GALATIANYI 6 - Kemethajüh (N) (Re-editing) Bible (BSI)

Kesü kesü Kekiqali

¹ Icünyuthu, keujüla anyi kesü na katsüha wi lela sazzi ben lethu, nthu aghamulen nyithu na ccapeyi nu ma sa meshon chicü. Nu nthu la mechu sen nbvü thsüle kesalina kiden-kesha yalo.

² Kesü kesü khhi pvü kiqali den, isathu nthu na Khristanyi yenwa tsü nie yaben.

³ Keujüla anyi kesü na ma ntsakhiwa mangla nye lela ma meshen pi mehai lethu, ma ketanla ma mechuben.

⁴ Tsüdila papa kekuli ghan-nanlo. Keujüla tsüna mehai lethu, pi nyu kepa wi kuli ketheng tsü n-ghapela nu ma ketanla ma kekuli tsü ghena kapvüya mehai.

⁵ Kepaghenanye kesüsü tsüdila papa khhi tsü pvüden.

⁶ Anyi nyu na Anyiza ketsijüh pi ma sansi cü kebenwa na pala kemehai keben tsüdi pi ma kesansiwa manyi gweghe kesen-u.

⁷ Nthu ketanla nthu nmechu la, anyi thola Anyiza mechuya nben; kepaghenanye anyi kesü ma mangwa pi yangchi khe tsü wwi yaden.

⁸ Keujüla ma asajjü kenen pi alli wi yangchi lethu, ma ciwi keshüwa tsü wwi yaden; keujüla ma Aghamu kenen pi alli wi yangchi lethu, ma Aghamu wina anuphan kahangwa tsü wwi yaden.

⁹ Tsalina ithu kemehai kekuli wi accükwenshü nsala na; kepaghenanye ithu na nteshila saben lethu, ithu na tsü wwi keya tsüwa na ghoben.

¹⁰ Tsalina ithu na matsü kemehai kemu tsüdi wi la anyi tsüdi ghena kemehaiwa sa na, tsüdi miwi la kenondi wi ithu theghi sa kebenthu miwi tsüti sa na.

Kekitsan Sakhen nu Shalom kesa

¹¹ Ghangchilo, hi ikwen pi kezhüyen keti zhü pi nthu cüben le!

¹² Anyi nthu meten pi ahyuhan thsüle sa ketenthu tsüna asajjü wi kapvü nu ammi saden. Mathu na tsüti sa nu Khrista kross jüh ghena kemeten-kemesha nsale saden.

¹³ Anyi ahyu kahanthu lela Ayenwa tsü nie meya; mathu na nthu ya ahyuhan thsü mvuben, isanu mathu na nthu sajjü cüki miwi na kapvü yale saden.

¹⁴ Isala ighena tsü, hi ithu Pvüwa Jisu Khrista kross cüki tsü ghena ketan kapvü den; kepaghenanye ma kross tsü ghena ayyiwa na itu wi keshü sadha, nu hi ayyiwa tu wi keshü sadha.

¹⁵ Kepaghenanye ahyuhan le nhan lela ma men mangla nmi; isala anyi kesü kahang ketheü sa keyawa tsü le!

¹⁶ Mathu kahang wi ayen ha nie ketenthu kecca nu nanketizen ya mathu ssiketenwa sayalo — mathu nu Anyiza nyithu tsüdi ssiketenwa sayalo.

¹⁷ Asakhenwa: thola agükeccü pi hi ncüla yilo, kepaghenanye hi igwo wi ayisüthu pvü keten tsüna hi Jisu nssümagha le kesa pi ccücaben.

¹⁸ Icünyuthu, Apvüwa Jisu Khrista nanketizen ya nthu tsüdi ssiben keyawa sayalo. Amen.