ISAYA 19 - Kemethajüh (N) (Re-editing) Bible (BSI)

Anyiza na Kemeten pi Ejipt cü keten

¹ Hana Ejipt ghena ketsijüh kesü. Apvüwa na akulukeshü miwi ben nu mbhi ntsa Ejipt wi ghoden. Ejipt nyi tsikezhüthu na ma tuwi kedheggü ben, nu Ejipt nyithu na mathu kempvüza nmidha.

² Apvüwa na khi, “Hi Ejipt wi anyithu jawi aghi pfüsi chicü nu cünyunyi nu jenphonthu kematangli thsüden. Nankemeghüli keben nyunutithu ya kesali, nu kematangli keben kadimithu ya kekhang kaghazan thsüden.

³ Hi Ejipt nyithu na acho kekiden tsü bheghe nu mathu kenong yasaden. Mathu na mathu tsikezhüthu ya mathu kiqalo khieben; mathu na demathu nu keshü ghamuthu wi mathu lenketsütson bhaben.

⁴ Hi Ejipt nyithu khupi kedaggü, nu aghe nkemehai kadimi, mathu miwi kekhang sen keten kesü kwen wi chiaben . Hi Apvüwa Kekhang ntsawa, hi khidha.”

⁵ Nil Ghaku wi atssü na qan nu ashishi sa qha bvüaben.

⁶ Aghaku tsüwa wi atssü lenthu na hansa nu qha waben. Ahuphon nu achünongthu na shüaben.

⁷ Nil Ghaku ghüsa wi asu pi chi kethengthu tsüdila shü nu mo pi bvüaden .

⁸ Nil Ghaku wi anga ghena ma nmeng mellidsa ketenthu tsüdila ghadhi nu qaiben; mathu nga kenniji nu kaghanthsü na ma men nmila ben.

⁹ Linen de ketenthu na accükwenshü waben;

¹⁰ Athsü kedethu nu sapichüthu na hathana nu nontssü waben.

¹¹ Zoan nyunuti wi accülikesathu na kejüphon le! Ejipt wi kemetsa ntsathu na kejüphon jüh pi sansi le! Mathu na khatila kempvüza sa nu kadimiwa wi mathu kheni lesü kechüthu kuti kesathu le kizaya nu?

¹² Ejipt kadimiwa, khapeghe khaja nu nlentsütson ketenthu tsüna khiewa ben nu? Mathu na Apvüwa Kekhang ntsawa na Ejipt ghena mangwa meshen ben khe no kizaya benshe.

¹³ Zoan nu Memfia wi accülikesathu na kejüphon. Mathu na mizzatentiwa lentsütson kesau le, isala mathu na tsü lentsütson sadha.

¹⁴ Apvüwa na mathu ya chükivvü kesa kesansi khuchi thsüdha. Tsüti sa kesalina Ejipt na pala tsüdi wila sazzi, nu adikina nyi ti kulukhukhu sala ma keduwe miwi jen keben ti wadha.

¹⁵ Ejipt wi keban le ketha-u lela, anyi kemechan le anyi jümu lela kekiqa khuchiya nbendha.

Ejipt na Apvüwa kinyiketen

¹⁶ Ejipt na nza ti alebenzza wa keten tsü kesü na ghoden. Mathu na Apvüwa Kekhang ntsawa na kemeten pi Ejipt cüle ma kwen chang keben kemu wi messi nu kedheggü ben.

¹⁷ Ejipt nyithu na Apvüwa Kekhang ntsawa na Judah ghena kiden keben meshenkeya kaghapen wila mathu qhethiketen saben.

¹⁸ Tsü tsüna kegho wi, Ejipt nyunuti manga wi Ibri jüh khiben. Ciwi anyi na Apvüwa Kekhang ntsawa nyan wina kekishen saaben. Tsü jawi anyunuti kesü nyan pi “Aghani nyunutiwa” isa ciben.

¹⁹ Tsü tsüna kegho wi, Ejipt yyi wi mecang pi kekinyipen kesü Apvüwa ghena ben ben, nu Ejipt nyithu ggü wi alon kisheng kesü sametha pi Apvüwa cüden.

²⁰ Tsüna Ejipt yyi wi Apvüwa Kekhang ntsawa na keben zensu kesü saaben. Ciwi keben nyi na nyu mathu pasha kegho wi Apvüwa wi kekiqa khie lethu, ma nyi pahan kesun pi mathu kikashaya thsüaden .

²¹ Apvüwa na ma ketanla ma pi Ejipt nyithu ccücaben, isathu mathu na ma chüya nu kinyi, nu ahhansha kesa nu khukechithu sen nu ma wi ghoben. Mathu na ajüh kemechan khishü nu mathu na kekhishü ti saaben.

²² Apvüwa na kemeten pi Ejipt nyithu cüden, isala tsaseng wi mathu sapi mehai cüden. Mathu na ma wi kheneng wa nu ma mathu kekhie kina nu mathu sapi mehai cüden.

²³ Tsü tsüna kegho wi, Ejipt nu Assiriya manyi jüwi alentonti kesü na ben ben. Diyyi tsü keni wi anyithu na manyi jüwi cüshu ben den, nu mizzatenti keni tsüna gweghe nu kekinyi saaben.

²⁴ Tsü tsüna kegho wi, Israel na Ejipt nu Assiriya manyi ssinu kesü saaben, nu ha kecheng hana ayyi tsüdi ghena kemihhi kesü saaben.

²⁵ Apvüwa Kekhang ntsawa na sawegü pi mathu cü nu khiben, “Hi sawegü pi nthu cüden, Ejipt, inyithu; no, hi sa keya Assiriya; nu Israel, hi no kessikeya nyithu.”