ISAYA 25 - Kemethajüh (N) (Re-editing) Bible (BSI)

Kesengkhwi kesü

¹ Apvüwa, no iNyiza le; hi no kinyikü, nu n-nyan seng tenle. No amankesa kekuli sachidha; No ajühtsentsa sa nu hatu wi kiden kethengthu tsü sayadha.

² No anyunutithu pi dedi thsüdha, nu tsüthu khwetithu yasadha. Kadijjen ithu ghinyi na sa ketheng tsüdila anuphan ghena dedidha.

³ Mizzatenti kekhang nyithu na no seng den; kedaggü mizzatenti nyunutithu na no messi den.

⁴ Hhaketu nu kekiqa nkemithu na bvü sen nu no wi ghodha, nu agükeccü tsü wi lela yazishu sadha. Caghamo kesa wi no mathu ken-niepen pi cü, nu keyeng ntsa wi mathu kekhwen sa cü. Kedaggü nyi na pathsü wi caghamo ti ssisa,

⁵ kemegi yyi keqha ti kesa. Isala Apvüwa, no ithu ghinyithu ya ccen ben thsüdha; no kedaggü nyithu kemagha khen; akulukeshü na aghani kisa ghanan patekicü thsü kesa ti.

Anyiza na Kemishu kesü kekiden

⁶ Hewi Zion Yikha miwi Apvüwa Kekhang ntsawa na ayyi mizzatenti tsüdi ghena kemishu kesü kiden den — atsse kemehai ntsa nu kisengtssü ntsa pi kemishu.

⁷ Ma zulila ahathakina kulukeshü na mizzatentithu tsüdi miwi hagi kebenwa tsü khusha den.

⁸ Kemisintsa Apvüwa Kekhangwa na anuphan ghena keshüwa tsü sen bvüaden! Ma anyi tsüdi nyontssü nyen nu ayyi tsüdi wi ma anyithu ketizensa kesa kejüghekeyawa tsü khuaden. Apvüwa na ma ketanla khichidha!

⁹ Tsü sacen kegho wi anyi tsüdila khiben, “Ma ithu Nyiza le! Ithu na ithu kenondi pi ma miwi chiden, nu ma ithu kikashayadha. Ma Apvüwa tsü le! Ithu kenondi pi ma miwi chiyadha, nu khilitsü ma ithu hangshakeya ghena ithu nen nu ithu nonkeghe saben.”

Anyiza na Kemeten Pi Moab nyithu cüaben

¹⁰ Apvüwa na Zion Yikhawa tsü khweyaden, isala Moab nyi tsü cüten shaden, amatsi pi ayyi wi cütengho keten tsüti.

¹¹ Mathu na atssüghe sa wale keben ti mathu kwen chang ben, isala Anyiza na mathu satemeni nu mathu kwen kezü nmila qanca thsüaben.

¹² Ma Moab khwetivü ketheng kemisithu tsü yasa nu zansha pi khuli dugho ayyinikhu sa thsüaden .