GALATIANYI 2 - Kemethajüh (N) (Re-editing) Bible (BSI)

Paul nu Apostel Kepathu

¹ Amapi tagha mejü seng wi hi Tita ssisen Barnaba gweghe Jerusalem wi wa.

² Hi ciwi nwathu keyishü Anyiza na pi hi keccüca ghena wa. Hi ketan wala accülikesathu kemetu wi hi ajühkemehaiwa pi Judah nyi nkenyethu kesansi cüki khi pi mathu kiza. Hi kheni nyelela nansü kekuli tsü pi ma men nkemi nsa thsü mvu.

³ Hi gweghewa Tita na Grik nyi saben lela ma meten pi ahyuhan thsü nsa,

⁴ anyi pahan na ma pi tsüti sa thsü mvu sa. Kenondi ghe kesathu na wahhaithu sala ikhang jawi dugho ikhang na Jisu Khrista wi mangla kekhenkeghe nkemi cüki tsü chüyale sa. Mathu na ikhang pi amagha sa thsü mvu sa,

⁵ isala nthu ghena ajühkemehai tsentsawa tsü noncca yale kesalina ikhang na matsü keu ketanla pi mathu ncü.

⁶ Isala accülikesathu na itu wi tsü makepa mangla nkesa ghena hi ha khiben; Anyiza na anyi nankepapa sa nten, accülikesathu na mangla ketheü pi hi nkiza.

⁷ Tsüti kesawa nye, mathu na Anyiza na ajühkemehaiwa pi Judah nyithu sansilo kesa kekuli pi Pitor dhenchi kesa tsüti ajühkemehaiwa pi Judah nyi nkenyethu sansilo kesa kekuli pi hi dhenchi kesa tsü mu.

⁸ Kepaghenanye Anyiza kekhang na Pitor sa pi Judah nyithu ghena apostel kesü kesa thsü tsüti hi sa pi Judah nyi nkenyethu ghena apostel kesü sa thsü theng.

⁹ Accülikesathu, James, Pitor, nu Johan, hathu na Anyiza na kekuli ha pi hi cü ketheng mu; tsalina ithu gweghe kesü kesa zensu wina mathu kwen ajewa pi Barnaba ishinyi kwen zankethe. Barnaba ishinyi na Judah nyi nkenyethu jawi kuli nu mathu na Judah nyithu jawi kulile kesa cenya.

¹⁰ Mathu kekhi na ikhang na mathu jawi kahhatuthu tsü meshen ben tenlo khi, tsüwa tsüna hi sa mvu ntsa keghowa tsü.

Paul na Antiok wi Pitor Kekha

¹¹ Isala Pitor na Antiok wi kegho wi hi nyu tu wi na ghangtan ma kha, kepaghenanye ma sazzi ben.

¹² James na anyi pahan kesun kechithu na gho npi cu keya wi Pitor na Judah nyi nkenye cünyuthu gweghe dsajjü ben. Isala anyi hathu na gho cu keya wi ma asenkheneng nu Judah nyi nkenyethu gweghe ndsajjüla, kepaghenanye ma Judah nyithu messi.

¹³ Judah nyi kepathu la Pitor kekuli ti sa shagha; nu ashukukeneng kekuliwa ha Barnaba lela ssi bvüa.

¹⁴ Mathu na meshonqhe ajühkemehai tsentsawa tsü nie nketen mukeya wi hi mathu tsüdi tu wi na Pitor wi, “No Judah nyi kesü, isala no Judah nyi kesü ti nhangla Judah nyi nkenye kesü ti hangden. Isalethu, no khati nu Judah nyi nkenyethu meten pi Judah nyithu ti hang thsüya mehai nu?”

Judah nyi nu Judah nyi Nkenyethu na Kenondi wina Hangshakeya

¹⁵ Ntsakhiwa, ikhang na aghatsan wina Judah nyithu khe mathu na ci keten ti “Judah nyi nkenye kesamithu” nye.

¹⁶ Isala anyi kesü na Jisu Khrista kenondi wina ketan Anyiza tu wi meshonya keten khe khiela Ayenwa nie nu kekuli wina nye kesa ikhang na chüben. Ikhang na Ayenwa nie nu kekuli wi nyela Khrista kenondi wina Anyiza tu wi meshon yaden kesa Jisu Khrista wi kenondi ben. Kepaghenanye anyi thola Ayenwa nie nu kekuli wi Anyiza tu wi meshon meya.

¹⁷ Isalethu, keujüla ikhang na Khrista wina Anyiza tu wi meshon yale sathu, ikhang na Judah nyi nkenyethu ti kesamithu le kesa muyaden — ha ma jjügi Khrista na kesami kesa thsü kekuli saben kwe? Khiela tsüti sa nben!

¹⁸ Keujüla hi Ayenwa yasa kesa tsü hi sa neng ben lethu, tsüna hi ketanla hi Ayenwa tsü kepakhhiwa kesa pi ccücaben.

¹⁹ Isala Ayenwa tsü kenie wina hi keshü sadha, tsüna hi Anyiza ghena hang benya thsüle kesalina Ayenwa na hi pathia. Hi pi Khrista gweghe ma kross miwi shü thsüdha.

²⁰ Tsalina khili hang kebenwa tsüna hi nyedha, isala hi wi hang kebenwa tsüna Khrista. Hi khili hang kebenwa kahang ha na hi tizen nu ighena ma kahangli khuchi kesawa Anyiza Tsawa kenondi wina hang ben.

²¹ Hi Anyiza nanketizenwa tsü meya mvu sa nten. Isala keujüla anyi kesü Ayenwa ghena Anyiza tu wi meshon yaten lethu, tsüna Khrista keshü jjügi na mangla nyedha.