HOSEYA 7 - Kemethajüh (N) (Re-editing) Bible (BSI)

¹ “Hi khathansha wi inyi Israel sapi mehai cü nu mathu sapi ben kayi nengya thsü mvu keshagha wi hi tsüdila mathu gheshighena nu mathu nkemehai kekuli ketan muden. Mathu na khokho kemechuli; mathu na ajjenthu pasa nu ghanfü; mathu na alentonti wi anyithu tengya.

² Hi nkemehai ha tsüdila meshen benle kesa tsüna mathu hashhu wi la du meya; isala mathu kesami na mathu vüshakhi ben, nu hi mathu nmula le sa meya.”

Kadijjen wi Achokesa

³ Apvüwa na khiben, “Anyithu na mathu cho nkemehai pi kadimiwa nu ma kekhu wi kedithu mechuden.

⁴ Mathu tsüdila aghe-nmehai nu ayen-nkeca ketan. Mathu nankemeghü tsüna annibhon kesü wi amesa kegüwa na awheng pi amesa güle npi kidenkeya chu anni moteqhe nchila khu keben ti kesa.

⁵ Kadimiwa kemishu kesa ghanan wi mathu na kisengtssü pi kadimiwa nu ma kekhu wi kedithu ya jjüpi adina nu kejüphon sa thsüa.

⁶ Anle, mathu na mathu cho kiden pi annibhon kesü ti mecang ben. Ghaja thangthang mathu lebenketsu na khubenla nu ghanenwa wi qhe shaghaden.

⁷ “Mathu na mathu lebenketsu wina mathu kekhang kesenthu pathi. Mathu na kadimithu kesüsü tsüdila pathidha, isala thola hi wi kekiqa nkhie.”

Israel nu Mizzatentithu

⁸ Apvüwa na khiben, “Israel nyithu na amesa be kesü gütu ketheng tile. Mathu na mathu kevü wi mizzatentithu maghaki,

⁹ nu mathu na asangthu kemaghaki tsüna mathu kezü tsü ghanfü yadha kesa nchü. Mathu tsathang siyadha, isala mathu na tsü lela nchü.

¹⁰ Israel nyithu wikesa na magha pi mathu matangben. Pala tsüdila tsüti saben lela mathu na mathu Pvüwa Anyiza, hi wi kheneng ngho.

¹¹ Israel na tuktur kesü ti jeng nu yazishu mechu yaden; ma nyithu na atuwa Egipt wi kekiqa khie, tsaseng wi mathu na Assiriya wi bvü wa!

¹² Isala mathu na wa keten wi hi kaghanthsü kesü zanshigü pi awathu ti mathu ghanyaden. Mathu na nkemehai kuliketheng ghena hi mathu meten cüaden .

¹³ “Mathu na saya tendha! Mathu na hi teshi nu hi matang ben. Mathu yasa ben. Hi mathu hangshaya mvu sa, isala mathu hi kekinyi tsüna atsentsa nye.

¹⁴ Mathu na leben tsentsa sa nu hi wi nkhie, tsü mithon wi mathu na qancadu qai nu Anyiza nkechüthu kesa ti sa. Khathansha wi mathu na asu nu kisengtssü khie khe Anyiza nkechüthu ti mathu gwo handhi-hanghe saden. Mathu na khatila hi matang nu shun ben nu!

¹⁵ Hi mathu ghanja shagha nu mathu sapi zü kecüwa lela mathu na acho sapi hi matang.

¹⁶ Mathu na hi wina kheneng sennu kekhang nkemi acenpvü kesü wi wa wa saden. Mathu na nondi nkeya alamugho kefü kesü ti kesa. Kepaghenanye mathu ccülikesathu na awisathi keccünengli den, njünnu pi mathu süthiaben, nu Ejipt nyithu na mathu nankeqhe den.”