GALATIANYI 5 - Kemethajüh (N) (Re-editing) Bible (BSI)

Nthu Kekhenkeghe nkemi Kiden-keshaya

¹ Ithu na kekhenkeghe mangla nmi, kepaghenanye Khrista na ithu lisha chicüdha le! Tsalina kekhenkeghe nkemi nyi ti zükeqhe nganya, nu wala amagha tsü nsa neng layi.

² Kinalo! Hi Paul na nthu kizaben, keujüla nthu na ahyuhan lethu, Khrista tsüna nthu ghena ma men mangla nmidha.

³ Hi kheneng anyi tsüdi kizaben, thowa na ahyuhan khe ma Ayenwa mabenla kenie-u na bendha.

⁴ Nthu Ayenwa kenie wina Anyiza tu wi meshon yale sa ketenthu, nthu ketanla Khrista wina nthu dendhi sen bvüden. Nthu na Anyiza nanketizen wi tsü nmi.

⁵ Ikhang kaghangwa na Anyiza na ikhang pi ma tu wi meshon yaben; nu hawa ha ikhang na ikhang kenondi wi Anyiza Ghamu kekhang na kuli keben tsü hieben.

⁶ Kepaghenanye Khrista wi tsü ahyu kahan nu ahyu nkahan kepapa kesa mangla nmi; isala nanketizen wina kenondi kekuliwa tsü.

⁷ Nthu na mehaitsü sa keben na! Thowa na nthu atsentsawa nie keten tsü khen cü nu? Ma khatile nthu kiza nu?

⁸ Tsüwa tsüna nthu ci keyawa Anyiza kekuli nye.

⁹ Mathu na kekhi ti “Azimi keu ketanla pi awheng maben sa pi pvü shhughoya thsüden.”

¹⁰ Isala hi khili kecu nthu nondiben. Ithu Apvüwa wi kahang wina hi nthu na mangla nthu kemeshen kepa sa nben kesa nondiben, nu anyi thowa na nthu pakivvü ten khe kesü sa le kesü sa lela Anyiza na ma meten cüben.

¹¹ Isala icünyuthu, ighena tsü, keujüla hi ahyu nhanthu yishüle kesa pi sansi ben lethu, mangkesa na khilila hi meten-mesha ben nu? Keujüla tsüna ntsakhiwa lethu, hi Khrista kross cüki pi nyu kesansi tsüna mangla agükeccü pfüsichi nkesa.

¹² Hi anyi nthu pakivvü ketenthu tsü yala bvü thsü nu mathu ya mathu ketanla agheghü sa thsü mvuben le!

¹³ Icünyuthu, nthu ghena tsü, nthu ci pi kekhenkeghe nkemithu sayadha. Isala kekhenkeghe nkemi ha yala nthu miwi asajjü kenmvuwa tsü nsa thsüla. Tsüti kesawa nye, ketizen ya nthu sa pi khokho kekuli sa thsülo.

¹⁴ Kepaghenanye Ayenwa mabenla saghu pi ayenkhukechi kesü wi khitheng: “No ketanla no ketizen ti njenphon tizenyalo.”

¹⁵ Isala keujüla nthu na khokho kemeküli nu kaghandsali ben lethu, nthu kiden-kesha yalo, nyelethu nthu keyasalitha saben.

Aghamu nu Anyi Sajjü

¹⁶ Hi khi kebenwa na ha: Aghamu yala nthu kahang senya thsü, nu nthu sajjü kenen wi anonkwen nbenla.

¹⁷ Kepaghenanye asajjü kenenwa tsüna Aghamu kenenwa shunden, nu Aghamu kenenwa tsüna asajjü kenenwa shunden. Ha keni na nankemeghüli den, nu tsü ma jjügi nthu na nthu kenenwa tsü saya nben.

¹⁸ Keujüla Aghamu na nthu ssiten lethu, nthu na Ayenwa kekhu wi nbenladha.

¹⁹ Asajjü kenenwa kekuli tsüna mechanshu ben: tsüthu na qheza-qhena kesa, nkemetha, nu kekuli nkemethathu;

²⁰ tsikezhüthu kekinyi, kedema. Anyithu na nankemeghüli nu kitagha; mathu na anyonsa, lebentsu, nu apvümene shagha. Mathu na gishü zighe pi akhang nu azi kepapa sa;

²¹ mathu na anyon ghopvü, adina, ponca-pongqhe sa, nu kepa wi hati kesathu saden. Hi kheni kesa ti nansü la nthu kitsan chiben: anyi hathu ha sa ketenthu na Anyiza Kadiyyi ghongya nben.

²² Isala Aghamu biwa tsüna nanketizen, anonkeghe, kecca, lebenkesie, lebenkecca, ayenkemehai, jühtsentsa kesa,

²³ keccaketssü, nu kekheneng keya. Hathu miwi ayen kepa wi nmi.

²⁴ Nu anyi Jisu Khrista ji sa kesathu na mathu sajjü kenmvuthu nu kesa mvuthu tsüdi pi shü thsüdha.

²⁵ Aghamu na kahang pi ithu cüdha; tsalina ma ithu kahang la senya thsü nsathu yishü.

²⁶ Ithu na khokho tu wi awisa, nkekhichili nyelela anyonsa yishü.