokho keciliben. Aghaja ghassübvüthu la ciwi keben pen bha ghoben.

¹⁵ Accüpvüthu na aghacen ghü, ghatsü, ghong, nu ciwi ma zza khushiben. Akamang kemcü mumuthu na ciwi saghu benden.

¹⁶ Apvüwa lesüshen wi hang keben aghangsathu cüki ma jjügi na mangwa khe bha nu si nanlo. Hathu kesüla nkemu sa nben, nu kesütanla ma kegweghewa nkemi sa nben. Apvüwa na tsüti salo khichidha; ma ketanla tsüthu ssighoben.

¹⁷ Mathu jawi ayyi gishü pi cü nu tsüdila ashei kesüsü muya thsü ketenwa tsüna Apvüwa le. Mathu na ayyi tsüwa wi abvüye bvüye hang waben, nu tsüna anuphanla mathu ji saaben.