HOSEYA 4 - Kemethajüh (N) (Re-editing) Bible (BSI)

Apvüwa na Israel Kemetsi-meni

¹ Apvüwa na metsi-meni kesa sengho anyi ayyi hawi hang kebenthu matang den. Israel, ma mangwa khiben khe kinalo: “Ciwi leben tsentsa kesa nu kaghali na ayyi ha wi nmi, nu anyithu na hi Anyiza le kesa nchüladha.

² Mathu na ajüh kekhishüthu sa nu tsüthu bhegheden; mathu na milimesa, anyi pathi, ghanfü, nu keqheza kekuli saden. Kesazzi na jikayi, nu ciwi nyu pathi nu pathi neng neng kesa na ben.

³ Tsalina ayyiwa na keqha bvüdha, nu ciwi hangketen pala tsüdila shüaden. Aghangsathu, awathu, nu angathu lela shüaden.”

Apvüwa na Keqhaikedithu Kemetsi-meni

⁴ Apvüwa na khi, “Thola ya anyithu metsi-meni nyelela mathu nkha thsüla — ilebenketsu na no keqhaikedithu matang benle.

⁵ Nthu na ghaja ghanan nyu ji yasa, nu atusenjüh-kechüthu la nthu miwi mehaiki nsa. Hi nthu jja Israel yasa tendha.

⁶ Inyithu na dedi tendha kepaghenanye mathu na hi nchü. Nthu keqhaikedithu na hi chüya mvu nsala nu hi pi kesansijüh tsü hhaghea, tsalina hi nthu meya mvula nu nthu tsathu la pi keqhaikedithu nsa thsü laden.

⁷ “Nthu keqhaikedithu na jikayithu sami pi hi matang kayiden, tsalina hi nthu kenyuwakü tsüpi kejüghekeya ceng cüden.

⁸ Nthu na inyithu kesami miwi na benyaden, tsalina nthu na mathu sami kayi kesa tsü nenden.

⁹ Nthu na anyithu ti kemeten witsü ketizen saaden! Hi nthu meten cü nu nthu ya nthu kekuli nkemehai kutimen tsü dhi thsüden.

¹⁰ Nthu na ahhansha kesa wi nthu shei tsü dsaben, isala ghama benden. Nthu na ashicü cenpvü kinyi, isala atsanga benya nben, kepaghenanye nthu na hi wina kheneng sennu acenpvü kepathu kinyile wa kesalina.”

Apvüwa na Acenpvü Kepa wi Kekinyi tsü Kethen

¹¹ Apvüwa na khi, “Kisengtssü, kaghawen nu ketheü lela inyithu wi mathu chüshikeya tsü ghanfü bendha!

¹² Mathu na achan kesü wi ccücakechi tsü keüben! Akhhatssü kesü na mathu chüya mvu kebenwa tsüpi mathu kizaden! Mathu na hi teshidha. Kinyibvü kesü na keqheza menkedsa kesü sa wa kesa ti mathu na mathu pi acenpvü kepathu cüdha.

¹³ Mathu na ayikha shoni kemetha pen wi ahhanshathu sapi kinyiden, yyishiphon thu miwi achanton kesie nu ma cüna cü zighe keben cakhu wi hankedemvu mecangden, kepaghenanye tsüthu kekhwen na ccanonkwen! “Tsüti kesa ghena nthu ngathu na keqheza menkedsa kekuli sa, nu nthu cünyithu na shenpfü-nyibvü keqheza sa.

¹⁴ Isala ha ghena hi mathu meten nten, kepaghenanye nthu ketanla kekinyijjen wi keqheza menkedsathu wi wa, nu mathu gweghe Anyiza nkechü hhansha kesathu tsü saden. Ajühbvü wi kekhi ti, ‘Anyi pala chüshiya nketenthu na yasa den.’

¹⁵ “No Israel nyithu na hi wi jühtsentsa nsa lela, Judah nyithu tsü tsü makesü nkesawa salo. Gilgal nyelela Bethaven wi nkinyila, nyelela hangkebenwa Apvüwa nyan wina ciwi kekishen nsala.

¹⁶ Israel nyithu na gada kizzathu ti leben-dhu. Hi khatinu mathu pi khaghaneni zzathu ti accani jawi mathu ghanja nu?

¹⁷ Israel nyithu na atsikezhüthu wi ben wadha. Mathu ketanla mathu kesasa sa thsülo.

¹⁸ Kisengtssü kejon jjükeya sengwi mathu na kenyuwakü miwi nyankekinyen sala keqheza menkedsa kekuli kesawa mathu nonghe den.

¹⁹ Ameghü wina mathu mopi bvü kesa ti mathu na Anyiza nkechü hhansha kesathu.