GALATIANYI 3 - Kemethajüh (N) (Re-editing) Bible (BSI)

Ayenwa nyelela Kenondi

¹ No kejüphon Galatia nyithu! Thowa na nthu madeja nu? Nthu nyon wi Jisu Khrista na kross miwi keshü jjügi tsü muthatha keben na!

² Ajjügi kesü ha pi hi kizalo: Nthu na Ayenwa nie nu kekuli ghenala ajühkemehaiwa zaya nu kenondi ghena Anyiza Ghamu muya nu?

³ Nthu na hati jüphon ben kwe? Nthu na Anyiza Ghamu wina kuli shhu; nthu khili nthu kekhang wina sacen yale ben kwe?

⁴ Nthu na sakenanthu tsü tsüdila ma men nkemi sa kwe? Tsüna pala pahan sabenla metsina!

⁵ Nthu na Ayenwa nie nu kekuli ghena la ajühkemehaiwa zaya nu kenondi ghena Anyiza na Aghamu pi nthu cü, nu nthu jawi amankesa kuli nu?

⁶ Abraham na sakenan cüki tsü meshenchilo; Ntsawajüh na kekhi ti, “Ma Anyiza nondi, nu ma kenondi ghena Anyiza na ma pi ketsatan nyi saya.”

⁷ Tsalina nthu na chü meyathu yishü, atsentsa Abraham tsangathu tsüna anyi kenondi kebenthu.

⁸ Ntsawajüh wi Anyiza na Judah nyi nkenyethu kenondi ghena pi ma tu wi meshonya ben kesa khitheng. Tsalina Jühtheü Kemehaiwa na Abraham wi kiza, “No wina Anyiza na sawegü pi anyi tsüdila cüben.”

⁹ Abraham na nondi nu kesawegü mukeya tsüti nondi ketenthu tsüdila ma ti kesawegü muyaben.

¹⁰ Ayenwa kekuli tsü nondi nu hang ketenthu tsüdila kishen-keshi kekhu wi ben. Kepaghenanye Ntsawajüh kekhi na, “Thowa na keshüthangla Ayenwa lesüshen wi zhü kethengthu tsüdila nie nu sa nten khe Anyiza kishen-keshi kekhu wi ben.”

¹¹ Khili anyi thola Ayenwa ghena Anyiza tu wi meshonya nten kesa chütha yadha; kepaghenanye Ntsawajüh kekhi na, “Anyiza nondi nu meshonya ketenwa ketan hang yaden.”

¹² Isala Ayenwa tsüna kenondi ssinu mangla kesa nmi. Tsüti kesawa nye, Ntsawajüh na kekhi ti, “Thowa na Ayenwa tsüdila nie nu kuliten khe hang yaben.”

¹³ Isala Khrista na ithu ghena kishen-keshi pvü nu Ayenwa kishen-keshi senkegho wi tsüna ithu hangsha yadha; kepaghenanye Ntsawajüh na khi, “Anyi kesü le kesü lela pi achan miwi kedegüwa tsüna Anyiza kishen-keshi kekhu wi ben.”

¹⁴ Jisu Khrista wina Anyiza na sawegü pi Abraham kecü tsü yala Judah nyi nkenyethu miwi ghoya thsü, nu ithu yala kenondi wina Anyiza na Aghamu jühkhukechi tsü muya thsüle kesalina Khrista na ha kulichidha.

Ayenwa nu Ajühkhukechi

¹⁵ Icünyuthu, hi anyi keshüthangla sen keten pi tsütsonca kesü khiden: Anyi meshu keni na ajjügi kesü ghena ajüh centheng lethu, thola tsü pakhhi nyelela mangla pi tsü wwaya nben.

¹⁶ Anyiza na ajühkhuchithu sa pi Abraham nu ma shicübvügha cüdha. Ntsawajüh na “shicübvüghathu” kejon majjügi anyi kejon khi nben, isala “shicübvügha” kesütan majjügi anyi kesütan tsüna Khrista khiben.

¹⁷ Hi khi kebenwa na Anyiza na Abraham ssinu cenkethenjüh sa nu tsü nieben kesa khishichi. Ayenwa tsüna amapi meza mejü nu changha seng wi na khuchi, nu tsüna cenkethenjüh tsü pakhhi nu Anyiza jühkhukechi tsü yasaya nben.

¹⁸ Kepaghenanye keujüla Anyiza juwa tsüna Ayenwa miwi ben lethu, tsüna ma jühkhukechi miwi nmidha. Isala tsüna ma jühkhukechi ghena Anyiza na ajuwa tsü pi Abraham cü.

¹⁹ Isalethu, Ayenwa tsüna mangwa ghena nu? Tsüwa tsüna kesazzi kekuliwa tsüna mangwa khe pi ccüca, nu tsüna Abraham shicübvügha ma ghena ajühkhukechiwa tsü npi kegho chu ben thsüle kesa ghena pi wwatheng. Ayenwa tsüna tangnyilothu na anyi kesü pi alenkesawa ti sa nu khuchicü.

²⁰ Isala anyi kesütan wi tsü alenkesawa nsenla mehai; nu Anyiza na kesütan.

Ayenwa tsü Jjügi

²¹ Ha ajjügi Ayenwa tsüna Anyiza jühkhukechithu tsü shun ben kwe? Nye, tsüti nsatha! Kepaghenanye keujüla ayenwa na kahang sengho anyi cüya mehai lethu, anyi tsüdila tsü kenie wina Anyiza tu wi meshonya kesa.

²² Isala Ntsawajüh wina ayyi mabenla kesami kekhang kekhu wi ben khiben; tsalina Jisu Khrista kenondi wina khishi ketheng ajuwa tsü pi nondi ketenthu cüdha.

²³ Isala kenondi tsü na npi kegho wi Ayenwa na ithu tsüdi pi gho keten kenondi ha pi npi ccüca kechi chu atssüzü sa thsü.

²⁴ Tsalina Khrista na npi kegho chu Ayenwa na ithu miwi kekhang ben, isanu kenondi wina ithu yala Anyiza tu wi meshonya thsüle kesalina.

²⁵ Khili kenondi tsü na ghodha, Ayenwa na ithu miwi kekhang nmidha.

²⁶ Kenondi ghena nthu tsüdila Jisu Khrista wina Anyiza tsangathu sayadha.

²⁷ Kepaghenanye nthu na Khrista wi baptaiz sayadha, nu nthu na khili Khrista wi benyadha.

²⁸ Tsalina ciwi Judah nyithu nu Judah nyi nkenyethu, amaghathu nu ahvuthu, npvüza nu nzathu kepapa kesa nmidha; kepaghenanye nthu tsüdila Jisu Khrista wi kesütan sadha.

²⁹ Keujüla nthu na Khrista ji saya lethu, nthu na Abraham shicübvüghathu sayadha nu Anyiza jühkhukechi tsü muyaben.