EZRA 9 - Kemethajüh (N) (Re-editing) Bible (BSI)

Ezra na Judah nyi nu Judah nyi nkenyethu Keyalikeben Chükeya.

¹ Hathu ha tsüdila sa cenkeya sengwi Israel nyi ccülikesathu pahan na gho hi wi anyithu, keqhaikedithu, nu Levi nyithu na mathu diyyi ketsaki Ammon, Moab, Ejipt nyelela Kanaan wina keghothu, Hitti, Perez, Jebus, nu Amor nyithu wi mathu kepa sa meya ladha le kiza. Mathu la anyi hathu na nankiqanan kekuli kesathu makesü sa.

² Judah nyithu na asang nzathu ya, isanu Anyiza nyi kemethathu na nmethala. Accülikesa nu kedithu tanji hati sa.

³ Hi ha zakeya wi ihathakina wina ithsümeni mezüqhe, ilissen, nu ipangkenye pfü, nu ihathakina wina ayyi wi qanca dua.

⁴ Hi ihathana nu ciwi minulen wi ahhansha sapi kekinyi tsü kecu donki, nu anyithu na saghula hi vüya — mathu tsüdila qhethiketen sa kepaghenanye Israel Nyizawa na anyi kushiyyi wina keghonengthu kesamithu tsü khishichi kesalina.

⁵ Minulen wi ahhansha kesa tsüwa na kegho wi hi donki nu ihathana keben pen wina shagha, nu khilila hi ithsü kemezüqhe tsü mphi den, hi akhhutsüdu ikwen zanki pi Apvüwa iNyiza wi kekhie sa.

⁶ Hi khi, “O Anyiza, hi immi la pieki jüghedha. Ithu kesami na nbonki pi ithu li miwi atssan kemisi ti saben.

⁷ Ithu bamyithu wina gho nansü kecu ithu n-nyithu na sami ntsa sadha. Ithu kesami ghena ithu kadimithu nu keqhaikedithu na asang kadimithu kwen wi qanca dua, nu ithu pathia, tengya, nu ssinu atssüzüthu sa bvüa. Ithu na nansü sa keben hati ithu yasatha sa.

⁸ Khili matsü keu ghena, O Apvüwa ithu Nyiza, no ithu nantizen chi nu ithu pahan yala nssümagha kesa wi shuya thsü nu apen kemetha hawi yazishu hangya thsüben. No ithu yala nssümagha kesa wi bvüya thsü nu kahang ketheü pi ithu cüdha.

⁹ Ithu na nssümaghathu sa, isala no nssümagha kesa wi ithu teshi nsa. No Persia kadimithu sapi ithu nenya thsü nu ithu wala hang nu no Kekinyijjen yasa kethengwa tsü saneng, nu hewi Judah nu Jerusalem wi keyazi muya thsü.

¹⁰ “Isala O Anyiza, hathu ha tsüdila sadha ghena ithu na mangwale khiya nu? Ithu kheneng njüh khukechithu nkinala,

¹¹ tsüna no nmaghathu atusenjüh- kechüthu wina pi ithu kecü. Mathu na ithu wi nthu na wa benya keten yyiwa tsüna nmetha, kepaghenanye anyi ciwi kahangthu na nankiqanan, kekuli nkemethathu sapi ayyi katen kesü na wa pahanwa kecu pongdha le kiza.

¹² Mathu na ithu wi keujüla ithu na ayyi ciwi hang pi anonkwen nu tsüpi anuphan ghena ithu shicübvüghathu cü mvu lethu, ithu na khiela ayyi ciwi kahang nyithu ssinu nkeyalila nu khiela mathu kiqa pi mehaiwa nyelela haicen meya thsü lalo kiza.

¹³ Ithu kesazzi nu kesamithu ghena kemeten tsüdi ithu miwi kegho sengwi lela ithu na no ithu Nyiza ithu na kumu-u wi zengki pi ithu meten nu ithu ya hang thsü benle kesa chüben.

¹⁴ Isalethu, ithu khatinu kheneng n-yen khukechithu tsü nkechüghe sa nu gheshighena nyithu ha ssinu keyali nu? Keujüla ithu tsüti sa lethu, no nlebentsu ntsa pi ithu yasatha sa nu ithu thola nhang thsüla keben na.

¹⁵ Apvüwa Israel Nyizawa, no tsatanle, isala no ithu ya hang thsüben. Ithu na ithu kesami khishi pi no wi chiben; ithu na ntuwi ghokeya kemeshon mangla nmi.”