ISAYA 14 - Kemethajüh (N) (Re-editing) Bible (BSI)Kushiyyi wina Kheneng kegho 1 Apvüwa na kuti ma nyi Israel nantizen nu mathu kessi pi ma ji sa neng yaden. Mathu na mathu yyi wi hang neng den, nu asangthu na gho ciwi mathu gweghe hang ben. 2 Mizzatentithu kejon la Israel nyithu ya Apvüwa na pi mathu cü ketheng yyiwi tsü gho thsüale kiqa ben, nu mizzatentithu na nssümagha sala mathu kekuli saaben. Kuti Israel nkaya kesathu tsü Israel nyithu na mathu nka neng yaben, nu Israel nyithu na hatu wi mathu meten-mesha keghothu miwi kekhang sen yaben. Babylonia Kadimiwa na Keshü yyi wi Keben 3 Apvüwa na Israel nyithu ya kinaa nu agükeccü wi, nu nyu mathu meten pi kekuli kekhang sa thsü kegho wina ccaya thsüaben. 4 Ma tsü sa kechi wi mathu na Babilon kadimiwa nankeqhe nu khiben: “Kadimi gheshighena nkemehaiwa na qancadha! 5 Apvüwa na kekhang kesen nkemehaithu ya kekhang nsen thsüladha. 6 Mathu na alebentsu nu anyithu meten- mesha nu mathu na yayakea mizzatentithu kimenni ben keten. 7 Asakhen witsü anyi tsüdila keyazi nu kecca sen nu anonghe, nu anonkeghe ghena akhwisa ben tendha. 8 Lebanon wi sipress nu sedar chan tonthu na qanca kesa kadimiwa ghena anonghe ben, kepaghenanye khili tsü ma nmila nu thola tsüthu shüchi ntendha! 9 “Keshü yyiwa na Babylonia kadimiwa ssiya le kiden ben den. Ayyi wi kekhangthu ghamu na kethukehi bendha. Kadimithu ghamu na mathu kadipen wina shagha bendha. 10 Mathu tsüdila ma kiza, ‘Khilitsü no la ikhang ti nkhang ladha man! No la ikhang makesü sadha! 11 Harp pi akhwisa nu no nyuwakü keten nan, khilitsü no la he keshü yyi wi bendha man! No amedhenthu pi nwekeshi sa nu acanie pi kemphi sa wadha.’ ” 12 Babylonia kadimiwa, ghotsi sükhawa, no tang wina qanca dugho! Wa kesa tsü wi no mizzatentithu nkayaya gho, isala khilitsü no pi ayyi wi khala chidha. 13 No tangwi kinu no kadipen pi ghotsi kemisi ntsathu miwi sale meshen. No kadimi kesü ti nu aghawa acenpvüthu na saghuketen yikha miwi donkiyale meshen. 14 No atssan kemisi ntsathu miwi kinu kekhang ntsa ti donki le khi. 15 Isala tsüti sakeyawa nyela no zansha pi ayyi kedhu ntsa keshü yyi wi chidha. 16 Keshüthu na no ghang nu apang ka ben. Mathu na keüben, “Anyi hawa ha ayyi pakuli nu kadiyyithu ya kedheggü thsü kesawa tsü kwe? 17 Anyi hawa ha anyunutithu yasa nu ayyi pi ayyikeshü sa kesawa tsüla? Anyi hawa ha atssüzüthu nlishü mvu nyelela ajjen wi nwha thsü mvu ketenwa tsüla?” 18 Ayyi wi kadimithu tsüdila ashüjjen kemehai non wi ben, 19 Isala no tsü ashüjjen nmi, nu nkamang pi bighe thsüale pi khaladha. Aghi wi yathi kesa süpahithu kamang na tsü kecenbhon, tsüthu saghu pi alonshiku wi khala chi nu cütendha. 20 No diyyiwa yasa nu no ketanla n-nyithu pathi kesalina no khupi kadimi kepa ti vhü nten. Ntheghi kemehai kesütanla hangya nben. 21 Anyithu kesüthiwa ya sa shhuya thsülo! Kadimi hawa tsathu na mathu bamyithu kesami ghena shüden. Tsüthu kesüla ayyi kekhang sen nben, nyelela anyunuti sapi ayyi kepong sa thsü nden. Anyiza na Babilon dedi thsüaketen 22 Apvüwa Kekhang ntsawa na khi, “Hi Babilon ssikaghashen nu tsü yasaden. Hi mangla teshi nten, ghanyi kesütanla nu thola hangya thsü nten. Hi Apvüwa, hi khidha. 23 Babilon pi awen cheng thsüaden, nu accüpvüthu yala ciwi hangden. Hi pala tsüdila pfüpia keten aghatang kesü pi Babilon jjüpi cüden. Hi Apvüwa Kekhang ntsawa, hi khidha.” Anyiza na Assiriya nyithu dedi thsüaketen 24 Apvüwa Kekhang ntsawa na kekishen kesü satheng: “Hi kiden kethengwa tsü saaden. Hi saale meshen keyawa tsü sa yaden. 25 Hi iyyi Israel wina Assiriya nyithu dedi thsü nu iyikha miwi na mathu cüten shaden. Hi Assiriya nyithu yen kedhu wina inyithu lisha nu mathu na akhhi kekiyan pvü ketenwa tsü pisha cüden. 26 Hawa ha hi ayyi ghena meshen kebenwa tsü, nu kemeten pi mizzatentithu cü le ikwen changyadha.” 27 Apvüwa Kekhang ntsawa na ha sale meshenyadha; ma kemeten pi cü le ma kwen changyadha, nu thola ma khenya nben. Anyiza na Filistinthu dedi thsüaketen 28 Ketsijüh hawa ha Kadimiwa Ahaz na keshü mapi wi pi thangchi. 29 Filistinthu, nthu kihhe keten mighewa tsüna pashüdha, isala nthu na anonghe keya jjügi nmi. Amaghang kesü na shüthu, tsü miwi nkemehaiki na ghola tsü pen pong yaden. Amaghang tsüwa ghatsü wina pighe keten maghang khushi yaden. 30 Apvüwa na ma nyi kahhatuthu kehiewa saya nu mathu ya yazishu hangya thsüaben. Isala ma azeng kedhu kesun pi no Filistinthu wi chiaben, tsüwa tsü kegho wi nthu kesüla hangya nben. 31 Ghadhi nu qaila kekiqa khielo, nu Filistin nyunutithu tsüdi! Nthu tsüdila messi ntsa yalo! Aghawa na nikhukethong sen nu ghoden, tsüna leben kejjan süpahizithu le. 32 Khatinu Filistia wi nyilo gho ketenthu jüh luneng chiya nu? Ithu na mathu kizala, Apvüwa na Zion pieki cüdha, nu ma nyi agüccü kebenthu ya yazishu benya thsüben. |
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
Bible Society of India