HOSEYA 6 - Kemethajüh (N) (Re-editing) Bible (BSI)

Anyithu na Atsentsa wi Leben khapeghe nkeya

¹ Anyithu na khiben, “Ithu Apvüwa wi kheneng wa na! Ma ithu patenadha, isala ithu sapi mehai neng cü metsi; ma ithu mesa-menadha, isala ma ithu yisüthu qhan cü metsi, ma isa nben kwe?

² Ghanan keni nu kecheng jüwi ma ithu sapi hang neng cüaben, nu ithu na ma ketenpen wi hang yaden.

³ Ithu Apvüwa chüyale sa nalo! Tsantheghi shagha metsi nu pathsü tsangho pi ayyi tencü metsi keten ti ma ithu wi ghoaben .”

⁴ Isala Apvüwa na khiben, “Israel nu Judah, hi nshinyi ssinu mangwa sale ben nu? Nshinyi hi kaghali na aghanen ajangcü ti wan nmiladen; tsüna akejan ti aghanan sa shagha meyi nmiladen.

⁵ Tsalina hi atusenjüh-kechüthu kesun chi nu ketizenkesa nu keyasa ketsijüh sennu nshinyi wi gho thsü. Hi nshinyi wi yamvu kebenwa na methasi nu mechanshu.

⁶ Hi nthu na asahang pi ahhansha kesathu nyela nthu na ghaliki kesawa tsü yamvu ben. Inyithu na mecang pi hi kekinyi miwi la mathu ya hi chüya thsü mvuben.

⁷ “Isala mathu na ayyiwa wi tsü duya meyi Adam ti hi mathu ssinu cenkethenjühwa tsü pakhhia.

⁸ Gilead na anyi nkemehai nu nyu kepathi nyi na pong keben nyunuti kesü.

⁹ Keqhaikedithu na kaghanfü zi kesü na anyi kesü ghena aghiceng keben ti kesa. Kemetha penwa Shekhem wi kewalen wi lela mathu na nyu kepathi kekuli saden. Nu mathu na aghandu nkemehai ha tsüdi saten le!

¹⁰ Hi Israel wi qhethiketenkesa kesü muyadha: inyithu na atsikezhüthu kekinyi wina mathu nakhidha.

¹¹ ‘Nu Judah nyithu, nthu na kuli kebenwa ghena la hi kemeten pi nthu cüle matsü kesü ssan pi thengdha.’