ISAYA 17 - Kemethajüh (N) (Re-editing) Bible (BSI)

Anyiza na Kemeten pi Siriya nu Israel manyi cü keten

¹ Apvüwa na khi, “Damaska na anyunuti saya nbendha; tsüna yasa pi ketheng ketan sa tendha.

² Siriya nyunutithu na anuphan dedi tendha. Tsüna khaghaneni nu amesüthu tsse keyapen, amou saaden; nu thola tsüthu kupheghe nben.

³ Israel na ma kekhwe nkemi sa nu Damaska na kekhang nmilaben. Siriya nyi hang keyathu na Israel nyithu ti kimenni shaben. Hi Apvüwa Kekhang ntsawa, hi khidha.”

⁴ Apvüwa na khi, “Israel kadi na asakhen sa, nu ma keben-keyeng mithon wi kemetseng sa keten tsü kesü na ghoden.

⁵ Israel na acheng ti saaben. Refaim Yyiketijü wi acheng ti saaben.

⁶ Anyi kezeng-u ketan mehaiya ben, nu Israel nyithu na oliv ton wi ma bi layakhi nu ma shoni wi keni kecheng ketan teshi ketheng ti nyelela ma lapvü ma cüna wi kezeng-u ketan teshi ketheng ti saaben. Hi Apvüwa Israel Nyiza, hi khidha.”

⁷ Tsü tsathang na kegho wi anyithu na mathu sahangkechiwa, Israel Nyiza Kemethawa wi kekiqa bha ghoben.

⁸ Kekinyi pen mathu kwen pi kesathu tsü n-nondi laben, nyelela mathu kwen pi kekuli Asherah cenpvü tsikezhü nu hankedemvu kemecang ghena kekinyi penthu tsü n-nondila ben.

⁹ Tsü tsathang na kegho wi aghihie kemehai sa keben nyunutithu wi anyi nhangla teshia nu yasa pi Hivi nu Amor nyithu na mathu nyunuti teshi theng nu Israel tubvü kesa tsüti saaben.

¹⁰ Israel, no Anyiza na no kikasha kecü, nu alonshi kekhang ti no khwe ketenwa tsü malidha. Tsü mithon wi no asang cenpvü kinyi le kesalina kemetha sankuthu.

¹¹ Isala keujüla no sheng kechi ghanen shigü shagha nu pvü wa lela tsü bi laya nben. Ketizenkesa nu mehai nkeya kinaa ketan saaden.

Ghinyi Mizzatentithu Chayaketen

¹² Mizzatenti kekhangthu na atssükedone nu atssüketi hhai ti sa sen nu ghoden.

¹³ Mizzatentithu na atssüketi hhai ti ghoden, isala Anyiza na mathu khachi nu mathu ya yyishiphon nikhu mo sen nu bvü keten ti, khutsuekevü na amatsi mo sen kebvü ti khenengdha.

¹⁴ Minulen wi mathu na nyu pateqhe chiden, isala ghanenwa wi nmiladen. Ithu yyi pasa ketenthu tsüdila tsüti saaden.