ISAYA 21 - Kemethajüh (N) (Re-editing) Bible (BSI)

Kemanthi wi Babilon keqanca kemu

¹ Hawa ha Babilon ghena ketsijüh kesü. Khutsuevü sen nu ayyikeshü pvüdhi wa keten ti, kemessi yyiwa wina wan kededi na ghoden.

² Hi matsü nmehaitha kesa kemanthi kesü mu, tsüna nyu kematsa nu kededi kemanthi. Elam süpahizi, ssikaghashenlo! Media süpahizi, anyunutithu ssikaghashenlo! Babilon na agükeccü pfüsi ketheng tsü Anyiza na pi asakhen sa cüben.

³ Kemanthi wi kemu nu kiza tsü ghena hi qhethi nu igwo naa pi nza na kepvügha wi kinaa ti sa.

⁴ Hi ili naa pi kevüli nu messi pi kedheggü wa. Keminu kegho nmvuthi ya, isala kemessi ketan khe mangla sen ngho.

⁵ Kemanthi wi tsü kemishu kesü kidenben; kedonki phi pi shi nu akejjenthu ya benlo saben. Mathu na dsa nu jjü ben. Zulila ahza kesü gho; “Kedithu! Nthu tsonhi kiden yalo!”

⁶ Tsaseng wi Apvüwa na hi wi khi, “Wala aghikehie kesü pi benya thsü, nu ma ya mangwa muya khe pi kiza thsülo.

⁷ Keujüla ma anyi na goru miwi donki nu meshu kenini sala gho, nu gada nu sunsiesa miwi ben nu gho keten mu lethu ma kekaketsü sa ghang meyathu yishü.”

⁸ Aghikehiewa na jishachi, “Kediwa, hi aghikehie pen wi ghaja-ghanan wila hieben le.”

⁹ Mathu na zuli goru miwi meshu kenini sala ghodha! aghikehiewa na ajüh ketsichi, “Babilon na qancadha! Mathu na kinyiketen tsikezhü tsüdila ayyi wi kecen chazighedha.”

¹⁰ Inyi Israel, nthu pi awhengsu ti nyeggü, isala khilitsü hi Israel Nyiza, Apvüwa Kekhang ntsawa wi ajühkemehai zakeya pi nthu wi thangchidha.

Edom ghena Ketsijüh kesü

¹¹ Hawa hana Edom ghena ketsijüh kesü. Pahan na Edom wina hi ci nu khi, “Aghikehiewa, aghajawa tsüna mangjü na wan nmila ten nu? Mangjü na wan nmila ben khe hi kizalo.”

¹² Hi khineng, “Aghanen na gho tendha, isala aghaja na gho neng den. Keujüla no keü neng mvu benthu wan gho neng nu keü chilo.”

Arabia ghena Ketsijüh kesü

¹³ Hawa ha Arabia ghena ketsijüh kesü. Dedan nyithu, nthu nyi kegoe ketenthu na Arabia diyyiwa yyikeshü wi mnan ben ben,

¹⁴ atssü pi dighe nu nthu wi gho ketenthu cülo. Nthu Tema yyi wi kebenthu, kedsakejjü pi kushinyithu cülo.

¹⁵ Anyithu na njünnu pi mathu süthile kiden, nu alakusü pi mathu gathi le kiden, nu aghi wi kemessi tsüdi ghü sen nu bvüaben le.

¹⁶ Tsaseng wi Apvüwa na hi wi khi, “Amapi kesü centhu Kedar mizzathu kemehai na asakhen saaden.

¹⁷ Alakusü kepiethu tsüna Kedar nyi kekhang ntsathu, isala kezeng-u ketan hang yaben. Hi Apvüwa Israel Nyiza, hi khidha.”