ISAYA 15 - Kemethajüh (N) (Re-editing) Bible (BSI)

Anyiza na Moab dedi thsüa keten

¹ Hana Moab ghena ketsijüh kesü. Ghaja kesü jüwi Ar nu Kir nyunuti keni na dedi tendha, nu Moab yyi na yangyi sadha.

² Dibon nyithu na yyishiphon miwi ki nu kekinyijjen ghena qaiben. Moab na Nibo nu Medeba nyunuti keni ghena leben güccü nu qaiben; mathu leben gükeccü wina mathu li nu apangkenye cadha.

³ Alentonti wi anyithu na aleshithsü mphi; anyuti non nu ajjenmili wi anyithu na leben ketizen sa nu qaiben.

⁴ Heshbon nu Eleal nyithu na magha nu qai nu mathu kiqai na kelensie wi ahunjjen kecu wila zaben. Süpahithu lela kedheggü, nu mathu kempvüza nmidha.

⁵ Ileben na Moab ghena qai shaghadha! Anyithu na Zoar nyuti nu Eglath Shelishiya wi bvüdha. Pahan na qai sen nu Luhit wi kewalen wi shu; pahan na leben güccü nu maghala Horonsin wi bvü.

⁶ Mimrin kuza na qha, tsü ghüsa wi aghang na jü, nu mangla kemejjü nmidha.

⁷ Anyithu na Willow Yyiketijü khhaka sen nu mathu tsanqai tsüdi pvü nu bvüale apiketsü saben.

⁸ Moab kemeggü tsüdi wi kiqai zaben. Efraim nu Beerelim nyuti wila tsü zaben.

⁹ Dibon nyuti wi ajjü na akuza tssü ten pi nmieni sadha, nu Anyiza na ciwi kebenthu ghena mehai kayi kesa pi theng. Moab wi nshüla kebenthu süthi pi ajjü keji ntsa saaden.