ISAYA 23 - Kemethajüh (N) (Re-editing) Bible (BSI)

Foenikia ghena Ketsijüh kesü

¹ Hawa hana Tur ghena ketsijüh kesü. Atssükedone wi ahunjjen keculathu, leben güccü nu qai yalo! Tur wi nthu chüpenwa tsüna yasadha; tsüthu jjen nu tsüthu kemnanpen na yasadha. Nthu hunjjenthu na Sipress wina kegho wi nthu na jühtheü chüya.

² Qaiyalo, Sidon wi asententi kesathu! Nthu na nyu kesun pi

³ atssükedone khhakawa Ejipt wi mukeya tsü shei, jeü nu mizzatentithu tsüdi ssinu asenli saden.

⁴ Sidon nyunutiwa, no kejügheyadha! Atssüketi nu atssükedone kedhu na no teshi nu khi, “Hi ghanyi kesüla ben ngho. Hi atsangathu noncca nshagha.”

⁵ Ejipt nyithu lela Tur na dedidha le kesa chükeya wi amansa nu accükwenshü waben.

⁶ Leben ketizensa nu qailo, nthu Foenikia nyithu! Spain wi bvüale kesa kidenyalo!

⁷ Matsü kesie wakesa wi sa keten anonghethi keten Tur nyunuti tsü na hawa ha saya mehai kwe? Hawa hana ciwi kahangthu kesun pi atssükedone khhakawa ajenshü kepapa sa nu benlo kesawa tsü kwe?

⁸ Kaditsathu asentisa nu ayyi tsüdi wi nyu na mathu nyuwakü ntsa ketenthu na Tur kadi nyunutiwa miwi hathu sengho le kiden kesawa tsüna thothu nu?

⁹ Apvüwa Kekhang ntsawa na tsü kiden chi. Ma tsü kiden pi mathu kekuli sakea ghena kapvü ketenthu pasha nu nyu na ma nyuwakü ketenthu satemeni cüle kesa ghena le.

¹⁰ Spain wi ajenshü kepapa sala kebenthu, nthu wa alli tsü calo. Ciwi thola nthu khweya kemehai nbendha.

¹¹ Apvüwa na ma kwen chang pi atssükedone miwi chi nu kadimithu pi khala le ben. Foenikia nyithu senkesapenthu yasalo kizadha.

¹² Sidon nyunutiwa, n-nonkeghe na kenten sadha, nu n-nyithu nyu na mathu pashadha. Mathu na Sipress wi bvüya lela, mathu na yazishu saya nben.

¹³ (Aghangsathu yala Tur miwi bvü kewa thsü tsüna Assiriya nyi nyelela Babilon nyi na le. Aducü zhüpi vü, nu Tur khweti pasha, nu anyunutiwa dedi thsü kesa tsüna Babilon nyi na le.)

¹⁴ Leben güccü nu qailo, atssükedonewa wi ahunjjen keculathu! Nthu na maghaki keten nyunutiwa tsüna yasadha.

¹⁵ Matsü kesü na ghoden, tsü tsüwi amapi achentagü, kadimi kesü kahang tsüthu nyu na Tur maliaden. Amapi tsüthu na cenyathu, Tur na keqheza menkedsa nza kesü akhwi wi keben tsüti saaben:

¹⁶ Harp kesü khuya, nu anyuti vüyalo, nyu na no teshi pi mangla nkenye sa kesa keqheza menkedsawa! Nkhwithu tsü sa neng nu anyithu yala kuti gho neng thsülo.

¹⁷ Amapi achentagü tsü wathu, Apvüwa na Tur yala kheni asensa kegho pen wi tsü wa neng thsüaden, nu ma ketanla ma melli sen nu kadiyyi tsüdi wi waden.

¹⁸ Ma senkesa wi pisa mellikeya tsü sametha pi Apvüwa cüden. Ma tsü saghu nben, isala Apvüwa kinyi ketenthu na ma pisa tsü sen nu kedsakejjü nu athsümenithu nsenthu keyishü shei yaben.