EZRA 4 - Kemethajüh (N) (Re-editing) Bible (BSI)

Kekinyijjenwa tsü Kesaneng Keshun

¹ Aghinyithu nu Benjamin nyithu kushiyyi wi kheneng keghothu na Israel Nyizawa, Apvüwa Kekinyijjenwa tsü saneng bendha le kesa zaya.

² Tsalina mathu na Zerubbabel nu ageithu wi accülithu wi wa nu khi, “Kekinyijjen ha kesa wi ikhang la nthu gweghe sa na. Ikhang la nthu na kinyi keten Anyiza tsü makesü kinyiden, nu Assiriya Kadimi Esarhaddon na ikhang kesun pi hewi kahang thsü nten na ikhang na ahhanshathu sapi ma kinyi ghodha”

³ Zerubbabel, Joshua, nu ageithu wi accülithu na mathu kiza, “Ikhang na Apvüwa ithu Nyiza Kekinyijjen kesü kesa witsü nthu kekiqa nsenla mehai. Persia Kadimi Sira na ikhang kekiza ti ikhang ketanla tsü saaden.”

⁴ Tsaseng wi ayyi ciwi kahang nyithu na Judah nyithu pateshü nu pateqhe, nu mathu ajjen tsü nsa thsüle sa.

⁵ Mathu na alaa pi Persia nyi kidhan wi kedithu mellinu mathu shun thsü. Mathu na Sira kadikesa chuli wa Dariya Kadimiwa kadikesa kecu hati ha sa.

Jerusalem Kesaneng Keshun

⁶ Kadimi Xerxes na kadi saya tegü wina anyi Judah nu Jerusalem wi hang keben ghinyithu na zhükechi jüh sengho mathu shun.

⁷ Kheneng, Persia kadimi Artaxerxes na kadikesa tsü wi Bishlam, Mithredath, Tabeel, nu mathu pvüshangthu na zhükechi jüh kesü pi kadimiwa cü. Alesüwa tsü Aramaik jüh wina zhü theng nu tsü kesi wi zhükemilichi.

⁸ Rehum ahngwa, nu ayyi ciwi kezhüwa Shimshai la Jerusalem cüki ha zhükechi jüh pi Artaxerxes cü:

⁹ “Rehum ahngwa, nu diyyi ciwi kezhüwa Shimshai, manyi pvüshangthu, pendhethu, nu kepa kedithu aghatsan na Elam yyi Erekh, Babilon, nu Susa wina keghothu tsüdi pi

¹⁰ anyi kepathu kedi nu kekhangwa Ashurbanipal na mathu jjen wina jügü pi Samaria nyunutiwa nu Eufrat Niduwa diyyi wi hangwa kesathu gweghe ha zhüchi.”

¹¹ Hawa ha zhükechi jüh tsü: “Ma maghathu, anyi Eufrat Niduwa kebenthu wina pi Kadimi Artaxerxes kecü.

¹² “Ithu na Njenkebenwa yala ha chü thsü mvuben, Judah n-yyi kepathu wina gho Jerusalem wi hang wa nu mathu na anyunuti nkemehaiwa nu kekivvüwa tsü saneng bendha. Mathu na khweti keshonthu tsü sa shhudha nu wan tsüthu sa cenyaben.

¹³ Njenkebenwa, keujüla anyunutiwa ha nu ma keshonthu tsü sacenya lethu, anyithu na khajanathu nkhuchila nu kadiji keben kegho ghena zeng waben.

¹⁴ Ithu na khili Njenkebenwa ncakhu wi keben ghena hati ha nsa thsü mvu, nu ha khi nan ben,

¹⁵ no ahza kesü khuchi pi nbamyithu na zhü kethengthu tsü bha nan thsü. Keujüla no tsüti sa lethu, anyunuti hawa ha keshüthangla kekivvü sagho nu kheni tsü wina tsü kekivvü pi kadimithu nu diyyi ciwi kekhang kesenthu cüle kesa no muyaben. Ma nyithu miwi kekhang senle kesa na keshüthangla dhu mtsü. Tsalina anyunutiwa tsü yasale.

¹⁶ Tsalina keujüla anyunutiwa ha saya nu ma keshonthu sa cenya nbendha kesa ithu na chüben.”

¹⁷ Kadimiwa na keluneng ha kesunchi: “Pila ahngwa Rehum, diyyi ciwi kezhüwa Shimshai, nu manyi pvüshangthu Samaria nu Eufrat Niduwa kepa wi lethu, Njenkebenwa na Eufrat Niduwa diyyi miwi khangya kahangthu kecü, shalom saben.”

¹⁸ “Nthu zhükechi jüh kesun kechi tsü zhükemili nu sipi hi kizadha.

¹⁹ Hi ahza khuchi pi kepili thsü nandha, nu ntsakhiwa Jerusalem na kheni tsü wina kadi kekhang shungho nu nyu kematang kekivvü nyithu ha pong ghole kesa muyadha.

²⁰ Kadimi kekhang ntsathu na ciwi kadisa nu Eufrat Niduwa diyyi tsüdi miwi kekhang sen nu khajana nu keben saghu ghole.

²¹ Tsalina hi ajüh npi kekhuchi chu anyi tsüthu na anyunuti tsü kesaneng tsü khenlo kesa nthu na ahza khushilo.

²² Wan ha salo, isanu mangla hi kenenwa tsü meyasa neng thsüle kesalina.”

²³ Artaxerxes wina zhükechi jüh ha pi Rehum, Shimshai, nu manyi pvüshangthu wi sichi meyi mathu na kaghajila Jerusalem wi wa Judah nyithu na anyunutiwa saneng keben tsü khen.

Kheneng Kekinyijjen Kekuliwa Sa Keshagha

²⁴ Kekinyijjen wi kekuliwa tsü khen nu Persia kadimi Dariya na kadikesa keni mapi npi kecu chu mangla nsala.