FILIPPINYI 1 - Kemethajüh (N) (Re-editing) Bible (BSI)

Ajühtuwa

¹ Jisu Khrista maghawa Paul nu Timothi manyi na pila Filippi wi Jisu Khrista wi Anyiza nyithu tsüdi, kemehu wi gweghe accülikesa nu kekiqathu kecü:

² Ithu Bawa Anyiza nu Apvüwa Jisu Khrista ya nanketizen nu kecca pi nthu kecüwa salo.

Paul na Ma Lesü Kesithu ghena Kekhie

³ Hi nthu meshenkeya tsüdi wi nthu ghena Anyiza seng den;

⁴ nu hi keshüthangla nthu tsüdi ghena kekhie wi anonghe nu khie den.

⁵ Kepaghenanye nthu na aghatsan wina gho nansü kecu ajühkemehaiwa ghena kekuli wi hi kiqa ben.

⁶ Tsalina Anyiza nthu wi kekuli kemehai sa wa kesawa na sa sen wa Jisu Khrista tsathang npi kecu chu sacen cüben kesa hi chütiben.

⁷ Nthu na keshüthangla ileben wi benten le! Tsalina hi nthu ghena meshen keten tsüti hi hati kesa-u. Kepaghenanye nthu tsüdila Anyiza pi hi kecü nanketizen wi ha hi gweghe ben, tsüna hi khili atssüzü sa keben wi le kekhen mangla nmila ajühkemehaiwa khi nu tsü satezü keben wi lela.

⁸ Hi Jisu Khrista leben wina keshhugho tsüdi sen nu nthu cüki meshen ntsa benle kekhi tsüna hi atsentsawa khiben kesa Anyiza na hi chüza saben.

⁹ Hi nthu ghena kekhie saben, tsüna nthu ketizen ya atsentsa palakechü nu mehai cencu kesa chüshi keya gweghe shigü pfüpfü wa,

¹⁰ nu nthu ya kemehai ntsawa tsü kessiya thsüle kesalina. Isathu, nthu tsüdila Khrista tsathang wi tsü nkemetha nu kemeshensa ben nben.

¹¹ Anyiza nyankethang nu keseng ghena Jisu Khrista ketan sengho cü keten atsentsa kemehaiwa tsü pi nthu kahang pongya ben.

Khrista ghena Kahang

¹² Icünyuthu, hi nthu ya pala imiwi kuli kechithu tsüna ntsakhiwa ajühkemehaiwa kiqa pi mehai waya thsüle kesa chüya thsü mvuben.

¹³ Tsü jjügi ghena kadipen maben wila aghihie nu he wi kebenthu tsüdila hi Khrista magha kesü ghena atssüzü sa benle kesa chüben.

¹⁴ Nu hi atssüzü kesa ghena acünyu kejon sa pi Apvüwa wi kempvüza saya thsüdha, isanu mathu matsü tsüdi wi hi kempvüza sa kayi nu nmessila ketsijüh khi.

¹⁵ Ntsakhiwa, mathu pahan anyonghopvü nu kekitagha ghena Khrista jüh pi khi, isala kepathu tsü atsentsa kemehai wina saden.

¹⁶ Mathu ketizen wina saden, kepaghenanye Anyiza na ajühkemehaiwa ghena kekhi kekuli pi hi kecü tsü mathu na chüben.

¹⁷ Kepathu na leben tsentsa nsala Khrista jüh pi khiden, isala mathu pvükemene wina tsüti saden; mathu na hi atssüzü sa keben wi agüccü kayi thsüle meshen den.

¹⁸ Tsü ghena mangla nsale! Nkemehai kemeshen wi le kemehai wi lela Khrista jüh pi khiya keben chu tsü ghena hi inongheben. Nu hi inongheki benden,

¹⁹ kepaghenanye nthu kekhie nu Jisu Khrista Ghamu wi kekiqa kegho ghena hi lisha chicüaben kesa hi chüben.

²⁰ Hi nmvu ntsa nu ghang kebenwa na hi khie wila hi kekuli tsü nsala sa nten, isala matsü tsüdi wi nu khili hi kempvüza ntsa sala hi shü le hang lela hi kahang maben pi Khrista nyankethangwa tsü sayalo kheshilan! isaben.

²¹ Kepaghenanye itu wi tsü kahang tsüna Khrista ghena nu keshü tsüna ighena kekiyiwa.

²² Isala hi hangben lethu hi kekuli kejon saya ben, isani hi khawa kessiya ten khe chüti meya.

²³ Hi tsü keni jüwi kessi meya laben. Hi kahang hawa ha teshi nu wala ha miwi kemehaiki wi Khrista gweghe ben wa mvu ben;

²⁴ isala nthu ghena tsü hi hang nbenthu yishü ntsa saben.

²⁵ Hi ha chüti ben, tsalina hi hang benden. Hi nthu tsüdi gweghe ben nu nthu kiqa pi mehai kayi wa thsü nu kenondi wi nthu nongheya thsüben.

²⁶ Isanu hi kheneng nthu gweghe keben wi nthu na Jisu Khrista wina ighena kapvü keya jjügi kejon benya thsüle kesalina.

²⁷ Khili aghuti ntsawa na nthu kahang yala Khrista jühkemehaiwa ghena kahang qo sayalo, isanu hi gho nthu muyale mu meya lela nthu na ajjügi kesütan ghena zükeqhe ngan ben nu ajühkemehaiwa kenondi ghena nthu gweghe kesütan sa ssikesali benle kesa hi zayaben.

²⁸ Nthu ghinyithu nmessila keshüthangla kempvüza saben, nu hana mathu tu wi nthu na khang yaben nu mathu na nchalaben kesa chütiben, kepaghenanye Anyiza na khangkeya pi nthu chüden.

²⁹ Kepaghenanye Khrista ghena kuliya kemehai tsü pi nthu cüdha, isala ma ghena la ketizen sa.

³⁰ Nthu na khili hi gweghe aghisaya mehaidha. Hawa ha nthu na hi kheni kesalikeben mukeya nu zakeya ghikesawa tsü makesü, hi khili la tsü ssisa ben.