HAGGAI 2 - Kemethajüh (N) (Re-editing) Bible (BSI)

Kekinyijjen Ketheüwa Tsikemehai

¹ Tsü mapi asha tagüwa, nkwe nu kesü ghanan wi Apvüwa na kheneng atusenjüh-kechüwa Haggai wina khi.

² Ma Haggai na wa Judah wi ahngwa Zerubbabel, Keqhaikedi ntsawa Joshua, nu anyithu wi khilo kiza,

³ “Nthu jawi anyi kesüla kheni Kekinyijjenwa tsü khatila mehai khe meshen ben ma? Nthu na khili tsü khati muben nu? Tsüna ghang pi mangla nkenye ti sadha.

⁴ Isala nthu kesüla accükwen nshü lalo. Kepaghenanye hi nthu ssi benten na kekuli salo.

⁵ Khathansha nthu na Egipt wina shhugho khe hi keshüthangla nthu ssiten le kesa nthu wi khishitheng. Hi khili lela nthu ssitenna nthu nmessi lalo.

⁶ “Matsü kesie nsala hi atssan, ayyi, atssükedone, nu ayyi keqha zankeju chi cüden.

⁷ Hi mizzatenti tsüdi yasa nu mathu keben-keyeng tsüdi sengho hewi Kekinyijjenwa ha kepong saaben.

⁸ Ayyi wi rükatssü nu suna mabenla iji.

⁹ Kekinyijjen ketheüwa tsüna Kemisintsa miwi mehaikiaben, nu hi ciwi mehai kayi kesa nu kecca pi inyithu cüaben.” Apvüwa Kekhang ntsawa na khidha.

Atusenjüh-kechüwa na Keqhaikedithu wi Kecenkinalikesa

¹⁰ Dariya na kadimi sa keya keniwa mapi, asha tuguwa, nkwe nu mejü ghanan wi Kemisintsa Apvüwa na atusenjüh-kechüwa Haggai ccüneng.

¹¹ Ma khi, “Kekeü ha südhe chilo kesa pi keqhaikedithu wi keülo:

¹² Keujüla anyi kesü na ahhansha kesa wi methale sakea sakü kesü pi ma thsü keqhansha wi chi pvü den; nu ma tsü yala amesa, atsse sa ketheng, kisengtssü, oliv deli, nyelela atsse katsüha lela kidhen thsü lethu, tsüna atsse tsü la sapi metha thsüaben kwe?” Kekeü tsüpi keü kechi wi keqhaikedithu na “Nyele” lunengchia.

¹³ Tsaseng wi Haggai na keü, “Keujüla anyi kesü na keshü kamang pa nu ma nakhia; nu ma wala atsse hathu ha pa lethu, tsüna atsse tsüthu la nakhia ben kwe?” Keqhaikedithu na “Anle” lunengchia.

¹⁴ Tsaseng wi Haggai na khi, “Apvüwa na mizzatenti hawa wi anyithu nu mathu kekuli tsüdi miwi tsü makesü saaben le khiben; tsalina mathu na pi kekinyipen miwi kekinyi tsüdila nakhidha.”

Apvüwa na Ma Kesawegü Kekhishi

¹⁵ Apvüwa na khiben, “Nthu na nthu miwi mangwa saben khe mu nben kwe? Nthu na Kekinyijjenwa tsü npi saneng keshagha tuwi,

¹⁶ nthu na asu kilogram meza keni saghuya benle nondi nu waden, isala tagha ketan muya. Nthu na alekhwen wi kisengtssü liter meza ssuya benle waden, isala ciwi jügha ketan muya.

¹⁷ Hi ameghü kisa nu aghayi kesun pi nthu kekuli tsüdi miwi chi nu yasa thsüa, isala nthu na khili la leben khapeghe meya.

¹⁸ Nansü ha Kekinyijjenwa giketegü cenkeya tsathang asha tuguwa, nkwe nu mejü ghanan. Khili nten na khati sa waten khe ghang nanlo.

¹⁹ Ciwi asu na nmidha, nu kemeshentsse tonthu, khhaghabvü tonthu, ahhibvü tonthu, nu oliv tonthu na npi bün, isala hi khili nten na sawegü pi nthu cüaden .”

Apvüwa na Zerubbabel wi Kekhishi

²⁰ Tsü sha nkwe nu mejü ghanan wi Apvüwa na keni tughuwa ketsijüh pi Haggai cü,

²¹ tsüna Judah wi ahngwa Zerubbabel ghena: “Hi atssan nu ayyi zankeju chi tendha,

²² nu hi kadiyyithu yasa pi nu mathu kekhang pi asakhen sa thsüaden . Hi gorugarithu nu ma keculathu pakhakuli; goruthu na shü, nu ma kessithu na khokho kepathili thsüaden .

²³ Imaghawa Zerubbabel, tsü ghanan wi hi no khuya, nu hi no pi inyan wina kekhang sen thsüaden . Hi kessiya kesawa tsüna no.” Kekhangntsa Apvüwa na khidha.