IBRINYI 13 - Kemethajüh (N) (Re-editing) Bible (BSI)

Khati nu Anyiza Kenen sayaben

¹ Khristanyi cünyuthu ti ketizenli tenlo.

² Anonkeghe sala kijünyi thu ssi pi njjen wi kechi accükwenshü nsala, kepaghenanye kheni anyi pahan tsüti kesa wi nchüla tangnyilothu ssiya.

³ Nthu la atssüzü sa kebenthu gweghe keben ti mathu cüki meshen tenlo. Ketizen sa kebenthu ghena nthu la ketizen sa keben ti mathu cüki meshen tenlo.

⁴ Anyi tsüdila keshanyi yen tsü kinyikü kesa-u; nu wubanyi khokho tu wi jühtsentsa salo. Anyiza na kahang nmetha nu qheza-qhena ketenthu jühkaghaten ben.

⁵ Nthu kahang wi apisa ntepaghala, nu nthu kebenwa tsü pi nthu leben-ghashu saben tenlo. Kepaghenanye Anyiza na khiben, “Hi khiela nthu malia nu teshia nben.”

⁶ Tsalina ithu kempvüza sa nu khi nalo, “Apvüwa na hi kekiqawa, hi messi meyacha. Thowa na imiwi mangwa saya mehai nu?”

⁷ Kheni nthu ccülikesathu Anyiza ketsijüh khi pi nthu kekizathu tsü meshenchilo. Mathu na khati hang nu shüdha khe meshenchi nu mathu kenondi ti sayalo.

⁸ Jisu Khrista na ghanie, nansü, nu anuphan la makesü.

⁹ Kesansijüh len kepapa kesa kejon pi nthu ssideja nben thsüla. Kedsakejjü yen kenie wi nyela Anyiza nanketizen wina anon wi kekhang mu keyawa mehai; kepaghenanye kedsa kejjü yen nie ketenthu na ciwi mathu kekiyi mangla mu meya.

¹⁰ Keqhaikedi anithsüjjen wi kekuli sa ketenthu na ithu kekinyipen wi ahhansha kesa tsü kedsa ayen nmi.

¹¹ Keqhaikedi Kemisintsa na asa jjü tsü sengho Kemetha ntsawa Pen wi kesamithu ghena ahhansha sa, isala asa kamangthu tsü pi kemnanpen na ameiwa mecang den.

¹² Ha jjügi ghena Jisu la ma jjü pi anyi kesami wi kebenthu satemetha le kesalina ma anyunuti na ameiwa shü.

¹³ Tsalina ithu la kemnanpen na ameiwa wa nu ciwi ma gweghe kejüghe keya tsü sa nalo.

¹⁴ Kepaghenanye ayyi he wi ithu ghena kahang chu nyunuti tsü nmi; isala ithu na anyunuti gho ketenwa tsü ghang ben.

¹⁵ Isalethu, ithu na keshüthangla Jisu wina keseng pi ahhansha ti sa pi Anyiza cü nalo, tsüna ithu pang pi ma Apvüwa le khishü pi kekinyiju kesa.

¹⁶ Kesü kesü ghena kemehaiwa sa nu kiqali nmalila, kepaghenanye hathu ha ahhansha kesathu Anyiza kenen sayaden.

¹⁷ Nthu ccülikesathu jühkina nu mathu ahza khukechithu tsü nielo. Mathu kekuli cüki pi Anyiza wi chi keten ghena mathu n-nganla nthu kahang tsü hieki benden. Keujüla nthu na mathu jühkina lethu, mathu na anonghethi mathu kekuli saben; nyelethu mathu na ahathanathi sathu nthu ghena kekiyi mangla nmilaben.

¹⁸ Ikhang ghena kekhie saki ben tenlo. Ikhang na matsü tsüdi wi la kemeshonwa sa mvu kesalina ikhang kemeshen methasi ben kesa ikhang na chütiben.

¹⁹ Tsü miwi la hi nthu wi khie ntsa kebenwa na Anyiza yala wan hi kesun pi nthu wi chicülo kesa kekhie sabenlo.

Kekhie Sakhen

^20-21 Anyiza na keshü wina ithu Pvüwa Jisu sa pi hang neng cü, ma ahhansha sa keshü wi anuphan Cenkethenjüh tsü sa keya ghena ma Anenikehie Ketiwa tsü saben. Kecca Nyiza yala nthu ma kenenwa tsü saya thsüle kesalina nthu nsenthu keyishü pala kemehai tsüdi pi nthu kecüwa sa, nu Jisu Khrista wina ithu wi kuli keben tsü ma kenenwa sayalo. Nu anuphan nu anuphanla Jisu Khrista nyanthang keyawa salo! Amen.

Ajüh Sakhen

²² Icünyuthu, hi nthu na kethankehi nu kechü-kenong ketsijüh hawa ha kinachilo khiben; kepaghenanye hi zhümelute sa pi nthu cüben.

²³ Hi nthu ya ithu cünyuwa Timothi na atssüzüjjen wina shhugho kesa tsü chüya thsü mvuben. Keujüla ma wan gho lethu, hi ma ssinu nthu wi ghoben.

²⁴ Shalom pi nthu ccülikesathu nu Anyiza nyithu tsüdi cüben. Itali wina kegho apvüshangthu na nthu shalom saben.

²⁵ Anyiza nanketizen ya nthu tsüdi ssiben ketenwa salo.