IBRINYI 5 - Kemethajüh (N) (Re-editing) Bible (BSI)

¹ Keqhaikedi ntsawa tsüdila mathu nyithu jawi kessi pi mathu kuti sala Anyiza kekuli sa, mathu kesami ghena ahhanshathu sa, nu kekinyi sa thsüden.

² Ma la alen kejon wi nkekhang ghena ma ccapeyi nu nkechü nu sazzi ketenthu kiqaya mehai.

³ Nu ma lela nkekhang ghena ma anyithu kesami ghena ketan nyela ma ketanla ma kesamithu ghena la ahhanshathu nsathu yishü.

⁴ Anyi thola ma ketanla ma kessi pi kekinyikü keqhaikedi ntsawa tsü saya nten. Aaron na kesa ti Anyiza na cikeya wi ketan anyi kesü tsü pi keqhaikedi ntsawa sa thsüden.

⁵ Tsü makesü Khrista la ma ketanla ma pi kekinyikü keqhaikedi ntsawa tsü sa meya, isala Anyiza na ma wi khi, “No iTsa, hi nansü nten na nBa sayadha.”

⁶ Ma apen kepa wi la hati khi, “No Melkhizedek keqhaikediyen wina anuphanla keqhaikedi kesü saben.

⁷ Jisu na ayyi wi kahang tsü wi ma misikhhali qai nu ma nyontssü lle sen nu kekhie sa kechi wi Anyiza na keshü wina ma hangshaya. Kepaghenanye ma satemeni nu lebenchi ntsa kesa wi Anyiza na ma kekhie kina cü.

⁸ Isala ma Anyiza Tsawa sa lela ma ketizenkesa wina ayenkeca jjügi chüya.

⁹ Ma sa pi haicencu kecü wi ma ma jühkina ketenthu tsüdi ghena anuphan hangshakeya bvüwa tsü saya,

¹⁰ nu Anyiza na ma pi Melkhizedek keqhaikediyen wina keqhaikedi ntsawa sa thsüa.

Kenondi Teshikea ghena Kekitsan

¹¹ Ciwi ikhang na ha cüki kekhi-u kejonla ben, isala nthu na pala chüshiyale kesa dhu ntsa sa keten ghena tsü khimetha pi nthu kizale kesa dhuben.

¹² Kepaghenanye khili tsü wi ha nthu na nyu kesansithu kesa-u sadha, isala nthu na khilila nyu ya Anyiza ketsijüh atuwa tsü pi nthu kesansi thsü-u saben. Nthu na khili kecu atsse kekhang nyela tsenitssü kejjü-u saben.

¹³ Anyi thowa na ma atsenitssü ketan jjü nu hangten khe ma khilila ghanyi kesü saben, nu ma kemehai keteshi jjügi tsü mangla npi sanan.

¹⁴ Isala atsse kekhang tsüna anyi keqhai, mathu kuli kenan wina kemehai nu nkemehai chü kepapa saya ketenthu ghena.