ISAYA 33 - Kemethajüh (N) (Re-editing) Bible (BSI)

Kekiqa Kekhie

¹ Ithu ghinyithu na dedi tendha! Thola mathu ji npeghe nyelela mathu nmatsa lela mathu na nyu ji peghe nu nyu matsadha. Isala mathu na nyu ji peghe nu nyu matsa keten tsüna asakhen sathu, nyu na mathu ji peghe nu mathu matsaden.

² Apvüwa, ithu nantizen cülo. Ithu na ithu kaghang pi nmiwi chidha. Ghanan kaghapen wi la ithu khweya nu ketizenkesa tsü wi ithu hangsha cülo.

³ No ithu ghena aghikesa wi mizzatentithu na aghikesa hhai tubvüden.

⁴ Mathu tsanqai miwi benki kegho nu shupvü bvüaden .

⁵ Apvüwa na khatila di nu! Ma pala tsüdi miwi kekhang senden. Ma kemeshon nu mehaicu kesa pi Jerusalem pong cü,

⁶ nu khangzü kesa pi mizzatentiwa cüaden . Ma keshüthangla ma nyithu khwe, nu kemetsa nu palakechü pi cüden. Mathu keben-keyeng ntsawa na mathu na Apvüwa kinyikü ketenwa tsü.

⁷ Kempvüza nyithu na kekiqa khiben. Mithonthu kecca sengho le ketenthu na sashü na qaiben.

⁸ Alentonti wi kemessi na ben ntsa sa nu thola ciwi nwaladha. Keponghuthu pakhhi nu cenkethenjüh la bheghedha. Thola nyu nyuwakekü nmidha.

⁹ Ayyiwa na nchala teshidha. Lebanon yinong na jüwa, Sharon Yyiketijü kemehaiwa tsüna ayyikeshü ti sa, nu Bashan nu Karmel Yikha wi aghangwa na keshu bendha.

Apvüwa na Ma ghinyithu kitsankechi

¹⁰ Apvüwa na mizzatentithu wi khi, “Hi kulile bendha. Hi khati khang khe pi nyu ccücaden.

¹¹ Nthu na ma men nkemi cho kidenden, nu nthu na kuliketen tsüdila mangla nye. Ighamu na anni ti nthu yasa cüben.

¹² Nthu pacha pi alon kemecang yyiwen kemiki, nu aghazü mecang pi makhala sa keten tsüti saaden.

¹³ Akete nu kelensie wi kebenthu lela tsüdila sakechi tsü zaya nu hi kekhang chüya thsü.”

¹⁴ Zion wi kesami ntsa nyithu na messi nu kedheggüben. Mathu na khi, “Anyiza jüh kekaghatenwa tsüna anuphanla mecang keten nni tsüti le. Ithu kesüla anni tsüti kesa witsü hangya mehai kwe?”

¹⁵ Nthu na kemeshonwa tsü khi nu kuliten lethu hangya mehai. Nthu kahang sen nu ketha-u nmechula nu alaa meyala. Nyu pathi nyelela kekuli nkemehai kepa wi sale kiden kebenthu ssinu nsaghula.

¹⁶ Isalethu nthu apvü-nsa; nthu na akhweti kezü non wi keben ti sa yaben. Nthu na kedsakejjü la muyaben.

Ghaketen wi Anyankethang ntsa

¹⁷ Kheneng kuti nthu na kadimi kesü na ayyi ccügwen tsüdi wi ketsen wa keben miwi kekhang sen pi mehai ntsa keben muden.

¹⁸ Hatu wi nthu na asang khajana kekhüthu nu wahhaithu messi keghowa tsüna meshen keben ketan saaben.

¹⁹ Nthu na asangthu awisa nu nthu nkechü jühkhi ketenthu tsü nmulaben.

²⁰ Ithu na keccüna kho kemini sa keten Zion nyunutiwa tsü ghangchilo. Jerusalem ghangchilo! Tsüna apvükesa nmila hangya keten pen khati kesadha nu! Tsüna anithsüjjen kejetenji nshhu nyelela kehuli ndela zanghu pi nkulila keben ti saaben.

²¹ Apvüwa na ma nyankethang pi ithu ccücaben. Ithu na aghaku keti nu akuza kete wi hangben, isala nankemeghüthu hunjjen na ciwi wa nden.

^22-23 Ahunjjen miwi kebhenle tsüdila nsenla kemehai ketan; ahunjjen thsükizankithu tsü zanshigüya nben! Ithu na ghinyi süpahizi keben-keyeng tsüdila khuyaden, nu ji ntsa sa nu accü nkemehai nyi la ma shei muyaben. Apvüwa na ithu kadimiwa saaden; ma ithu miwi kekhang sen nu ithu khweden.

²⁴ Ithu yyi wi kahangthu la kesakinaa sale khi nbendha, nu kasami tsüdila teshi pi cüaden .