IBRINYI 9 - Kemethajüh (N) (Re-editing) Bible (BSI)

Ayyi wi nu Tang wi Kekinyi

¹ Cenkethenjüh atuwa wi tsü kekinyi ghena ayenthu nu anyi na kesa kekinyipen la ben.

² Anithsüjjen kesü sa, nu akhemiwa tsü pi Kemetha pen le khi, ciwi ahula kedonpen, miz, nu amesa pi Anyiza kekinyi na ben.

³ Nithsüjjen jenka keshon keniwa seng wi tsü Kemetha ntsa Pen tsü ben.

⁴ Tsü non wi hankedemvu kemecang ghena suna pi kesa kekinyipen, Cenkethenjüh Khitson suna pi meju nu suna hikhu wi manna keben, Aaron khhatssü mawa shigü shhugho keawa tsü, nu alonpha keni miwi ayenkhukechithu pi zhüki ketheng tsüthu na ben,

⁵ akhitson tsü miwi nyankethang cherubim na ma gisha pi nanketizenpen tsü whengbhon sen ben. Isala khili tsü cüki maben khiya nben.

⁶ Pala tsüthu tsü hati nu kiden chitheng. Keqhaikedithu na atsathangla nithsüjjen ameiwa tsü du nu mathu kekuli tsü saden,

⁷ isala keqhaikedi Kemisintsa ketan amapi kesü wi kutitan nithsüjjen ndukuwa wi tsü duden. Ma ajjü sen dula ma ketanla ma mithon wi nu anyithu na nchüla sami kesathu mithon sa pi Anyiza kinyiden.

⁸ Hati kidenkechi tsüdi wi nithsüjjen akhemiwa tsü keben chu Kemetha ntsawa Pen wi kedulen tsü npi shale kesa Kemetha Ghamu na methasi pi sansi ben.

⁹ Hawa ha khili tsü ghena azensu kesü tsütson kechi. Ha jjügi ha kekinyiju nu asahang pi ahhanshathu sa pi Anyiza kecü tsüna kinyi kebenthu leben sa pi haicen cuya nben,

¹⁰ kepaghenanye mathu kedsa kejjü nu satekemetha keccüna kepapa kesathu ketan saden. Hathu ha tsüdila Anyiza na ketheüwa tsü npi kesachi chu sa keten amei wi yenthu.

¹¹ Isala Khrista na pala kemehai hewi ben kesathu miwi Keqhaikedi Kemisintsa sa ghodha. Ma kekuli sa keben nithsüjjenwa tsüna di kayi nu cencu kayi; tsüna anyi kwen pi kesa nithsüjjen nyelela sahangkechi yyi ha wi ji nye.

¹² Khrista na kutitan anuphan ghena nithsüjjen wi wala Kemetha ntsa pen wi kedu wi aneni nu amesü jjü sen nu ahhansha sa nwa isala ma ketanla ma jjü sendu ithu ghena anuphan kahang tsü khuyadha.

¹³ Kepaghenanye aneni nu amesü jjü nu amesü zza kemecang qae tsü pi anyi keccüna wi nkemethathu miwi keghü chiden, nu satekemetha hana mathu keccüna wi nkemethathu tsü sen bvüden.

¹⁴ Hawa ha ntsakhiwa, isalethu Khrista jjü pi sacen kechiwa tsü khati ma men benki nu! Ma ketanla ma pi anuphan Ghamu wina kecencu hhansha kesü sa pi Anyiza cüdha. Ma jjü na keccüna ma men nkemi wi ithu kemeshen satemetha cüben, isanu ithu yala hang kebenwa Nyiza kekuli saya thsüben.

¹⁵ Ha jjügi ghena Khrista na cenkethenjüh ketheüwa tsü sa kecüwa, isanu Anyiza na ciya kesathu yala Anyiza jühkhukechi anuphan kesawegüthu tsü muya thsüle kesalina. Hawa ha saya mehai kepaghenanye ma keshü ghena anyithu na cenkethenjüh atuwa kekhu wi ben nu kesazzithu wi tsüna mathu lisha chicüdha.

¹⁶ Cenkethenjüh kesü kesa wi anyi tsü sa kechiwa na shüdha kesa chü meyathu yishü,

¹⁷ kepaghenanye cenkethenjüh tsüna anyi tsü kesawa hang keben mangla nye, isala ma keshü seng wi ccüna tsüna ma kekhang benden.

¹⁸ Tsalina cenkethenjüh atuwa lela ajjü sen ccüla ma men benden.

¹⁹ Atuwa sa Mosa na Ayenwa wi ayenkhukechithu tsüdi pi anyithu wi kizachi. Tsaseng wi ma amesü süpon nu aneni jjü pi atssü saghuya, nu tsü pi ssenthsü kenmie nu shonpheghe chan cüna kesü wina pi Ayenwa lesüshen nu anyithu tsüdi miwi keghü,

²⁰ nu khiden, “Hawa ha ajjü pi Cenkethenjüh sa keya Anyiza na nthu nieyalo khichi ketheng tsü.”

²¹ Tsü makesü Mosa na ajjü pi Cenkethenjüh Nithsüjjen nu ciwi kekinyi wi kesen tsanqai tsüdi keghü.

²² Ntsakhiwa Ayenwa kenie wina pala tsüdila ajjü pi satemetha, nu ajjü keji nkechi tsü khiela kesami teshi kecü nmi.

Khrista Hhansha kesa ghena Kesami Teshi cükea

²³ Tang wi yen ghang nu sa keyathu ha hatinu satemetha. Isala tang wi tsanqaithu na tsü miwi kemehaiki ahhanshathu nsathu yishü.

²⁴ Kepaghenanye Khrista na atsentsawa ghang nu sa keya anyi na kesa Kemetha Pen wi tsü ndu, isala ma tang wi tsü wa ciwi khili ithu mithon sala Anyiza tu wi ben.

²⁵ Judah nyi Keqhaikedi Kemisintsa na amapi kaghapengla asahang jjü sen nu Kemetha ntsa pen wi tsü duden. Isala Khrista na ciwi du ma ketanla ma pi ahhansha saneng-saja sa nten,

²⁶ kepaghenanye isalethu, aghatsan ayyi sahangkechi wina ma ketizen saneng-saja sa kesa. Tsüti kesawa nye, ma kahang sakhen sa wa keten wi ghola kesami khupiale kesalina ma ketanla ma pi kutitan anuphan ghena ahhansha sadha.

²⁷ Anyi tsüdila kutitan shüben, nu tsaseng wi Anyiza jühkekaghaten wi ghoben.

²⁸ Tsü makesü Khrista la anyi kejon kesami sen bvüale kesalina kutitan na ma pi ahhansha sa chidha. Ma keni tughuwa gho keten tsüna kesami pvüyale kesa ghena nye, isala ma hie kebenthu tsü hangshayale kesa ghena ghoden.