IBRINYI 10 - Kemethajüh (N) (Re-editing) Bible (BSI)

¹ Judah nyi Yenwa wi tsü pala kemehai gho keten ghayenwa ketan na ben, tsüna atsentsa tsi ntsakhiwa nye. Ahhansha kesathu tsü amapi kaghapenla makesü saneng-saja benden. Isathu, khati nu Ayenwa nie nu ahhansha kesathu tsüna anyi Anyiza wi keghothu sa pi cencu thsüya mehai nu?

² Keujüla anyithu na Anyiza kinyi keben wi tsü ntsakhiwa mathu kesami satemetha lethu, mathu kesami tsü nmeshen nengla, nu ahhansha kesathu tsüdila nsala kesa.

³ Isala amapi kaghapen ahhansha kesathu tsüna anyithu ya mathu kesami meshenya thsüden.

⁴ Kepaghenanye amesü süpon nu aneni jjü na khiela kesamithu tsü sen bvüya nben.

⁵ Ha jjügi ghena Khrista na ayyi wi gho keten wi ma Anyiza wi khi, “No ahhansha kesathu nu kekinyi juthu tsü meya mvu, isala no ighena agwo kesü kiden pi thengdha.

⁶ No asahang maben pi kekinyipen miwi kemecang, nyelela kesamithu sen bvüale ahhansha kesathu tsü n-nen.

⁷ Tsaseng wi hi khi, ‘O Anyiza, Ayenwa lesüshen wi ighena zhü ketheng tsüti hi he wi no kenenwa tsü sale ben.’ ”

⁸ Ma atuwa khi, “No ahhansha kesathu nu kekinyi juthu tsü meya mvu, nyelela asahang maben pi kekinyipen miwi kemecang nu kesamithu sen bvüale ahhansha kesathu tsü n-nen.” Ahhansha kesathu ha tsüdila Ayenwa kenie wina sachi lela ma hati khi.

⁹ Ma tsaseng wi khi, “O Anyiza, hi he wi no kenenwa tsü sale ben.” Tsalina Anyiza na ahhansha kesa kaghawenthu tsüdila yasa nu Khrista hhansha kesa pi tsüthu kuti sa.

¹⁰ Kepaghenanye Jisu Khrista na Anyiza ma ya sa thsü mvu keben tsü sa, ma ma gwo pi kutitan anuphan ghena ahhansha sa kechi wi kesami wina ithu tsüdi satemetha cüdha.

¹¹ Judah nyi keqhaikedi tsüdila ghanan kaghapen ma kekuli tsü sa nu ahhansha kesathu tsü saneng-saja benden, isala ahhansha kesathu ha khiela kesamithu tsü sen bvüya nten.

¹² Isala Khrista na anuphan ghena kesami hhansha kesütan sachi nu wala Anyiza kwen ajewa ben wadha.

¹³ Ma khili ciwi Anyiza na ma ghinyithu pi ma ccü kennipen sacü keten tsü hie ben.

¹⁴ Ma ahhansha kesütan sa kechi wina anuphanla kesami wi kebenthu tsü satemetha cencu cüdha.

¹⁵ Nu Kemetha Ghamu la ithu wi ma chüza saben. Ma khi tegüwa na,

¹⁶ “Apvüwa na khiben, hi atsathang gho keten wi mathu ssinu Cenkethenjüh sa ketenwa tsüna ha: Hi iyenthu tsü pi mathu kemeshen wi chicü nu pi mathu leben wi zhüki cüden.”

¹⁷ Tsaseng wi ma khi, “Hi mathu kesamithu nu nkemehai kekulithu tsü nmeshen nengdha.”

¹⁸ Tsalina hathu ha teshi pi kecü seng wi kesami keteshi kekinyiju tsü nsala mehaidha.

Ithu Anyiza Tetsaki gho nalo

¹⁹ Tsalina icünyuthu, Jisu keshü ghena ithu na Kemetha ntsawa Pen wi duya mehaidha.

²⁰ Ma ajjen keshonthsü, tsüna ma gwo wina alen ketheü, kahang ketheü len kesü shachi pi ithu cüdha.

²¹ Ithu na Anyiza jjen kehiewa keqhaikedi kesü ben.

²² Tsalina leben tsentsa nu kenondi tsentsa, kemeshen nkemehai satemetha nu atssü kemetha pi agwo sametha kesa leben pvü nu Anyiza tetsaki wa nalo.

²³ Ithu kaghang khishi ketenwa tsü zükeqhe ghansenya nalo, kepaghenanye ajühkhukechiwa Anyiza na jühtsentsa senden.

²⁴ Ithu khokho cüki kemeshenli nu kekiqali pi ketizenli, nu kekuli kemehaiwa saten nalo.

²⁵ Pahan na sa keten ti ithu na saghu kemetuli keten yen tsü nteshila nalo. Tsüti kesawa nye, Apvüwa tsathangwa tsüna tetsaki gho keten ghena ithu ha miwi la khokho kechü-kenong benten nalo.

²⁶ Kepaghenanye atsentsawa pi ithu chü thsü kesa seng wi keujüla ithu na aghandu sami wa lethu, ciwi kesamithu sen bvüale kesa ghena ahhansha kesa mangla nmidha.

²⁷ Tsüti kesawa nye, Ajühkekaghaten kemessi nu anni kekhang na Anyiza shun ketenthu mecang keten tsü hie keben ketan le!

²⁸ Anyi thowa na Mosa Yenwa tsü yasa khe meshu keni kecheng na kesazzi chüza sa kechi seng wi nanketizen nmila pi shü thsüden.

²⁹ Isalethu, anyi Anyiza Tsawa pi ma men nkemi sa, ajjü pi Anyiza Cenkethenjüh sa nu kesami wi ma satemetha ketheng tsü pi lekete sa, nu Aghamu nanketizen then ketenwa tsü khati saben nu? Meshenchilo, ma kemeten-kemesha nkemehai khacu muya qo nu!

³⁰ Kepaghenanye ithu na hati kekhiwa tsü chüben, “Hi ajukhi yaden, hi tsü pi cü neng den”; nu ma ha la khi, “Apvüwa na ma nyithu ghan-nan ben.”

³¹ Hangkebenwa Anyiza kwen wi khulidu kesa tsüna qhethiketen kesü saben le!

³² Nthu na kheni khati sa khe tsü meshen yalo. Tsü tsüwi Anyiza kewegü na nthu miwi kegho seng wi nthu na ketizen kejon sa lela tsüna nthu miwi khang meya.

³³ Tsü tsüwi anyithu tu wi na nyu nthu kimenni nu meten-mesha, nu kuti wi tsü nthu na nyu mathu miwi hati sa kebenthu tsü gweghe le sa.

³⁴ Nthu na atssüzüthu gweghe ketizen sa, nu nyu na nthu tsanqaithu pigheya lela anonkeghe sa nu kekhenengya, kepaghenanye nthu na pala tsü miwi kemehaiki anuphan ben keten ji benyadha kesa chüben.

³⁵ Tsalina nthu kempvüza tsü nteshi lalo, kepaghenanye tsüna akutimen keti sengho cüden.

³⁶ Nthu na Anyiza kemeshenwa tsü saya nu ma jühkhuchi ketheng tsü muya le kesalina kethankehi meyathu yishü.

³⁷ Kepaghenanye ntsawajüh na khiben, “Matsü keu ketan benla nu ghole kebenwa tsüna ghoa tendha; ma minuten nben.

³⁸ Inyi ketsatanthu na nondi nu hang yaben; isala keujüla mathu thowa na asenkheneng khe hi ma miwi anonghe nben.”

³⁹ Ithu na anyi asenkhenengwa nu bhatagha kesathu nye, isala ithu na kenondi ben nu hangshaya kesathu.