IBRINYI 1 - Kemethajüh (N) (Re-editing) Bible (BSI)

Anyiza Tsawa wina Ma Jühthu

¹ Kheni tsü wi Anyiza na alen kejon wi kejon tughula atusenjüh-kechüthu wina ithu bamyithu ccüneng,

² isala asakhen tsathang hathu wi tsü ma Tsawa wina ithu ccüneng chidha. Anyiza na ma wina atssan ayyi sachi, nu ma yala asakhen wi pala tsüdi ghong keyawa saya thsüle Anyiza na ma kessiyadha.

³ Ma Anyiza nyankethang kekizah tsü wegü neng chicü nu Anyiza tsiyen tsü pvü nu ma jüh kekhang sen nu atssan ayyi ghansen benden. Ma anyithu kesami keteshi tsü sacen keya seng wi wala tang wi Kemisi kekhang ntsawa Anyiza kwen ajewa ben wadha.

Anyiza Tsawa Kedi

⁴ Anyiza na Atsawa tsü sa pi tangnyilothu miwi diki, nu ma nyan lela mathu miwi kemehaiki pi ma cü,

⁵ kepaghenanye Anyiza na khiela ma nyilothu wi hati nkhi, “No iTsa; hi nansü nten na nBa sadha.” nyelela Anyiza na tangnyilo kesü cüki la hati nkhi, “Hi ma Ba saden, nu ma itsa saben.”

⁶ Isala Anyiza na ma Tsa tssütsewa kesun pi ayyi wi chicü keten wi ma hati khi, “Anyiza nyilothu tsüdila ma nkinyithu yishü.”

⁷ Isala Anyiza na tangnyilothu ghena khi, “Anyiza na tangnyilothu pi ameghü sa, nu ma ketsikinathu pi annikeqhe sachi.”

⁸ Isala Anyiza na Atsawa cüki khi: “O Anyiza, no kadiyyi na anuphan nu anuphanla benden! No ketsatan sen nu n-nyithu miwi kadisa den.

⁹ No kemeshon tsü nen nu kesazzi tsü nanmeghü. Tsalina Anyiza n-Nyiza na no kessiyadha, nu npvüshangthu miwi anonkeghe kekü di ntsa pi no cüdha.”

¹⁰ Ma hati la khi: “Apvüwa, no, adechhü wina ayyi sachi, nu nkwen pi atssanthu sachi.

¹¹ Tsüthu na nmilaben, isala no tsü benden; tsüthu tsüdila athsümeni ti ghawen waben.

¹² No tsüthu pi athsü ti llu yaben, nu tsüthu na athsü ti kemiliaben, Isala no anuphanla makesü, nu no kahang khiela asakhen sa nten.”

¹³ Anyiza na ma nyilothu kesü wi la hati nkhi: “Hi nghinyithu pi nccü cakhu wi npi kechi chu hewi ikwen ajewa donki benyalo.”

¹⁴ Isalethu, tangnyilothu na khati kesa nu? Mathu na Anyiza ketsikina keten ghamuthu, nu mathu kesun pi wala hangshakeya yaya ketenthu kiqa thsüden.