HOSEYA 11 - Kemethajüh (N) (Re-editing) Bible (BSI)

Anyiza na Ma nyi nyu Kematangthu Kaghali

¹ Apvüwa na khiben, “Israel na ghanyi kesü sa keben wi hi ma ghali, nu Ejipt wina ma cishi pi itsa saya.

² Isala hi ma keci shathu, ma hi wina bvü kayi. Inyithu na ahhansha sapi Baal cü, mathu na hankedemvu mecang pi atsikezhüthu cü.

³ Isala Israel sansi pi alentsenya kethsüwa tsüna hi. Hi ikwen wina inyithu pieya, isala mathu na hi mathu noncca kecüwa le kesa nchüla.

⁴ Hi nanketizen nu kaghali pi mathu juya. Hi mathu pieki pi idhebi miwi keli; hi nkhwencadu nu mathu ghanja cü.

⁵ “Mathu na hi wi kheneng ngho mvu, tsalina mathu na Ejipt wi kheneng wa nu Assiriya na mathu miwi kekhang senben.

⁶ Aghi na mathu nyunutithu thsübhon nu mathu nyunuti khwetithu pashaben. Tsüna inyithu yasaben, kepaghenanye mathu na mathu tuwi mangwa mehai khe tsü sa waden.

⁷ Mathu na hi wina bvüale khvu saden. Mathu na asunkeqhan mathu miwi kebenwa tsü ghena qaiben, isala thola mathu miwi tsü khushiya nben.

⁸ “Israel, hi khati no teshiya mehai nu? Hi khati no yishaya mehai nu? Hi Admah miwi kesa ti no yasa nyelela hi no pi Zeboiim miwi kesa ti sa kwe? Ileben na hi ya tsüti sa thsü nben! Hi no kaghaliwa tsüna khang mtsü.

⁹ Hi ileben ketsu wi no meten nben; hi Israel yasa neng ntendha. Kepaghenanye hi Anyiza khe anyi nye. Hi Kemethawa, hi no ssiden. Hi ileben ketsu sennu no wi gho nben.

¹⁰ Inyithu na hi khathansha wi mathu ghinyithu wi ssensitemi ti magha khe mathu na hi nieben. Mathu na nishu wiwa na kaghajila hi wi ghoaben .

¹¹ Mathu na Ejipt wina awathu ti nu Assiriya wina nkhetsüthu ti mbhi ntsa ghoaben . Hi mathu ssineng ghola mathu jjen wi chiaben . Hi Apvüwa, hi khidha.

Israel nu Judah Kemeshensa

¹² Apvüwa na khiben, “Israel nyithu na milikemesa nu kemechu pi hi vü, nu Judah nyithu na khili kecu hi atsentsa nu kemetha Nyizawa matang ben.”