HOSEYA 14 - Kemethajüh (N) (Re-editing) Bible (BSI)

Hoseya na Israel wi Kekhie

¹ Apvüwa nthu Nyiza wi kheneng gholo, Israel nyithu. Nthu kesami na nthu sapi accümeshü nu khuli thsüdha.

² Apvüwa wi kheneng gholo nu kekhie ha pi ma wi nthu kekinyi sa thsülo: “Ithu kesami tsüdila teshi cü nu ithu kekhie kina cülo, isalethu ithu na khishiketheng ti no sengden.

³ Assiriya na khiela ithu hangshaya nu aghi goruthu na ithu khweya nben. Ithu na khiela ithu tsikezhüthu wi mathu na ithu Nyiza le nkhi nengdha. O Apvüwa, no nanketizen pi tho wila nkewathu tsü ccücalo.”

Apvüwa na Israel ghena Kahang Ketheü Khishikechi

⁴ Apvüwa na khiben, “Hi inyithu ssinu hi wi ghoneng den, Hi ileben tsüdi pi mathu ghaliden; hi mathu miwi aghepvü nbendha.

⁵ Hi Israel nyithu tuwi ayyi keqha kesü wi atsankegho ti saaden. Mathu na athighithu ti pvüben; mathu na Lebanon wi achanthu ti aghazan cha pi zükeqhe benden.

⁶ Mathu na ketheü shigü sennu hang, nu oliv tonthu ti atsimehaitsü saaden. Mathu na ahandemvu pi Lebanon wi sedar chan ti saaden.

⁷ Kheneng kuti mathu na hi kekhwe cakhu wi hangden. Mathu na asu shigü nu kemeshentsse lli kesü ti abi bünya ben. Mathu na Lebanon kisengtssü ti anyankemechan saya ben.

⁸ Israel nyithu na atsikezhüthu sennu mangla kesa nmiladen; hi mathu kekhie yacü nu mathu noncca yaden. Jü wa nketen chanton kesü ti hi mathu kekhwen saya den; Hi mathu ghena kemihhi tsüdi bvüwa.”

Asakhen

⁹ Kemetsathu ya hawi mangwa zhütheng khe chüshi keyawa sa, nu mathu ya tsüpi aleben wi chi keyawa salo. Apvüwa lenthu na meshon, nu ketsatanthu na tsüthu kenie wina hangyaden, isala kesamithu tsü tsüthu nkhichi kesalina accümeshü nu khuliaden.