ISAYA 2 - Kemethajüh (N) (Re-editing) Bible (BSI)

Anuphan Kecca

¹ Ajüh hana Anyiza na Judah nu Jerusalem manyi ghena pi Amoz tsawa Isa kechü thsü:

² Ghoketen tsathangthu wi Kekinyijjen ma miwi keben yikhawa tsüna tsüdi miwi kemisi ntsawa sa ben, yyishiphon tsüdi miwi misikiaben. Mizzatenti kejonla ciwi bvü dughoben,

³ tsüthu na khiben, “Ithu na Apvüwa yyishiphon miwi kina, Israel Nyiza Kekinyijjen witsü. Ma ithu na sa thsü mvu kebenwa tsüpi ithu sansi cüaben; ithu na ma kessikeya lenwa tsü tonden. Kepaghenanye Apvüwa kesansijüh tsüna Jerusalem wina ghoben; ma Zion wina ma nyithu ccüneng den.”

⁴ Ma mizzatentithu jawi kicennali südhe ben. Mathu na njünnu pi amkhu cü ben, nu mathu pie pila aghang kihhai nnuza saben. Mizzatentithu na aghi wi nwa nengdha, aghi ghena nkiden nengdha.

⁵ Tsalina Jakob shicübvüghathu, ithu na khili Apvüwa na pi ithu kecü kewegüwa wi lentsen nalo!

Awikesathu Yasa Shaben

⁶ Oh Anyiza, no n-nyi Jakob shicübvüghathu teshidha man! Ayyiwa na nishu nu Filistia kecu tsüdi wila kedema kekuli na pongdha. Anyithu na asang yen nie wadha.

⁷ Mathu yyi na rükatssü nu suna na pong ben, tsalina mathu keben na ma kenten nmi. Mathu yyi na goru pi pong ben, tsalina aghikesa gari nmetseng.

⁸ Mathu yyi na tsikezhüthu pi pong ben, nu mathu na mathu kwen pi zhükeyathu tsü kinyiden.

⁹ Anyi kesüsü tsüdila hang kimenni nu kejügheya ben. Mathu kesami teshi pi ncü lalo, Apvüwa!

¹⁰ Mathu na yyishiphon lonshi ku wi kuthi nyelela mathu na ayyiku chhü nu Apvüwa leben kekha ghü, nyelela ma kekhang nu ma nyankethang tuwi kuthi le saben!

¹¹ Atsathang kesü na ghoden, tsü ghanan wi anyi kekapvü nu awikesa yasa ben. Isanu Apvüwa ketan ma nyankethang saben.

¹² Tsü ghanan wi Apvüwa na kekhangthu, kapvü nu dithang ketenthu satemeni aben.

¹³ Ma Lebanon wi sedar tsüdi nu Bashan wi ayangchan tsüdila yasa ben.

¹⁴ Ma ayikha kemisi nu yyishiphon papi meceqe saben,

¹⁵ aghikeceng pen kemisi tsüdi, akhweti kezü tsüdila.

¹⁶ Ma ahunjjen keti nu kemehai ntsathu lela pi atssü wi du thsüaben.

^17-18 Anyi kekapvü nmila thsüa, nu awikesa yasa ben. Atsikezhü nmitha saben, nu Apvüwa ketan tsü tsathang wi ma nyankethang saben.

¹⁹ Apvüwa na ayyi pakuli kegho wi, mathu na yyishiphon lonshi ku wi kuthi, nyelela mathu na ayyiku chhü nu Apvüwa leben kekha ghü nyelela ma kekhang nu ma nyankethang tuwi kuthi le saben.

²⁰ Tsü tsathang kegho wi mathu na suna nu rükatssü pi atsikezhüthu tsüpi khala ben; nu tsüthu teshi pi athape nu aholathu cüaben.

²¹ Apvüwa na ayyi pakuli kegho wi, anyithu na yyishiphon lonshi ku nu ayyiku wi kuthi nu Apvüwa leben kekha ghü nu ma kekhang nu ma nyankethang tuwi kuthi le saben.

²² Kenondi pi anyi miwi nchilayi, mathu miwi mangwa kekiyi na ben nu?