HOSEYA 1 - Kemethajüh (N) (Re-editing) Bible (BSI)

¹ Apvüwa na ketsijüh hawa ha Uzziya, Jotham, Ahaz, nu Hezekiya na Judah kadimithu sa, nu Johoash tsa Jeroboam na Israel kadimiwa sa keben tsüwi pi Beeri tsa Hoseya kecü.

Hoseya Wubvü nu Atsangathu

² Apvüwa na Hoseya miwi na Israel ccüneng tegü wi ma Hoseya wi khi, “No wala awubvü yayalo; nwubvü na leben tsentsa sa nben, nu ntsangathu na ma ti saaben. Tsüti inyithu na hi teshi nu leben- tsentsa nsaladha.”

³ Tsalina Hoseya na wa nza kesü Diblaim nga ma nyan Gomer kesa tsü yaya. Manyi tsa atuwa npvüza pvüghakeya seng wi

⁴ Apvüwa na Hoseya wi khi, “Ma nyan pi ‘Jezreel’ ciya, kepaghenanye ma baqhai Jehu na Jezreel wi anyi kepathithu tsüghena hi matsü kesie nsala Israel kadimiwa meten cü tendha. Hi Jehu kadishi

⁵ nu hi tsü tsüwi Jezreel Yyiketijü wi Israel süpahizi kekhang tsü yasa cüden.”

⁶ Gomer na anga keniwa nza kesü muya. Apvüwa na Hoseya wi khi, “Ma nyan pi ‘Nkaghali’ ciya, kepaghenanye hi kaghali pi Israel ccüca nyelela mathu kesami teshi pi cü ntendha.

⁷ Isala Judah nyithu wi tsü hi kaghali pi ccücaden. Hi Apvüwa mathu Nyiza, hi mathu hangsha yaden, isala tsüna hi njünnu, nyelela alamugho nu alakusü nyelela goruthu nu goru kessithu pi aghisa nu tsü sa nten.”

⁸ Gomer na ma nga noncca pi zükeya sengwi ma atsa npvüya nu atsa kesü pvüghaya.

⁹ Apvüwa na Hoseya wi kiza, “Ma nyan pi ‘Inyi nye’ ci yalo, kepaghenanye Israel nyithu na inyi nye nu hi mathu Nyiza nye.”

Israel Ssinengya keten

¹⁰ Israel nyi na ji pi atssükedone wi ahachan ti sa nu si nkeyakhi nyelela ketegü nkeyakhi saaden. Khili Anyiza na mathu wi khiben, “Nthu na inyi nye,” isala atsathang kesü na ghothu ma hati mathu wi khiden, “Nthu na hangkebenwa Nyiza tsangathu le!”

¹¹ Judah nyithu nu Israel nyithu na kheneng ajühjja keyali yaben. Mathu ketanla mathu ghena kemehai accülikesawa kesü kessiya, nu mathu na kheneng mathu yyi wi mehai neng yaden. Anle, Jezreel tsathangwa tsüna atsathang keti kesü saaden!