HOSEYA 12 - Kemethajüh (N) (Re-editing) Bible (BSI)

¹ Israel nyithu na aghanen na wala aghaja kecu kuli keten tsüdila ma men nmi nu keyasa ketan. Achoghe nkemehai nu yasayala kekuli na mathu jawi jikayiben. Mathu na Assiriya ssinu keponghu sa nu Ejipt ssinu asenli kekuli sa.’

² Apvüwa na metsi-meni kesü sengho Judah nyithu matang; ma Israel la ma nyithu kekuli ghena meten cüden. Ma mathu na mangwa satheng khe tsüpi dhineng den.

³ Mathu baqhaiwa Jakob na ma gweghetsa cünyuwa Esau manyi gweghe manyi jja pvünon wi keben wi ma ssikesali; Jakob na qhai keshagha wi ma Anyiza ssikaghanfü —

⁴ ma tangnyilo kesü ssikesali nu khangya. Ma qai nu kesawegü kesü khie. Nu Bethel wi Anyiza na ithu baqhaiwa Jakob wi gho nu ma ccüneng.

⁵ Hawa hana Apvüwa Anyiza Kekhang ntsawa — Apvüwa nyan tsüna nyu ma nkinyithu keyishüwa tsüle.

⁶ Tsalina khili Jakob shicübvüghathu, nthu Nyiza nondiya nu ma wi kheneng gholo. Ajühya nu meshon yalo, nu lebensie nu nthu Nyiza na kuli ketenwa tsü hielo.

Kekaghatenjüh Khineng Kechi

⁷ Apvüwa na khiben, “Israel nyithu na Kanaan nyithu ti jüh tsentsa nsen; mathu na atsentsa nkenye kewhu pi mathu ssinu asenlikesathu mechu kesa tsü mathu nenden.

⁸ Mathu na khiben, ‘Ithu na keban. Ithu na acenpvü kebenthu. Nu thola ithu na atsentsa nkenye wi keben mukeya tsü khipi ithu kimenni keya nmi.’

⁹ Isala hi Apvüwa, nthu Nyiza, Ejipt wina nthu ssi keshhughowa, hi ayyikeshü wi nthu wi kegho wi nthu na sa kebenla tsüti hi nthu sapi anithsüjjen wi hang neng wa thsüaden .

¹⁰ “Hi atusenjüh-kechüthu ccüneng nu kemanthi kejon pi mathu cü, nu hi atusenjüh-kechüthu miwi na kekitsan pi inyithu cü.

¹¹ Isala Gilead wi atsikezhüthu kinyiben, nu tsüthu kinyi ketenthu na shüaben. Gilgal wi anyithu na amesü süponthu pi ahhansha saaben, nu ciwi kekinyipenthu tsüna agheja wi alonthu pi kaghakhwen kethengthu saaben.”

¹² Ithu baqhaiwa Jakob na Mesopotamia wi bvü wa, ciwi awubvü yale kesa ghena anyi kepa kesü kekuli sa nu ma khaghanenithu noncca.

¹³ Apvüwa na atusenjüh-kechü kesü kesun pi Ejipt wi nssümagha sa keben Israel nyithu kekashaya nu mathu noncca thsü.

¹⁴ Israel nyithu na Apvüwa sapi ma lebentsu ntsa sa thsüa; mathu kesazzi ghena keshü muya qo. Apvüwa na mathu na kejüghekeya sengho ma miwi kechi ghena ma mathu meten cüden.