EZRA 7 - Kemethajüh (N) (Re-editing) Bible (BSI)

Ezra na gho Jerusalem Cukeya

¹ Amapi kejon sengwi Artaxerxes na Persia kadimi sa keben wi ciwi anyi kesü ma nyan Ezra na ben. Ma ma bamyithu khi wa hati Keqhaikedi ntsawa Aaron kecu chi: Ezra na Saraiya tsa, ma Azariya tsa, ma Hilkiya tsa,

² ma Shallum tsa, ma Zadok tsa, ma Ahitub tsa,

³ ma Amariya tsa, ma Azariya tsa, ma Merioth tsa,

⁴ ma Zerahaiya tsa, ma Uzzi tsa, ma Bukki tsa,

⁵ ma Abishua tsa, ma Fineha tsa, ma Eleazar tsa, ma Aaron tsa.

^6-7 Ezra na Apvüwa Israel Nyizawa na pi Mosa kecü Yenwa tsü kechüntsa nyi kesü sa. Ezra na Apvüwa ma Nyiza kesawegü kepvü ghena kadimiwa na ma kekhie tsüdi pi ma cü. Artaxerxes na kadikesa tagüwa mapi wi Ezra na Israel nyithu akhang kesü, tsüna keqhaikedithu, Levi nyithu, Kekinyijjen wi akhwi kechüthu, Kekinyijjen ghikehiethu, nu kekuli nyithu saghula Babilon wina ssinu Jerusalem wi wa.

^8-9 Mathu na asha atuwa wi atsathang atuwa Babylonia teshia, nu Anyiza kekiqa sen nu mathu na asha mangawa atsathang atuwa ghanan wi ghola Jerusalem cuya.

¹⁰ Ezra na ma kahang tsüdi pi Apvüwa Yenwa tsü si, tsü kuli, nu ciwi ayenthu nu ma jjügithu tsüpi Israel nyithu sansi.

Kadimi Artaxerxes na Pi Ezra Kecü Lesüwa

¹¹ Kadimi Artaxerxes na lesü hapi Ezra, keqhaikediwa nu kechüntsa, Apvüwa na pi Israel kecü ayenkhukechi nu ayenthu tsü chü mechan-metsa kesawa cüa:

¹² “Kadimi Artaxerxes na pila keqhaikediwa Ezra, Tang wi kebenwa Anyiza Yenwa kechüntsa kesawa kecü.

¹³ “Hi ahza khuchiben, hi kadiyyi tsüdi wi Israel nyithu tsüdi, keqhaikedithu, Levi nyithu, no gweghe Jerusalem wi wha mvu kebenthu na whaya mehai.

¹⁴ Hi nu hi sansichüthu meshu tagü gweghe, no kesun pi wala Jerusalem wi nu Judah wi n-Nyiza Yenwa pi no nondi kechiwa tsü mehaitsü nie benla nye khe kepili nanlo saben.

¹⁵ No, hi nu hi sansichüthu na suna nu rükatssü pi ma Kekinyijjen na Jerusalem wi keben Israel Nyizawa kinyi mvu kebenthu sen nu waben.

¹⁶ No Babilon diyyi tsüdi wi saghukeya suna nu rükatssü tsüdi nu Israel nyithu na kekinyi khukechithu nu mathu keqhaikedithu na Jerusalem wi mathu Nyiza Kekinyijjenwa ghena khukechithu la khuyalo.

¹⁷ “No kiden-kesha ntsa nu apisa hapi amesü süponthu, khaghaneni süponthu, khaghaneni zzathu, asu, nu kisengtssü shüya nu tsüthu pi Jerusalem wi Kekinyijjen kekinyipen miwi kinyi.

¹⁸ No suna nu rükatssü gilli keben tsüpi n-Nyiza kenen wina no nu no diyyi nyithu ghena katsüha lela saya mehai.

¹⁹ Kekinyijjen kekuli kesa wi kesen ghena ahyikhuthu pi no kecü tsü pi Jerusalem wi Anyiza tuwi chiben.

²⁰ Nu no Kekinyijjenwa ghena nsenthu keyishü tsüdi no kadi keben wi khuya mehai.

²¹ “Hi Eufrat Niduwa diyyi wi keben kesen kedithu tsüdi wi kizaben; katsüha lela Ezra, keqhaikediwa, Tang wi kebenwa Anyiza Yenwa kechü ntsawa na nthu wi khiethu wan pi ma cülo,

²² tsüna wala rükatssü kilogram 3,400, awhengsu kilogram 10,000, kisengtssü liter 2,00, oliv deli liter 2,000, kecu wi nu amcü nsenthu keyishü chu pi cülo.

²³ Nthu kiden-kesha ntsa nu Tang wi kebenwa Anyiza Kekinyijjen ghena nsenthu keyishü tsüdi pi ncüthu yishü, isanu ma imiwi nyelela iseng wi kadikesathu miwi ma leben ntsu thsüla metsilo.

²⁴ Nthu na keqhaikedithu, Levi nyithu, akhwi kechüthu, aghikehiethu, kekulikesa nyithu, nyelela anyi kesüle kesü lela Kekinyijjen ha ghena kekulithu miwi khajanathu yaya nben.

²⁵ “No, Ezra, n-Nyiza na kemetsa pi no kecü tsü sen nu anyi Eufrat Niduwa diyyi wi n-Nyiza Yenwa nie nu hang ketenthu tsüdi miwi ayenkesenthu nu pendhethu sa thsüle kessiyalo. No Ayenwa tsüpi anyi kesüle kesü lela tsü nkechüwa sansi ncüthu yishü.

²⁶ Keujüla anyi kesüle kesü lela n-Nyiza yenthu nyelela kadiyyi yenthu n-niela lethu, wan ma meten cülo; tsüna keshü, nyelela jügüshi nyelela ma keben-keyeng tsüdi khuya, nyelela pi atssüzü sa wa thsü kesa.”

²⁷ Ezra khi, “Ithu bamyithu Nyiza, Apvüwa senglo! Ma kadimi sapi hati nu Jerusalem wi Apvüwa Kekinyijjenwa tsü kinyikü thsüben.

²⁸ Anyiza nanketizen ghena hi kadimiwa, ma sansichüthu, nu ma kekhang ntsa kedithu kenen pvüyadha; Apvüwa iNyiza na kempvüza pi hi cü, nu hi Israel geithu wi alikesathu kejon ju sen nu hi gweghe kheneng ghoya.”