ISAYA 13 - Kemethajüh (N) (Re-editing) Bible (BSI)

Anyiza na kemeten pi Babilon cüben

¹ Hawa ha Babilon ghena ketsijüh kesü Amoz tsawa Isa na Anyiza wina mukeya.

² Yyishiphon methasi kesa shoni wi khangthsüwa piekilo! Yisha pi süpahithu cü nu nthu kwen kejen pi azensu sala mathu ya kekapvü nyunutiwa khweti tsü ssikaghashen thsülo.

³ Apvüwa na ma süpahi meshen pi ashhüsa nu kenondi qothu ya keccüna ghisa nu ma mathu miwi alebentsu kebenthu meten cülo ci chidha.

⁴ Ayikha wi anyitenti hhai kinachilo, mizzatenti nu kadiyyithu saghu keben hhai tsü. Süpahizithu miwi Apvüwa na aghisale kesalina ma süpahi kidenben.

⁵ Tsüthu na kelensie wi diyyithu, ayyi kenten wina ghoden. Apvüwa na ma lebenketsu wina diyyiwa maben dediale ghoden.

⁶ Kenaa ghena ghadhilo! Apvüwa tsathang na tetsakidha, Kekhang ntsawa na kededi sengho keten tsathangwa tsü.

⁷ Anyi tsüdi kwen na kelaca ben; nu anyi tsüdila kempvüza nmila ben.

⁸ Mathu tsüdila keqhethi nu nza na kepvügha wi kinaa ti sa waben. Mathu tsüdila messi pi khokho kaghangli nu kejüghe ghena mathu mmi nmie ntsa saaben.

⁹ Apvüwa tsathang na gho tendha, ma leben ketsu nu kekha nkemehai tsathangwa tsüna. Ayyi ya aghansha sa thsü nu kesami nyi tsüdila dedia den.

¹⁰ Ghotsi nu ghotsi lashüwa la nwegü laden; aghani na shhugho lela jang thsüaden, nu asha la nwegü laden.

¹¹ Apvüwa na khi, “Hi kededi tsü sen nu ayyi wi gho nu gheshighenathu mathu kesami ghena kemeten pi mathu cüden. Hi kapvü ketenthu satemeni nu kemeten pi awisa nu daggü ketenthu cüden.

¹² Suna miwi la anyi hang keyathuwa metseng shaben.

¹³ Hi Kekhang ntsawa Apvüwa, hi ileben ketsu pi keccüca ghanan wi hi atssan ya kedheggü, nu ayyi la maben wina kuli thsüaden .”

¹⁴ Babilon wi hang keben asangthu na ameshü na ma jügü ketenthu tubvü nu khaghaneni na mathu kehie nmila keben ti bvüzighe sen nu papa diyyi wi waben.

¹⁵ Kesü le kesü lela ghan keyawa pi kecunthiaben.

¹⁶ Mathu na hhaketu sa ghang keben wi mathu tsanga memethu kihhethiaben, mathu jjen shu nu mathu wubvü mesa-meshüaben.

¹⁷ Apvüwa na khi, “Hi Mede nyithu ya Babilon ssikaghashenlo kechü chiben. Mathu na rükatssü nu suna la ntepagha.

¹⁸ Mathu na alamugho nu macü sen nu kepvünyithu gathiaben. Mathu na memethu nu ghanyithu lela nantizen nben.

¹⁹ Babylonia na kadimi tsüdi jawi kemehai ntsa; mathu nyi meshen pi kapvü ketenwa tsüna tsü le. Isala hi Apvüwa, hi Sodom nu Gomorrah keyasa ti Babilon la yasa cüden!

²⁰ Thola ciwi hang neng nbendha. Arab nyi kegoe keten kesütanla ciwi anithsüjjen sa nben, nu khaghaneni kehie nyi kesüla ciwi ma nenithu ya atsse yathsü nben.

²¹ Tsüwa tsüna ayyikeshü wi aghangsa kahang pen saaben nu accüpvüthu na ciwi aghacen saben. Awa ja kedithu na ciwi hang, nu agheja nenithu na keyasa pen witsü ghakha ben.

²² Anyunutiwa wi kehiepen nu kadimiwa jjen tsüdi wila adenni nu meshülathu na magha pi kehiki ben. Babilon tsüwa na ghodha! Ma tsathang na kecenpang sadha.”