IBRINYI 6 - Kemethajüh (N) (Re-editing) Bible (BSI)

¹ Tsalina ithu Khristanyi kesansijüh atuwathu tsü teshi theng nu atu wi kezügü kesansijüh tsü jügü wa nalo! Ithu kheneng wa ma men nkemi kekuli wi khapeghe bvü kesa giketegü nu Anyiza nondi yishü;

² kesansijüh tsüthu tsüna baptaiz kesa nu akwen chang pi nyu miwi kechi; keshü wi hangneng-keshagha nu anuphan jühkekaghaten.

³ Ithu atu wi jügü wa na, nu Anyiza kemeshen ti lethu hati sa nalo!

⁴ Kepaghenanye khati nu kenondi teshi kesathu ssi neng gho leben khapeghe thsüya mehai nu? Mathu na kuti Anyiza kewegü wi ben; mathu na tang wi ajuthu tsü pampi nandha, nu Kemetha Ghamu wi mathu shei muyadha;

⁵ mathu na sanan nu Anyiza jüh tsüna atsentsa kesa chüyadha, nu mathu na kahang gha ketenwa kekhang tsü pampi nandha.

⁶ Isanu mathu na mathu kenondi tsü teshidha le! Mathu na Anyiza Tsawa pi kross miwi jen neng nu ma pi anyithu tu wi kejügheya thsü keben ghena mangla sa nu mathu ssi neng gho leben khapeghe nengya thsü nben.

⁷ Anyiza na sawegü pi ayyi miwi chi nu atsanghoju kechi tsü pvüya nu aghang-wenjja shigü pi alli tsü kecahthu ghena kemehaiwa sa cüden.

⁸ Isala ciwi aghazü nu kepaghathu na shigü shagha lethu, tsüna ma men nmidha; tsüna Anyiza kishen-keshi pvüya nu anni pi yasa keten kemessi bendha.

⁹ Isala ketizen ipvüshangthu, ikhang na hati khi lela ikhang na nthu cüki meshenben. Nthu hangshakeya wi nthu na kesawegü kemehaiki ben kesa ikhang na chüben.

¹⁰ Anyiza na nkemeshon sa nten. Nthu na kemethathu wi ma ghena kuli nu kiqa cü nu ketizen pi ccücachi kesa tsü nu khilila sa keben tsüti Anyiza na malia nben.

¹¹ Ikhang kenmvu ketiwa na nthu pala ghang kebenthu tsü ntsakhiwa ghoya thsüle kesalina nthu meshu kesüsü alebenchi sen wa asakhen cuyalo.

¹² Ikhang na nthu ya nontssü nben thsü mvu, isala nondi nu kethankehiya ketenthu ti sa nu Anyiza na khishiketheng tsü muyalo.

Anyiza na Khishikechi Tsentsa

¹³ Anyiza na Abraham wi ma mangwa sale ben khe ajühkhukechi nu kishen. Thola ma miwi kediki nkemi ghena ma ketanla ma nyan sen nu kishen.

¹⁴ Ma khi, “Hi sawegü pi no cüden, nu ashicübvügha ji ntsa pi no cüden.”

¹⁵ Abraham na kethankehi ntsa sa nu Anyiza jühkhukechi tsü yaya.

¹⁶ Anyi kesü na kishen lethu, ma miwi kedikiwa nyan tsü senden, isanu kekishen tsüna kicennali tsüdila südheden.

¹⁷ Ajühkhukechi tsü muya ketenthu wi Anyiza na ma kemeshen tsü kemili nten kesa pi methasi chü thsü mvu kesalina ma kekishen kesü pi tsü wwa neng.

¹⁸ Isanu pala kemiliya nketen ha keni wina Anyiza na milimesa meyacha. Tsalina ithu ma wi keyazi muya kesathu kechü-kenong ntsa nu kaghang pi ithu tu wi chi kethengwa tsü zükeqhe ghansenya thsüden.

¹⁹ Ithu na ithu kahang ghena ha adajen kesü ti sayadha. Tsüna yazishu nu chütiben, nu tang kekinyijjen jenka keshonthsü pvüdhi sen nu kekinyipen non ntsa wi duyaben.

²⁰ Jisu na ithu mithon sa ithu tu wi na ciwi dudha, nu ma Melkhizedek keqhaikediyen wina anuphan keqhaikedi ntsawa tsü sayadha.