ISAYA 29 - Kemethajüh (N) (Re-editing) Bible (BSI)

Jerusalem na Metuketen

¹ Anyiza kekinyipenwa Jerusalem tsüna dedi tendha! David na keben nyunutiwa tsüna dedi tendha! Amapi kesü keni akho kemishu tsüwa ya gho nu wa thsü ben lalo,

² Tsaseng wi Anyiza na wan keyasa sengho “Anyiza kekinyipen” isa ci keten nyunutiwa miwi chiaben . Ciwi kiqai nu kiqaiki na ben den, nu anyunutiwa maben wila ajjü pi pong ketheng kekinyipen tsüti saaben.

³ Anyiza na anyunutiwa vüdhiya nu tsü ssikaghashen den.

⁴ Jerusalem na acenpvü kesü, ayyi non wi ayyinikhu wina ajühkhi shhugho le keben nu maghashi meyala keben ti saaben.

⁵ Jerusalem, asang na no ssikaghashen ketenthu tsüdila ayyinikhu ti mo pi bvüaden, nu mathu pateqhe keten ghinyithu tsüdila amatsi ti pighe bvüaden . Zuli nu meshen nkeben wi

⁶ Apvüwa Kekhang ntsawa na atsankeshigü, ameghükuju, nu caghamo kekhang pila no kikasha cüden. Ma caghamo nu anni kekhang kesun chiden;

⁷ ciwi mizzatenti ghinyithu na Anyiza kekinyipen nyunutiwa ssikaghashen kebenthu tsüdi, nu aghitsanqai tsüdila aman kesü ti, aghaja wi pala kesü kemeshen ti nu bhataghaben.

⁸ Jerusalem ssikaghashen le saghu keben mizzatentithu tsüdila pica keben nyi kesü na ma man wi dsajjü benla nu ghamathi keshagha ti, nyelela anyi kesü dighethi shü wa keten na ma man wi atssü jjü benla nu ma giyan qhayi shagha keya ti saaben.

Nkekhichi kekitsanthu

⁹ Wa kejüphon sa benlo! Wa anyon nkemu nyi sa benlo! Kisengtssü nsenla adina yalo! Kejüca kesüla njjüla kulukhukhu salo!

¹⁰ Apvüwa na no yala kumou nu jenchi ntsa wa thsüale sadha. Atusenjüh-kechüthu na anyithu nyon kesau, isala Anyiza na mathu nyon qhan bhondha.

¹¹ Atusenjüh kemanthi jjügi tsüdila pi nthu tuwi kuthi cüden; tsüna mechantsi pi jeng kesa kezhüllu ti saaden. Nthu na tsü sen nu kesichüthu pahan ya si pi nthu kizalo sa lela siya nben le, kepaghenanye tsüna mechantsi pi jengdha, isa khiaben .

¹² Keujüla nthu na tsü sen wa nkesichü pahan ya si pi nthu kizalo khi lela ma khati khe nchü le kiza ben.

¹³ Apvüwa na khi, “Anyi hathu ha hi kinyi tenle khiden, isala mathu na khi keten tsüna ma jjügi mangla nmi, nu mathu leben na apen kepa wi ten. Mathu keccüna tsüna mangla nye, isala anyi yen nu abamyi wina khi kegho yen mathu chü pvü kebenthu le.

¹⁴ Tsalina hi meshen nkeben, amankesa nu qhethiketen kesa pi mathu kecü sengwi la cü nengden. Kemetsathu na kejüphon sa waben, nu mathu kemeghe-kemetsa na ma men nmila ben.”

Haseng wi kaghang keben

¹⁵ Acho pi Apvüwa kuthi le kebenthu na dedi tendha! Mathu na meshen keben chowa tsüpi kuthile sa nu mathu kemeshen wi thola mathu na sa kebenwa tsü nmu nyelela chü nbenle saden.

¹⁶ Mathu na pala tsüdila pi kecügüneng den. Khawa di nu, apfükezhüwa la apfüyyiwa nu? Atsanqai kesü na ma zhükechiwa wi, “No hi zhü nchile isa khiya mehai kwe? Nyelela tsüwa na ma kezhüwa wi ‘No mangwa saben khe nchüle khiya mehai kwe?’ ”

¹⁷ Pala cüki wi, matsü kesie nwala ayinong-nonpha na kecalli sa, nu kecalli na ayinong sa neng shabenle khiden.

¹⁸ Tsü tsathang na kegho wi, akhuna kedecu nyi na misikhhali sala lesü sishü keben zayaben, nu anyon nmula kejang wi hang ketenthu na anyon kü nu pala muyaben.

¹⁹ Ketha-u nu hang kimenni ketenthu na kuti Apvüwa, Israel Nyiza Kemethawa na khukechi anonkeghe tsü mu neng yaben.

²⁰ Tsüwa tsüna nyu pasha nu Anyiza nkekhichi pi ccüca ketenthu ghena asakhen saaden. Kesami nyi tsüdila dediaben.

²¹ Anyiza na nyu khisa nu ayen kepakhhithu kemeten pi kecü khen ketenthu, nu milimesa nu ketsatan nyi yala mathu kemeshon mukeya len khen ketenthu dedi aden.

²² Tsalina Apvüwa, Israel Nyiza, agükeccü wi Abraham kikasha kecüwa na khi, “Inyithu, nthu na kejügheya neng nbendha, nu kejüghe ghena nthu mmi na phalagha sa thsü ntendha.

²³ Nthu na hi pi nthu cüle keben tsangathu muya lethu, ciwi nthu na hi Israel Nyiza Kemethawa le kesa chüyaben. Nthu na hi kinyikü nu hi messiben.

²⁴ Kejüphonthu na chüshikeya muyaben, nu keshüthangla nyu jüh meya mvu ketenthu na nyu ya ma sansi thsü mvu wa ben.”