GALATIANYI 4 - Kemethajüh (N) (Re-editing) Bible (BSI)

¹ Isala hi khi kebenwa na ha: Atsa kesü ma ba keben ghongya ketenwa tsüna ma ntsakhiwa pala tsüdi pvüwa saben lela ma ghanyi keben chu pi amagha kesü ti saden.

² Ma ghanyi keben wi ma ba na matsü ssan pi ketheng chu ciwi anyithu na ma noncca nu ma kekuli kesa tsü ghang benden.

³ Tsü makesü, ithu la aghamulen wi npi zügü keya chu ayyi wi kekhang kesen ghamuthu magha sagho.

⁴ Isala khathansha wi matsü centhaya khe Anyiza na ma Tsawa kesunchi. Ma nza kesü gwo wina pvüghaya nu Judah nyi Yenwa kekhu wi hang,

⁵ nu Ayenwa kekhu wi kebenthu hangshaya, isanu ithu yala Anyiza tsangathu saya thsüle kesalina.

⁶ Nthu na ma tsangathu le kesa pi ccücale kesalina Anyiza na ma Tsawa Ghamu kesun pi ithu leben wi chicü, nu Aghamu na, “Aba, iBa.” isa ci shagha den.

⁷ Tsalina nthu na amagha kesü nyedha, isala atsa kesü sadha. Nu nthu na ma tsa sa keya ghena Anyiza na ma tsathu ghena keben tsü tsüdila pi nthu cüben.

Paul na Galatia Nyithu Sheikemeshen

⁸ Kheni nthu na Anyiza nchü, tsalina nthu na acenpvü nkenyethu tsü magha sa.

⁹ Isala nthu na khili tsü Anyiza chüyadha, nyelela Anyiza na khili nthu chüyadha, nthu na khati nu kheneng nkezü nu ma men nkemi ghamuthu wi tsü wa mvuben nu? Nthu na mangkesa na tsüthu maghathu sa neng wa mvuben nu?

¹⁰ Nthu na atsathang, asha, atsü kepapa, nu amapi pahan ketan pi aghutiwa saden.

¹¹ Hi nthu ghena leben güccü ben le! Hi nthu ghena kekuli tsü tsüdila ma men nkemi saya mehai kwe?

¹² Icünyuthu, hi nthu wi khieben, hi ti sayalo, kepaghenanye hi la nthu ti le. Nthu na itu wi mangla sazzi ntheng.

¹³ Nthu na hi asajjü nkekhang wi atuwa ajühkemehaiwa pi nthu sansi kecü tsü chüben.

¹⁴ Isajjü ghena nthu tu wi leben kepi keti kesü sa lela nthu na hi pi ma men nkemi nsa nyelela hi meya mvu nsa. Tsüti kesawa nye, nthu na hi pi Anyiza nyilo kesü ti sa, nu hi pi Jisu Khrista ti sa nu hi ssiya.

¹⁵ Nthu na anonghe ntsa sa keben na! Mangwa khati sadha nu? Hi ketanla khiya mehai, keujüla nthu na saya mehai lethu, nthu nyon kuhoshi pi hi cüa kesa.

¹⁶ Hi atsentsawa pi nthu kekiza ghena hi khili nthu ghinyi sadha kwe?

¹⁷ Anyi kepathu na nthu miwi lebenchi ntsa kesa pi ccücaden, isala mathu kemeshen tsüna nmehai. Mathu kenmvuwa na hi wina nthu ssisen bvüa, isanu mathu na nthu wi lebenchi kesa tsüti nthu la mathu wi tsüti sa thsüle kesalina.

¹⁸ Keshüthangla ajjügi kemehai ghena leben kechili ntsa kesa tsüna mehai, tsüna hi nthu gweghe keben wi ketan nye.

¹⁹ Itsangathu! Khrista yencüki tsüna nthu wi npi benkeya chu hi kheneng nthu ghena nza kesü na agüsakenaa tsüti saben.

²⁰ Hi khili nthu gweghe ben mvu ntsa saben, isanu hi nthu tu wi iyencüki makepa sayale kesalina. Hi nthu ghena leben güccü ntsa saben le!

Hagar nu Sarah Manyi pi Tsütsonca

²¹ Hi ya nthu Ayenwa kekhu wi ben mvu ketenthu wi keü thsülo: Nthu na Ayenwa na khati khiben khe za meya kwe?

²² Hati khiben, Abraham na atsa keni ben, kesü na maghalewa wina muya, nu kepawa na awubvü tsentsawa wina muya.

²³ Maghalewa tsa tsüna asajjü wina pvüghaya, isala awubvü tsentsawa tsa tsüna Anyiza jühkhukechi kenie wina pvüghaya.

²⁴ Hawa ha khi pi kaghapeli kesa: kinyibvü keni tsüna cenkethenjüh keni. Nssümagha tsangathu kepvüghawa tsüna Hagar, nu ma Sinai Yikha wi cenkethenjüh sa keyawa tsü.

²⁵ Hagar, tsüna Arabia wi Sinai Yikha, hana khili pi Jerusalem na ma nyi tsüdi ssinu nssümagha sa kebenthu tsü ghape ben.

²⁶ Isala tangwi Jerusalem tsüna mangla kekhenkeghe nmi, nu ma ithu jja.

²⁷ Kepaghenanye Ntsawajüh na khiben, “O kinyibvü atsa nkemiwa, n-nongheyalo! Agüsakenaa nkemi kinyibvüwa, anonkeghe wina magha nu jishayalo! Kepaghenanye yisha kesa kinyibvüwa tsüna ma wuba ma teshi nketen kinyibvüwa miwi ji kayi atsanga muyaden.”

²⁸ Icünyuthu, khili nthu na ajühkhukechi ghena Isak ti Anyiza tsangathu sayadha.

²⁹ Tsü tsüwi atsa asajjü wina pvügha keyawa tsüna Anyiza Ghamu ghena pvügha keyawa tsa tsü meten-mesha; khili tsü makesü saben.

³⁰ Isala Ntsawajüh na khatile khiben nu? Hati khiben, “Maghalewa nu ma tsa manyi kesun pi bvü thsülo; kepaghenanye maghalewa tsa tsüna ahvuwa tsa manyi gweghe abawa keben tsü ghongya nben.”

³¹ Tsalina icünyuthu, ithu na ahvuwa tsangathu khe maghalewa tsangathu nye.