ISAYA 16 - Kemethajüh (N) (Re-editing) Bible (BSI)

Moab kekiqa nkemi tsüwa

¹ Ayyikeshü wi Sela nyunuti wina Moab nyithu na khaghaneni zza kesü pi ajüca sala kesun pi Jerusalem wi kadi sa kebenwa cü.

² Mathu na Arnon Ghaku ghüsa wi hie nu kemtsü mangla nmila awa na ma ghacen wina jügüshi kechi ti bvü wa nu bvü gho saben.

³ Mathu na Judah nyithu kiza, “Ikhang na mangkesau khe kizalo, achanton kesü na ghanan lapvü tsü wi kekicü pi khwen cü keten tsüti ikhang khwen cü, nu ikhang ya nthu kekhwen wi benya thsülo. Ikhang na kushinyi; ikhang pi nyu nkemu ben wi kuthi cülo.

⁴ Ikhang ya nthu yyi wi benya thsü. Ikhang yasa cüle kebenthu kwen wina ikhang khwe yalo.” (Kematang nu keyasa na asakhen sa, nu diyyiwa pasa kebenthu na bvüaben.

⁵ Tsaseng wi David shicübvügha meshu kesü na kadimiwa saaben, nu ma ajühtsentsa nu kaghali sen nu anyithu miwi kadimiwa saaben. Ma wan nu kemeshonwa tsü sachi, nu ma atsentsawa tsü sakeya ghangden.)

⁶ Judah nyithu na khi, “Ikhang na Moab nyi na khati kapvü khe zayadha. Ikhang na mathu na ammisa nu awisa tenle kesa chüdha, isala mathu dithang ketenwa tsüna kaghacang.”

⁷ Moab nyithu na mathu güccü ketizensa nu qaiben. Mathu tsüdila Kir Here nyunuti wi kedsakejjü kemehai dsa kegho tsü meshenyathu qai waben. Mathu na accükwen chahha waben.

⁸ Heshbon kete wi allithu nu Sibma wi kemeshentsse llithu yasadha -— kemeshentsse llithu na mathu kisengtssü pi mizzatenti kesenthu ya adina thsü keten. Kuti tsüwi kemeshentsse ton tsüthu na chang sen nu kelensie wi Jazer nyuti kecu, nu nishuwa ayyikeshü, nu nidu wina sasen nu Keshü Tssükedone khhaka kecu waketen.

⁹ Hi Jazer ghena kiqai ti khili Sibma kemeshentsse llithu ghena la qaiben. Inyontssü na Heshbon nu Eleal ghena lle ben, kepaghenanye alli wwi pi mathu nongheya kemehai mangla nmidha.

¹⁰ Thola ayyi kemehai llikeca ghena anonghe meya. Thola kemeshentsse lli wi jisha nyelela akhwi nsa. Thola kisengtssü sale kesa ghena kemeshentsse bi n-nyeggü; anonkeghe kejisha na asakhen sadha.

¹¹ Hi Moab ghena hathana, nu Kir Here ghena ileben güccü nu ghadhi wadha.

¹² Moab nyi na mathu na wa kekinyi sa keten yikha witsü kekinyijjen wi kekhie nsa chala bendha, isala tsü ghena mathu kemehai mangla nmi.

¹³ Tsüwa tsüna kishi Apvüwa na Moab ghena ajühkhukechi.

¹⁴ Khili Apvüwa na khi, “Amapi kecheng centi kesa wi Moab keben-keyeng kemehai tsü nmila ben, ma nyithu kejon na keben jawi kezeng-u ketan hangya, nu mathu nkhangla ben.”