GALATIANYI 1 - Kemethajüh (N) (Re-editing) Bible (BSI)

Ajühtuwa

¹ Paul, anyi wina kesun kechi nyelela anyi kekhi wina sa keya ghena la nye, isala Jisu Khrista nu keshü wina ma sa pi hang kecü Abawa Anyiza wina apostel sa keyawa wina kesun kechi.

² Hewi acünyuthu tsüdila hi gweghe shalom kesun pi Galatia wi kemehuthu cüben.

³ Anyiza ithu Bawa nu Apvüwa Jisu Khrista ya nanketizen nu kecca pi nthu kecüwa salo.

⁴ Khili kahang nkemehai wina ithu hangsha yale kesalina Khrista na Anyiza ithu Bawa jühkeya wina ithu kesami ghena ma gwo khuchia.

⁵ Anuphan nu anuphanla Anyiza nyanthang keyawa salo! Amen.

Jühtheü Kemehaiwa Kesütan

⁶ Hi nthu ghena amansa ben le! Nthu na wan Khrista nanketizen wina nthu ci keyawa tsü teshi nu ajühkemehai kepawa yayadha.

⁷ Ciwi ajühkemehai kepa wi nmi, isala hi ha khi keben hana ciwi anyi pahan na nthu pakivvü nu Khrista jühkemehaiwa tsü pi kemili cü mvu sa keben ghena.

⁸ Isala keujüla ikhang nyelela tangnyilo kesü na dughola ikhang na Ajühkemehaiwa pi nthu kesansi tsü nkenye kepa wi pi nthu sansi lethu, ma kishencü pi annighajü wi chi kesawa salo!

⁹ Ikhang na kheni la ha khidha nu hi khili la ha khi neng ben: keujüla anyi kesü na nthu yaya kesawa Ajühkemehai tsü nkenye kepa wi pi nthu sansi lethu, ma meshensa pi annighajü wi chi kesawa salo!

¹⁰ Ha hi anyi tu wi keseng pvüyale bha keben ti saben kwe? Nye le! Hi Anyiza kenenwa tsü saten le! Hi anyithu tu wi anyan kemehaiwa sayale ben kwe? Keujüla hi tsüti saben lethu, hi Khrista maghawa sa nkesa.

Paul na Khati nu Apostel kesü Saya

¹¹ Icünyuthu, hi nthu kizaden, hi Ajühkemehaiwa pi nthu kesansi hana anyi wina keshhugho nye le!

¹² Kepaghenanye hi anyi wina tsü mu meya nyelela thola tsü pi hi nsansi. Tsüna Jisu Khrista na ma ketanla pi hi ccüca kechi.

¹³ Nthu na hi kheni Judah nyi keccüna wi hang keten tsüwi hi khati nu Anyiza kemehu tsü meten-mesha nu tsü yasa le ipiketsü sa khe tsü cüki nthu na zayadha.

¹⁴ Hi inyithu ishüsha jawi Judah nyi keccüna kekuli wi hi kemehaiwa sa gho, nu ibamyithu kahangyen wi tsü hi ilebenchi ntsa sa.

¹⁵ Isala Anyiza na ma nanketizen wina hi npi kepvügha wina hi kessiya nu hi ci pi ma kekuli sa thsüa.

¹⁶ Hi Jisu cüki Jühtheü Kemehaiwa pi Judah nyi nkenyethu sansi thsüle kesalina ma Tsawa pi hi ccücale südhe keya wi hi anyi tho wila hi kesansi bha nwa,

¹⁷ nyelela hi Jerusalem wi itu wi na apostel kesathu wi la nwa. Tsüti kesawa nye, hi Arabia wi wa, nu tsaseng wi Damaska wi gho neng.

¹⁸ Amapi kecheng seng wi hi Jerusalem wi Pitor hhainan wa nu ciwi ghanan tagha manga ma gweghe ben.

¹⁹ Hi ciwi Apvüwa cünyuwa James ketan khe apostelthu thola nmu.

²⁰ Hi zhü pi nthu cü keben ha atsentsa. Hi milimesa nben kesa Anyiza na chüben.

²¹ Tsaseng wi hi Siriya nu Silisia wi wa.

²² Tsü tsüwi Judea wi kemehu nyithu na hi npi chüya.

²³ Mathu na nyu hati kekhi ketan chüben: “Anyi kheni ithu meten-mesha ketenwa tsüna khili tsü ma kutijü wi yasale sa keten kenondi tsü pi nyu sansi wadha le!”

²⁴ Tsalina mathu na ighena Anyiza seng.