HOSEYA 10 - Kemethajüh (N) (Re-editing) Bible (BSI)

¹ Israel nyithu na kemeshentsse ton kesü ma bi na bün bhon keten ti sa keten. Mathu na mehai kayithu, kekinyipenthu jipfü sa. Mathu yyi na mehai kayithu, mathu na kinyi keten lonkeshengthu tsü sapi atsimehai pfü sa.

² Anyi thothu na nyu kemechu leben pvü ten khe khili mathu kesami ghena ketizen nsathu yishü. Anyiza na mathu kekinyipen pasha nu mathu lonkesheng kemethathu tsü yasa cüden.

³ Anyi hathu hana wan hati khiben, “Ithu kadimiwa nmiladha kepaghenanye ithu na Apvüwa nmessila. Isala kadimiwa kesü na ithu ghena mangwa saya mehai nu?”

⁴ Mathu na ajüh kaghacang khishi nu khishikechi milikemesathu nu nsenla kemehai kenponghuthu saden. Atsentsawa tsüpi atsentsawa nkenye sa, keca lli kesü wi kepagha nkemehaithu na shigü shagha keben ti.

⁵ Anyi Samaria nyunuti wi hang kebenthu na messiben nu Bethel wi suna pi kesa amesü süponwa tsü kededi ghena anongü ben. Mathu nu atsikezhüwa kekuli sa keten keqhaikedithu na tsü qaikiben. Khathansha wi suna tsikemehaiwa tsü khusha pi khe mathu na qaiben.

⁶ Atsikezhüwa tsü pvü nu keküju kesü sala Assiriya kadimiwa wi waten. Israel na nie kegho kesansijühwa tsüghena kimenni nu kejügheya yaben.

⁷ Ma kadimiwa ssinu atssü na achan lle pie bvü keten ti saaben.

⁸ Aven yyishiphon shoni wi Israel nyithu na atsikezhü kinyi keten penthu tsü yasa ben. Mathu kekinyipenthu miwi aghazü nu kepaghathu na shigü shagha ben. Anyithu na ayikhathu wi “Ithu pi khuthi yalo!” nu yyishiphon thu wi “Ithu shanbhon yalo!” isa khiben.

Apvüwa na Ketizenkesa khipi Israel miwi Kechi

⁹ Apvüwa na khiben, “Israel nyithu na Gibea wi mathu kesami tsü nten na sami pi hi matang kesa npi handhi. Tsalina Gibea wina mathu ssinu aghisa shaghaden.

¹⁰ Hi kesami ntsa nyithu ha ssisa nu mathu meten cüden. Mizzatentithu saghuya nu mathu matangden, nu mathu kesami kejon tsü ghena kemeten muyaden.

¹¹ “Israel na kuti tsüwi sansi kemehai sa ketheng mesü kesü na asu ghaceng mvu keben ti kesa. Isala hi asun keqhan kesü pi ma sun tsikemehai miwi chi nu kekuli kekhang sa thsüle südheya. Hi Judah ya ayyi chhü nu Israel ya ayyi cü pacha thsü.

¹² Hi khi, ‘Nshinyi ketanla nshinyi ghena ayyi ketheü chhü, ketsatanwa tsüpi shengchi, nu nshinyi na hi kekinyi ghena muya keten kemihhiwa tsü wwiya. Hana nshinyi na kheneng sennu hi, nshinyi Pvüwa wi gho nu hi gho kesawegü meyisha pi nshinyi miwi chi kecü matsüwa tsüle.’

¹³ Isala tsü mithon wi nshinyi na nkemehai pi shengchi nu tsü bi wwi yadha. Nshinyi na milikemesa wina bünkeya bithu tsü dsadha.” Kepaghenanye nshinyi na nshinyi goru garithu nu süpahithu kejon keben tsü nondi,

¹⁴ aghi na nshinyi nyithu wi gho, nu nshinyi khwetithu tsüdila yasa ben. Tsüwa tsüna Kadimi Shalman na aghi wi Betharbel yasa nu ajjathu nu mathu tsangathu pacha pi shü thsü kesa ghanan tsüti saaben.

¹⁵ Nthu miwi saa keten tsüna tsüti le, Bethel nyithu, kepaghenanye nthu na nkemehai qhethiketen kesa tsü sa kesalina. aghisa shagha meyi Israel kadimiwa na shüaben.’