FILIPPINYI 3 - Kemethajüh (N) (Re-editing) Bible (BSI)

Atsentsawa Ketsatan

¹ Ajüh sakhen, icünyuthu, Apvüwa wi anonghethi sabenlo. Hi hatu wi zhükechi tsüti zhü neng lela ali- ndhamang, nu tsüna nthu ghena kemehaiwa.

² Anyi pahan nkemehai kuli ketenthu, affüthu tsü, nu agwosa handhilo khi ketenthu tsü ghena kiden-kesha yalo.

³ Atsentsa ahyukahan saya kesathu tsüna ikhang khe mathu nye, kepaghenanye ikhang na Anyiza Ghamu wina ma kinyi nu ikhang Khrista wi kahang ghena anonghe den. Ikhang na kenondi pi asajjü kekuli miwi chi nten.

⁴ Hi kenondi pi pala hathu miwi chikeya jjügi na ben. Keujüla anyi kesü ma kenondi pi hathu miwi chiya ben le meshen lethu, hi tsü miwi jiki ma jjügi ben.

⁵ Hi ghanan tazen seng wi ihyuhan. Hi Israel nyi, Benjamin mizza, Ibri jjü wina kepvügha nyi kesü. Ayenwa tsü kenie wi lethu, hi Farisi kesü,

⁶ nu lebenchi ntsa sa nu kemehu tsü meten-mesha. Anyi kesü Ayenwa tsü kenie wina tsatanya kemehai chu hi nsazzila gho.

⁷ Isala hi pala tsüthu tsüdi kekiyi ben le sa keten tsü khili Khrista ghena tsüthu pi ma men nkemi sadha.

⁸ Pala tsüthu ketan nye; Apvüwa Jisu Khrista cüki tsüdi miwi ma men kebenwa tsü ghena hi pala tsüdi pi ma men nkemi saden. Hi ma ghena tsüdila teshidha; hi Khrista wi kekiyi muya le kesalina tsüthu pi acenya ti sa,

⁹ nu ma gweghe bentha yaden. Hi Ayenwa kenie wi kiyi keya tsü ghena hi wi ketsatan mangla nmi. Hi khilitsü Khrista kenondi wi ketsatan pi kecüwa tsü ben, ketsatan tsüna kenondi ghena Anyiza wina kegho.

¹⁰ Hi kenmvu maben lethu Khrista chüya nu ma hangneng-keshagha kekhang wi tsü sanan, ma ketizen kesa wi gwegheya, nu ma keshü wi tsü ma ti saya,

¹¹ nu keshü wina hi la sa pi hangya thsüaben kesa kaghang ben keyawa tsü.

Bvüsen Atu wi Jügükewa

¹² Hi hi kemtsüwa tsü muyadha nyelela haicen yadha le khi nben; isala Jisu Khrista na hi pi ma ji saya kesa ghena hi tsü pi iji saya le jügü waden.

¹³ Icünyuthu, hi khiela tsü muyadha le meshen nten, isala hi pala kesü kuliden, tsüna hi asengwa tsü mali nu atu wi kebenwa tsü muyale jügü waden.

¹⁴ Tsalina hi meshonqhe bvüsen kemtsüwa, Anyiza na Jisu Khrista wina ci keben tang wi kahangwa, tsü muyale jügü waden.

¹⁵ Ithu aghamulen wi zügüya kesathu tsüdila ha makesü nmeshenthu yishü. Isala keujüla nthu pahan na ma kepa meshenben lethu, Anyiza na methasi pi nthu ccücaben.

¹⁶ Isalela, ikhang na nie ghola khili ha cu keben yenthu tsü makesü nie sen nu atu wi jügü wa nalo.

¹⁷ Icünyuthu, hi ti sayalo. Ikhang na nthu ghena tsütsonca kemeshon sa kechi tsü nie ketenthu jühkinalo.

¹⁸ Hi kheni ha kejon tughula pi nthu kizadha, nu khili ihacücala khi neng ben: ciwi anyi kejon mathu kahang yen na mathu sa pi Khrista na kross miwi keshü tsü ghinyithu saben.

¹⁹ Mathu na annighajü wi dediden, kepaghenanye mathu cenpvü tsüna mathu sajjü kenenwa tsü. Mathu na kejüghe-u wi tsü kapvü den, nu mathu na ayyi ha wi ji ketan meshen benden.

²⁰ Isala ithu tsü tang nyithu sayadha, nu ithu na nmvuthi nu ithu Hangshawa Apvüwa Jisu Khrista tang wina gho keten tsü hieben.

²¹ Ma pala tsüdi pi ma kadikesa kekhu wi chiya keten kekhangwa tsü sen nu ithu gwo nkekhangthu ha kemili pi ma nyankethang gwowa tsüti sa cüaben.